Home Hudicial Polis tabatin Michael Gibson deteni bao di full otro nomber

Polis tabatin Michael Gibson deteni bao di full otro nomber

1234
0
SHARE
- Advertisement -

ORANJESTAD (AAN): Desde cu el a keda deteni Dialuna 1 di Mei na altura di rotonde di Hato, e homber Canades, Michael “Teddy” Gibson, a duna nomber robez na autoridad local.  E posibilidad ta grandi cu Polis tabatin e persona aki encarcela bao di e nomber falso ey, te ora cu e corant Toronto Sun a divulga cu e homber deteni na Aruba ta Michael Gibson.

Kizas esaki a yuda autoridad local na Aruba, conclui cu e detenido di berdad ta Michael Gibson, y no e nomber falso cu el a duna.

Vocero di Ministerio Publico a confirma cu na momento di su detencion el a duna nomber falso.  Y e siman aki a bin confirma su identidad berdadero.  DIARIO ta deduci di esaki, cu posiblemente awor nan a logra di confirma via su vingerprint.

Algo nobo tambe ta e hecho cu a keda confirma cu Canada ta pidi extradicion di Michael Gibson.  Ministerio Publico a indica den un boletin emiti Diamars atardi, cu ta berdad cu esaki ta e mes persona di cual Aruba a haya un peticion pa extradicion (uitleveringsverzoek) di autoridadnan Canades pa un crimen cometi na Canada.

Manera DIARIO a indica caba, Michael “Teddy” Gibson tin 30 aña di edad, y e ta wordo busca na Canada pa e asesinato di Julian Weekes di 29 aña, kende a wordo tira mata pafo di un Bar na Toronto na April di aña pasa.  Algun dia prome a mata amigo di Julian, esta Ceyon Carrington di 29 aña tambe, na Leslieville, Toronto.

Julian Weekes y Ceyon Carrington ta entre seis victimanan mata (incluyendo un abuela inocente), cu a perde nan bida entre 23 di Maart 2016 te cu 11 di Februari 2017 den e guera sangriento entre e dos pandiya aki.

Despues di a comete e asesinato, Michael Gibson lo a logra huy pa Aruba.  E tin casi un aña caba ta core rond y biba scondi riba e isla.  Awor a sali na cla cu e tabata usa nomber falso.  Tin rumor ta indica, cu e tin un paspoort falso.

Awor Canada ta buscando su extradicion.  Pero si acaso Gibson ta envolvi cu e asesinato na Aruba, e ora Canada lo tin di bay sinta warda te ora cu e Proceso Hudicial finaliza aki.

Awe Diahuebs e cuatro sospechosonan cu keto bay ta den detencion, tur cuatro Canades, lo wordo hiba atrobe dilanti Huez comisario.

Mientras tanto, e sospechoso principal Michael “Teddy” Gibson, a resulta di ta un artista di rap, y tin varios videoclip di dje, incluyendo numeroso riba YouTube.  Aki e ta usa e nomber “Tyke”, y e tin varios videoclip di dje den e duo “Turk X Tyke”.   Riba e potret por mira Tyke y Turk den nan presentacion.

 

- Advertisement -

DUNA COMENTARIO

Please enter your comment!
Please enter your name here