Home Politica Melvin Tromp di AVP ta pensa cu Ady Thijssen no por papia...

Melvin Tromp di AVP ta pensa cu Ady Thijssen no por papia di bon gobernacion si el a sostene mal gobernacion

29
0
SHARE
- Advertisement -

ORANJESTAD (AAN): Segun Melvin Tromp di AVP, partidonan di oposicion ya no sa mas kico nan inventa of gaña pa trata gana simpatia di un pueblo votado, cu ta confia grandemente den su actual Gobierno.

Parlamentario Melvin Tromp ta mustra cu e desaroyonan den e campaña electoral actual, ta loke partido AVP a spera, ya cu rivalnan politico pa falta di argumento politico di nivel y un vision miho cu loke a ser presenta den ultimo ocho aña, ta sigui kere cu nan por manipula un desaroyo positivo cu e isla a conoce.

“Nos ta mirando esaki tur dia, scuchando declaracionnan cu simplemente e propio politiconan aki no ta kere aden, pero nan ta sinta carga speranza cu pueblo lo cay den e tipo di wega aki, e tipo di declaracionnan populista aki.

Nos ta mira cantidad di declaracion, controversial pa nan mes ta ser haci tur dia, hendenan cu nunca a sostene integridad, cu nunca a para pa honestidad, ta hunga rol di e ta gran luchado pa e balornan aki.

Nos por a mira con ultimo dianan e miembro di fraccion di MEP den Parlamento, Ady Thijssen, ta sigui papia di corupcion, di desaroyo stanca, di falta di integridad, lubidando por completo su propio trabao como miembro di Parlamento durante di gobernacion di partido MEP.

Ta mesun Thijssen aki a haya su mes confronta c’un ex colega di dje pa loke ta tereno di gobierno cu el a bende, cu otro asuntonan cu no tabata cuadra cu ningun regla di integridad y awe ta pretende di trata di gana confianza di pueblo, keriendo cu pueblo a lubida tur e fechoria cu a pasa durante gobernacion di MEP.

Ady sinta den Parlamento sosteniendo gobierno no a lanta para y defende pueblo ora cu su Minister geel, a dicidi di saca clausula for di un contract di huur di un edificio cu ta casi basha den otro y percura cu pueblo mester a paga miyones un biaha mas pa algo cu no a sirbi interes di pueblo.

Tampoco Thijssen a bisa un solo palabra ora cu Gobierno di Reino c’un vuelo special, a bula bin Aruba y ranca cartera for di su Minister di Husticia di e tempo ey, pa pasa esaki pa un otro Minister y caminda su lider di e tempo ey, a duna e representantenan di Gobierno di Reino, un buki di carnaval como regalo.

Kende den pueblo por a scucha Ady Thijssen lanta para den Parlamento y bisa su gobierno di MEP e tempo ey, cu e tin cu duna trahadonan di gobierno, nan indexering back, duna nan back nan placa di vacacion, y duna algo extra na esunnan di menos recurso.

Al contrario for di momento cu Gabinete Mike Eman a sinta na 2009 y gobierno a bay di acuerdo pa duna esunnan den mas necesidad, pensionadonan, mamanan soltera algo extra di entrada manera entre otro schoolkindertoeslag, familiebijslag, schoolgelduitkering, aumento di slaario minimo, aument di pensioenpa nos hendenan grandi, Thijssen a sinta keto sin sostene e maneho aki di Gobierno di AVP.

Awe e mesun Thijssen aki cu otro coleganan ta bin dilanti y papia cu nan tin solucion pa nos pueblo, cu nan kier drecha un fondo di pensioen cu nan a habraca for di otro y kier papia di desaroyo economico cu nan a laga mal pega ora cu pueblo a manda su partido MEP cas den mal forma den eleccion di 2009.

Pueblo a manda un mensahe bon cla pa partido MEP den ultimo dos eleccion pero tur cos ta mustra cu Thijssen y su coleganan no a compronde e mensahe cu pueblo a duna e partido aki,” Parlamentario Melvin Tromp ta declara.

 

- Advertisement -

DUNA COMENTARIO

Please enter your comment!
Please enter your name here