Home Politica Premier Eman a pone prome piedra pa Santa Cruz haya su propio...

Premier Eman a pone prome piedra pa Santa Cruz haya su propio MFA

238
0
SHARE
- Advertisement -

ORANJESTAD (AAN): Den presencia di partnernan di e proyecto, futuro empleado y tambe usuarionan, Minister President Mike Eman a pone dialuna atardi e prome piedra pa construccion di MFA Santa Cruz. Esaki ta bira e di cuater Facilidad Multifuncional destina pa ofrece un gama di servicio publico y priva na ciudadanonan den nan propio districto.

E edificio ta diseña pa e arkitecto Arubiano Gisbertho Figaroa, mientras cu e trabao di construccion ta bou encargo di compania local BIC Aruba N.V. bou supervision di funcionario Michael Croes di Departamento di Obranan Publico (DOW). Un bes cla, e operacion diario lo ta bou guia di Gerente General Fernando ‘Nando’ Kelly y Asistent di Gerente General, Andres ‘Modechi’ Werleman.

Tin entendi cu su construccion, for di e proceso di preparacion di tereno, a cuminsa dia 19 di april ultimo y ta bay tin un duracion aproxima di 12 luna pa cubri 1.100 meter cuadra. E edificio di dos piso ta conta cu un lift, mescos cu ta e caso na Paradera y Santa Cruz, a tene cuenta cu tur aspecto pa facilita acceso na esnan cu un limitacion fisico.

Ademas di sede di Oficina Auxiliar di Gobierno cu actualmente ta ubica na rotonde di Santa Cruz, e MFA lo tin bou di su dak un sucursal di Servicio di Impuesto, sala di curso/reunion, Bibliotheek y Cafetaria. Diferente na e MFAnan construi anteriormente, e parkeerplaats di MFA Santa Cruz ta na e parti dilanti di e edificio.

Actualmente Oficina di Maneho di MFA ta den deliberacion y negociacion cu diferente instancia y individuonan interesa den huur un espacio den MFA Santa Cruz, pero ainda no tin un acuerdo concreto. Prome Minister ta felicita pueblo di Santa Cruz cu den luna di maart 2018 lo por cuminsa disfruta di e servicionan di nan Facilidad Multifuncional, moderno, espacioso y practico.

 

 

- Advertisement -

DUNA COMENTARIO

Please enter your comment!
Please enter your name here