Home Comentario Pa hisa calidad di Caya Grandi mester tin variedad di producto

Pa hisa calidad di Caya Grandi mester tin variedad di producto

20
0
SHARE
- Advertisement -

Opinion publico:

ORANJESTAD (AAN) — Algun yamada di opinion publico a drenta na nos mesa di redaccion, tocante tur loke ta wordo papia ultimo dianan relaciona cu e posible aperture di Caya Grandi pa auto, y pa supuestamente trece pa e consumidornan mas accesibilidad pa cumpra.

No obstante, no tur hende ta kere cu e problema ta Aruparking, ni cu e autonan no ta pasa regularmente den Caya, sino e hecho cu no tin variedad di producto.

Locual tin ta mayoria di tienda Hindu, cu tur ta bende mesun articulonan, prijsnan ta varia, y calidad mesun deficiente. Mester habri caminda y pone menos obstaculo na comerciantenan local mes, manera den pasado, pasobra e hende local sa kico su mes hendenan gusta, mester y ta desea.

Por ehemplo, no tin un tienda specializa den paña pa mucha cu ta diferente y berdaderamente bunita, y cu no ta di e mesun cos den cada taya.

Pa dama ta mescos. Un dama a comenta cu el a cana Caya di punta pa punta pa busca un shimis elegante y manera e tabata kier e no a haya. Hindunan no ta trece e tipo di pañanan fini cu muhernan cu tin glamour ta bisti. Asina e señora a expresa. Y manera e diferente otro consumidornan femenino ta pensa.

Kiermen, no tin exclusividad mas den Caya. Si gobierno elimina sikiera un poco burocracia pa habri negoshi, y stimula nos mes hendenan pa habri tienda cu articulonan di calidad pa dama, cabayero y mucha, sigur Caya lo bira mas atractivo pa haci compras. Di otro banda, tambe mester exigi e tiendanan Hindu pa trece variedad y stop cu baratiyo di paña cu na e prome laba, nan ta caba na nada.

Tin indicacion (nos no tin prueba palpable) cu hopi di nan ta cumpra paña, zapato y otro accesorionan na Panama na prijsnan di baca flaco. Nan ta haci compranan grandi, y aki nan ta bende nan 200% mas di e prijs cu nan a paga aya. Na Panama no tur tienda di free zone ta bende calidad y mucho menos na mayoreo.

Hopi Arubiano ta sinti falta di e productonan Europeo. Awendia ta un tienda so den ciudad ta bende e bunita shimisnan cu nan ta trece di Europa pero e ta situa den e mall cerca di e terminal di Arubus. Algo asina aki no tin den Caya, danki Dios e tienda a crea su fama añanan atras anto e ta e alternativa cu tin pa busca algo exclusivo y bunita. Pero ta e unico, segun opinion.

- Advertisement -

DUNA COMENTARIO

Please enter your comment!
Please enter your name here