Home General Mucha a fractura su braza na scol preparatorio y ningun hende a...

Mucha a fractura su braza na scol preparatorio y ningun hende a hibe Hospital

6817
1
SHARE
— Asina e mucha a keda despues di operacion.
- Advertisement -

ORANJESTAD (AAN): Riba Diamars, un dama preocupa a denuncia na mesa di Redaccion DIARIO, un caso serio cu a tuma na un Scol Preparatorio na Playa, pa ser exacto Imelda Kleuterschool.

E dama cu hopi tristeza, a splica cu su yiu homber, un criatura di apenas 4 aña di edad, riba Diahuebs siman pasa a fractura su braza na scol, y ningun hende a haci nada.  Ningun hende a ripara, ni duna e mucha cu yama John, cualkier yudanza medico.

Te despues di 1’or di merdia ora cu e persona encarga pa hiba y busca e mucha di scol, a mira cu algo no ta bon.  E chofer a ripara cu John no ta mustra bon, debi cu e ta yorando di dolor profundo, y su braza drechi ta full hincha, tur corra, y ta mustra di ta haci hopi dolor.

E chofer concientemente a dicidi na bay paden pa check kico a pasa cu e criatura.  El a yega na e Juffrouw di John, pa check kico exactamente a pasa cu e mucha.

E Juffrouw a bisa cu e no tabata tey, debi cu e ta den baño, y un otro colega a mira John riba vloer den sala di Gym  ta haci deporte, y parce cu un otro mucha a “rasca” John na su braza.  E momento ey el a scucha John ta yora.

Ora el a bay cerca John, el a splica cu e mucha a stop di yora pa cual e no a check mas kico por a socede cu John, y pesey e no a preocupa.

Algo prome cu scol a caba, y prome cu e chofer ayega (12:30 pm), e Juffrouw a mira John ta habri e tas pa hinca e boter aden y a cera esaki cu un man y e ora ey e Juffrouw a yama John y el a constata cu braza di John ta hopi hincha.  Te aki ta loke el a bisa e chofer cu a bin busca e criatura na school.

Mirando cu e forma cu e braza a hincha, y e inmenso dolor cu e mucha ta aden, e chofer corectamente a dicidi pa no transporta John pa cas, sino a bay directamente pa Servicio di Emergencia na Dr. Horacio Oduber Hospital.

Na caminda pa Hospital, e Chofer a core yama e trabao di Mama di John, pa pone na altura di loke ta pasando.

Pa banda di 1:25 pm, nan a yega na Servicio di Emergencia na Hospital, unda mesora a bay cu e mucha na yoramento den Policlinica.  Mesora e profesionalnan a mira cu e mucha aki a fractura su braza drechi.

A core saca X-Ray di e braza, y a resulta cu ta berdad!  E fractura complica tabata rekeri operacion urgente.  Ademas, ta bisto cu un fractura asina lo pone hende sclama di dolor sin stop.  Pesey inmediatamente a cuminza duna e mucha calmante pa purba reduci e dolor un poco.

A manda busca ciruhano, y poco prome cu 7:00 pm, el a drenta sala di Operacion, unda Dr. De Windt a opera e mucha.  Despues di esey, mester a pone gips na un gran parti di su braza, y despues a keda interna na Dr. Horacio Oduber Hospital.

E dama a splica DIARIO, cu te cu Diamars atardi ainda e no a haya ningun contesta concreto ni exacto kico a pasa cu su yiu John na scol.  Absolutamente e ta decepciona cu loke a pasa, y e ta buscando Husticia pa loke a pasa cu su yiu.   No por kere cu hende lo guli manda abao, cu un “simple rasca” ta finaliza den un fractura complica, y cu ta hopi serio.

E dama a bisa, cu e ta sigur cu ningun Mama lo acepta esaki, y pesey el a mustra di lo sigui cana su caminda pa haya sa e berdad.  E ta bay haci esey via Directiva di Imelda Kleuterschool, como tambe cu SKOA, y cu Inspeccion di Enseñanza.

Na final, e dama a duna autorizacion na DIARIO pa publica e potret pa mira con su pober yiu ta den Hospital recuperando di e fractura y operacion.  Lo bay dura algun tempo prome cu nan haya sa si acaso e operacion ta exitoso of no.

- Advertisement -

1 COMMENT

DUNA COMENTARIO

Please enter your comment!
Please enter your name here