Home Politica Parlamentario mr. Bikker refrescando e memoria di pueblo

Parlamentario mr. Bikker refrescando e memoria di pueblo

48
0
SHARE
- Advertisement -

ORANJESTAD (AAN) – “Mi kier refresca memoria di nos pueblo, pa loke ta trata e mal maneho di Gabinete di Mike Eman 1 y 2” ta palabranan cu mr. Andin Bikker a expresa pa inicia su di dos tema di agenda.

Esaki den conferencia di prensa semanal di Partido POR Plataforma e Forza Nobo, unda e prome punto cu el a trece dilanti, pa refresca, ta e aspecto di inseguridad.

Parlamentario mr. Bikker a reitera cu na 2009, sr. Eman den un video tremendo a priminti pueblo cu e ta bay restaura seguridad den nos pais, pasobra di e tempo ey caba, den su concepto y di hopi votador tambe, nos tabata biba den un inseguridad enorme.

“ Sin embargo, ocho aña despues, nos a constata cu e no a rescata seguridad. Nos por constata tambe por ehemplo, cu e debe nacional a wordo redobla den e temporada di Mike Eman 1 y 2, unda cu su maneho descabeya y cu prioridad cu e no a aloca na un manera corecto y a redobla e debe”, mr. Andin Bikker a remarca.

El a subraya cu hopi hende ta papia di debe, pero nan no ta haya splicacion kico ta nifica redobla e debe.

Actualmente nos ta pagando un average di entre 220 pa 230 miyon florin na servicio di debe. Esaki na pago di interes. Parlamentario mr. Bikker a splica cu e placa di interes ta bay na exterior, of en todo caso na esnan cu e pais debe, y esaki ta placa cu nos no tin pa e prioridadnan cu nos ciudadanonan ta pidi pe.

Esaki por ehemplo pa asfalta camindanan cu tin ciudadanonan ta wardando 30 aña largo den nan bario. Gobierno no por cumpli cu esaki pasobra e tin un servicio di debe di 230 miyon florin.

“Si un persona ta bisa cu e kier bay den exterior pa opera, pero pa falta di fondonan nan ta bise cu e tecnica ey no ta wordo aplica, ta pasobra gobierno no tin fondo pa aporta na casonan specifico asina aki. Pues, cualkier caminda cu gobierno ta uza excuse cu pa falta di fondo no por atende un problema of preocupacion cu ta biba den nos comunidad, ta pa motibo di servicio di debe”, mr. Bikker a subraya.

Pa loke ta trata inseguridad, Parlamentario mr. Bikker a expresa cu nan ta constata cu hopi tempo ta bay den traha process verbal y/of cu falta di material ta pone cu no por atende cu crimen cu ta wordo cometi of preveni crimen, esey tambe ta pa falta di fondo pasobra e gobierno cu su maneho a redobla e debe nacional, y aworaki e servicio di debe ta cu nos ta paga 230 miyon, y e ta un reto cu POR Plataforma e Forza nobo, en todo caso, tin solucionnan pe con nos ta bay rebaha e debe nacional aki.

Un di tres ehemplo ta cu e gobierno aki no a traha ni un cas social den ocho aña. E 74 casnan social cu a wordo termina den e periodo di e gobernacion aki, tabata netamente colega Marisol Lopez-Tromp a laga nan den ehecucion caba.

Esaki ta bisa nos cu un gobierno den ocho aña e no por a traha ni un cas social, y tur e diez mil personanan cu ta wardando aworaki pa bin na remarca pa un cas social, e ocho añanan cu a pasa cu nan lo por a paga e hipoteca din an propio hogar y cu nan por a casi bira doño caba den un average di casi diez aña, awe no tin nada.

“Esaki ta tres ehemplo palpable pa refresca memoria pasobra e gobierno aki, cada pasa cuatro aña, nan ta core bin yen di fanfaria, yen di bandera, y diripiente pa e eleccion aki tur cos por atrobe”, mr. Bikker a acentua.

El a agrega cu gobierno ta purba baha prijs di awa y coriente y ta bin cu yen di promesa, djis pa mascara nan incapacidad pa goberna y purba laga pueblo lubida riba e hecho cu nos ciudadanonan ta bibando den inseguridad, cu no tin fondonan pa atende cu hopi problema cu nos tin, manera inseguridad, problema social, etc., y pa en todo caso solamente den tempo di campaña pone un tipo di cortina pa purba haci pueblo lubida cu durante e ocho añanan cu a pasa nan a goberna na un manera sin pone nan prioridadnan na nan lugar.

Parlamentario mr. Bikker a remarca cu ta pesey su colega Otmar Oduber a bisa cu e no por reconoce su mes mas den e Partido AVP ni den e maneho cu nan ta hiba, y pesey el a tuma un decision pa duna e paso di distancia su mes di gobierno y lanta e plataforma aki, den cual nos tur a uni.

“Pesey no tin lucha sin sacrificio y nos tur akinan a sacrifica nos mes pero pa e bien comun, pa tin un mihor gobernacion y nos di e experiencia cu nos tin a señala  y identifica e problemanan, nos a bay den acercamento cu pueblo pa consulta un rato kico ta su preocupacion y seguramente, e tres di nan cu mi a menciona” mr. Bikker a subraya.

Parlamentario mr. Bikker ta haya cu aworaki cu nos ta den campaña pa eleccion, ta bon pa refresca memoria di nos pueblo votador y haci un yamada na dje pa no laga nan gañe, cu pantaya cu buya, cu hopi sticker y bandera, pero pa corda cu na final di dia inseguridad lo keda bati na nan porta si keda vota pa e minister concerni, e debe nacional lo keda incontrolable, casnan social no ta wordo traha, salud publico no ta wordo atendi debidamente, y asina tin un sin fin di asunto cu no a worde soluciona manera mester ta, ni a haya e prioridadnan mereci den ocho aña di gobernacion.

- Advertisement -

DUNA COMENTARIO

Please enter your comment!
Please enter your name here