Home Salud No tuma presion halto como wega

No tuma presion halto como wega

18
0
SHARE
- Advertisement -

Praktijk Ondersteuner cerca dokter di cas: Dellanira Maduro

ORANJESTAD(AAN)– Un ‘Praktijk Ondersteuner’ cerca dokter di cas (POH) ta atende e pashentnan cu tin malesanan cronico. Cerca hopi di e pashentnan cu nan ta atende tin diferente factor cu ta contribui na presion halto, pero tambe nan estilo di bida ta hunga un rol. Esaki ta bin door di loke nan ta come, nan custumber, si nan ta haci actividad fisico of si nan ta consumi alcohol of ta huma. Tur ta factornan di riesgo cu por conduci na presion halto, segun e POH DellaniraMaduro.

Te awor aki den e experiencia di Dellanira Maduro, trahando como POH, ta mira cu durante consulta tin falta di conocemento di alimentacion. No solamente pa sa kico di berdad tin den e cuminda cu por afecta presion fuera di e porcion, pero di haya sa con hopi sodium e cuminda ta contene, kiermen salo. Evalua si e cuminda cu ta come ta saludabel of cu por mehora esaki.

Tambe kico ta e cantidad di salo cu e persona por uza, ki otro por uza na lugar di e salo y kico pa haci pa mehora esaki.

“Tambe ta ripara den consulta cu e pashentnan hopi biaha ta tuma e remedi pa presion manera e ta remedi pa dolor di cabes. Nan ta bisa bo ora mi sinti dolor di cabes ta biniendo, e ora ey mi ta bebe e remedi di presion. Remedi di presion no ta mescos cu Paracetamol of pa dolor di cabes. E ta un remedi cu mester bebe tur dia pa berdaderamente preveni cu ta haya complicacion”, Dellanira Maduro a remarca. Ta suma importante pa esunnan cu ta bebe pildo di presion, semper bebe esaki manera e ta prescribi. Presion halto no ta duna ningun sintoma, e ta silencioso, p’esey e ta peligroso.

E dañonan cu presion halto ta haci riba termino largo ta algo cu hende no kier yega na dje, pasobra e por entre otro daño na riñon y bista, ta un factor di riesgo pa malesa di curason y di ader incluyendo stroke. “Ta ripara cu loke e pueblo Arubiano mester hopi ta educacion di alimentacion y remedi. Hopi biaha e pashent no sa con e remedi ta traha, ki momento ta e momento corecto pa bebe. Di con mi tin cu bebe na cierto momento. Si e pashent compronde esaki ta bay tin miho resultado den un siman caba, ta mira un mehoracion. Tambe tin hende ta bisa cu nan ta come menos salo, pero por tarda hasta 1 luna pa adapta na menos salo”, Dellanira Maduro a remarca.

Keda haci movecion di 30 minuut 5-7 biaha pa siman. Movecion ta yuda pa no solamente controla presion, tambe pa colesterol, pa preveni si un hende cu no ta pashent diabetico pa bira uno den futuro. Movecion tambe ta yuda pa mehora y controla e peso y asina e persona lo core menos riesgo. Dellanira Maduro ta haya importante e parti di educacion, no solamente di sa kico e presion ta, pero tambe con e remedi di presion ta traha.

Dellanira Maduro ta mira hopi biaha pashentnan diabetico, pero mayoria di nan simultaneamente ta sufri di presion halto tambe. Si nan tin diabetes y presion halto, ta evalua si tin relacion cu nan alimentacion, pero tambe te tene mas cuenta si ta trata di un persona riba 45 aña. “Den caso bo ta un persona rond di 45 aña y bo sa cu bo tin peso di mas cu BMI riba 30 y bo colesterol ta tiki halto, ta bon pa bay bo dokter pa check bo presion regularmente, funcionamento di e riñon entre otro pa tin un miho control. Si esaki ta bon cada 3 aña lo ta ideal pa tene un control pa bo keda trankil p’e banda ey”, segun Dellanira Maduro.

Conseho di Dellanira Maduro pa no tuma presion halto como un wega, pasobra hopi biaha hende ta lag’e te ora cu ta sinti algo. Hopi hende no ta gusta bay dokter of gusta bebe remedi, pero ta miho pa preveni y ta bon informa. Si un hende ta sinti cu e no ta bon informa of ta bebiendo un remedi pa presion caba y e ta sinticu e no tin conocemento suficiente pa haci un consulta cu su dokter di cas. Of si den e consultorio di dokter di cas tin un POH cu por duna mas splicacion, asina e pashent por sinti su mes mas sigur.

Por preveni presion halto door di (laga) check e presion regularmente, hiba un bida saludabel y uza remedi manera prescribi por conduci cu presion halto ta bou control cerca mayoria di hende cu tin e malesa aki.

 

- Advertisement -

DUNA COMENTARIO

Please enter your comment!
Please enter your name here