Home Remitido Pabien na fundacion “Musica” y exito na A.M. A.

Pabien na fundacion “Musica” y exito na A.M. A.

23
0
SHARE
- Advertisement -

Remitido

Skirbi pa Jesus “ Joy” Kock

Cu hopi satisfaccion mi a  lesa cu fundacion Musica a percura pa tur participante den e calypso-contest  y roadmarch-contest ( mi ta nenga di uza e imitacion di titulonan di Trinidad) a   haya nan pagonan di e aña  aki, pero tambe di añanan anterior. Sublime trabao. Nos di Adayma y Asoma a lucha hopi aña te cu nos a logra 50 -50 % cu S.A.C., pero mi kier aclaria cu ni Adayma ni Asoma a lanta pa lucha cu S.A.C. pa e bandanan, cantantenan y compositornan, haya nan derecho di ricibi nan merecido pagonan.

Tempo cu nos a lanta e asociacionnan tabata pa proteccion di nos musiconan trahando na hotelnan y busca trabaonan pa bandanan chikito na hotelnan. Nos grandinan ta bisa:”Mester tin pasado pa por tin futuro”. Nos statutonan cu ta “geldig” (valido ainda)y  ta na ordo di cualkier organisacion nobo.

Nos ta spera cu A.M.A (Asociacion di musiconan di Aruba)tin hopi exito, pasobra e trabao ta duro y pa logra union tambe.  Claro cu nos statutonan di Adayma ta menciona musiconan y artistanan en general y ta despues di basta tempo cu nos a lanta,  e bandanan grandi a pidi nos pa yuda pa nan haya nan derecho cu S.A.C.

Esaki a ser logra parcialmente. Tambe nos a lanta fundacion “Academia musical  di Aruba” y tabata duna lesnan den tur instrumentonan musical na La Salle College despues di 3’or atardi y tambe riba diasabranan. Nos a solicita Sr. Rufo Odor q.e.p.d.cu tabata un gran musico y cantante, pa bira e director di e academia.

E academia tabatin su frutonan y hopi alumno a bira musico y despues a  bai studia den exterior, regresando  nos isla y a yuda dunando lesnan tanto na “Scol di musica Rufo Wever” y tambe na  fundacion “ D.E.C.” (Desaroyo Educativo Comunitario). Mester menciona  aki cu ta ex-Minister Dokter Lili Beke-Martinez a funda e Stichting aki y mi a bira e prome presidente.

E fundacion aki a uza un parti di nos statuto como ehempel pa formalisa  Stichting D.E.C. cu a duna lesnan den tur distrito pa mas of menos 1000 alumno  cu hopi exito, mi mester agrega cu tempo cu M.E.P. (lesa Ramon Lee) a bin na mando e ultimo biaha, nan a cambia e directiva .Hopi lamentable ta  cu ex-minister Otmar Oduber prome cu su retiro a elimina e fundacion aki cu e promesa cu su persona den futuro lo hacie mas grandi. Tempo lo bisa (time will tell).

Tur caminda cu tabata por mi a uza “nos” y no ami, ami, pasobra mi no ta un “ikkerig”. Nos tin hopi di gradeci na otro miembronan di diferente Asociacionnan y fundacionnan.

Nos tin hopi peticionnan pa scirbi tocante nos festivalnan e.o “Voz di Oro” Voz Hubenil”, “Voz “Supremo” y di O.T.I., pero nos mester busca e storianan aki den filenan bieu, pero nos lo purba.

Te proximo. Cu Poder di Dios.

  1. Kock

 

- Advertisement -

DUNA COMENTARIO

Please enter your comment!
Please enter your name here