Home Suceso Polis a logra identifica persona haya morto na lama

Polis a logra identifica persona haya morto na lama

9066
0
SHARE
— Victima a wordo identifica como Angelo Kastablanc.
- Advertisement -

ORANJESTAD(AAN): E persona cu a wordo haya morto riba Diabierna mainta, na costa panort di Aruba, ta un hende local biba na Aruba.

— E auto di e victima a wordo haya mas pariba.

Tabata Diabierna mainta algo pasa di 6:00 am, un ciudadano cu tabata canando cu su cacho a lo largo di costa parti patras di Faro di California, a mira algo peculiar.  A resulta cu ta un homber full sunu ta abao banda di oriya di lama, y e no ta duna señal di bida.
Mesora el a bati alarma na autoridad, y Central di Polis a ricibi e yamada pa 6:10 am.  Asina un poco despues, unidadnan a yega na e lugar.
Tanto Polis como tambe Recherche, y personal Tecnico Hudicial di Departamento di BFTO a yega na e area, pa asina cuminza cu un investigacion.  A dicidi na check full e area pa mira si por tin algun pista mas di loke a pasa.

   Mientras tanto a pidi presencia di Docter pa asina check e persona.  Te banda di 8:50 am, Dr. Texier a constata morto di e persona cu e momento ey ainda no a identifike.  E causa oficial di su morto ta hogamento.
   Victima Identifica:   E persona tabata eybao benta sin ningun paña na su curpa.  Esaki ta pasa hopi biaha den lama bruto, cu ola ta kita paña di personanan cu a hoga e parti di costa aki.
   Autoridad a bin nota cu mas pariba tabatin un auto su so staciona, y Polis a cuminza pensa cu e ta pertenece na e victima.  Asina a cuminza haci un investigacion, y a bin confirma cu e victima ta di inicial Angelo Kastablanc, naci na Curaçao na 1970, y biba na Aruba.  Esey a wordo confirma na DIARIO door di Liliana Rasmijn, vocero suplente di Cuerpo Policial.
   Aurora Funeral Home a bay na e lugar pa asina busca e restonan mortal.  Famia tambe a wordo poni na altura di e situacion, y pesey Slachtoffer Hulp tambe a duna un man den e situacion aki.  Takelwagen a bay cu e auto.
   Kico a socede exactamente, esey ta investigacion lo tin di determina.  E lo por ta accidental of algo intencional, pero hecho ta cu lama ta masha bruto mes, y cualkier persona canando riba baranca e dianan aki, tin di tene cuenta cu hasta biento fuerte por pushabo benta abao.  Polis sinembargo no ta divulgando nada di nan hipotesis.  Pero ta bay investiga tur detaye, incluyendo check kico tin den e auto, y tambe mira si lo por tin detaye extra riba e curpa di e fayecido.
   Na famia di e fayecido, DIARIO ta manda palabranan di condolencia.
Ultimo Update:  2:25 pm AST
- Advertisement -

DUNA COMENTARIO

Please enter your comment!
Please enter your name here