Home General Relato Anual di CAft di 2016 mustrando cu a cumpli cu normanan...

Relato Anual di CAft di 2016 mustrando cu a cumpli cu normanan presupuestario

97
0
SHARE
- Advertisement -

ORANJESTAD (AAN): Den 2016 Corsou, Aruba y Sint Maarten a logra cumpli cu e normanan di supervision financiero, a pesar cu economia tabata adverso. Tambe Boneiro, Sint Eustatius y Saba tabata exitoso den 2016 cu nivelacion minimal di e presupuestonan. Sinembargo, pa tur pais y entidad publico ta keda ainda suficiente reto riba tereno di finansa publico, particularmente pa loke ta sostenibilidad duradero y maneho financiero. E asuntonan aki ta bin ampliamente padilanti den e Relato Anual di CAft di 2016.

Supervision den tempo di adversidad economico

Na 2016 Colegio di supervision financiero pa prome biaha a pasa door di un ciclo anual completo di preparacion, ehecucion y hustificacion di presupuesto den su asesoramento na tur pais y entidad publico den e parti Caribense di Reino Hulandes, despues cu tambe Aruba a institui supervision financiero na 2015. Pa motibo di un clima economico menos favorabel, cu crecemento economico atrasa y deflacion, tabata trabahoso pa realisa e ingresonan di impuesto presupuesta.

A cumpli cu e normanan presupuestario

Apesar cu economia tabata adverso e tres paisnan y entidadnan publico a logra realisa e normanan di supervision financiero den 2016. Corsou y Sint Maarten a sa di logra surplus presupuestario den servicio ordinario, mientras cu Aruba a realisa un deficit presupuestario di 2,0% di e PNB, di conformidad cu e norma. Boneiro y Saba a cera e aña cu un presupuesto balansa, mientras cu Sint Eustatius a realisa un surplus cu cual a compensa pa un gran parti e deficitnan sufri anteriormente.

Finansa publico sostenibel

Pa finansa publico sostenibel di forma duradero, presupuesto balansa no semper ta suficiente. Pa Aruba y Sint Maarten ta conta cu e resultadonan presupuestario tabata fuertemente relaciona cu entrada incidental. Particularmente pa Aruba ta di importancia pa sigui un caminda dirigi riba sostenibilidad di finansa publico, en bista cu e cuota di debe, pa motibo di e deficit presupuestario di 2016 y un PNB decreciente, a sigui aumenta te na 86% di e PNB. Pa Corsou y Sint Maarten e cuota di debe ta na 42% resp. 33%. Pa finansa publico sostenibel introduccion di un norma di cuota di debe di 40% den legislacion nacional, di conformidad cu un conseho di FMI, por contribui grandemente.

Dinamica di debe

Pa motibo di e supervision financiero Corsou y Sint Maarten por fia placa na un tasa di interes masha faborabel. E bentaha financiero di esaki ta monta na 1,5% di e PNB anualmente. Pa Aruba entretanto e tasanan di interes a baha y e spread cu Aruba mester paga riba mercado di capital internacional a baha cu 1,5% despues cu a institui supervision financiero.

Sinembargo, e carganan di interes, cu ta monta na 17% di e ingresonan, ta constitui un carga mucho pisa pa e presupuesto. A consecuencia di crecemento economico abou, inflacion abou y e tasa di interes relativamente halto Aruba ta expuesto na un ‘dinamica di debe’ perverso.

E tres factornan menciona ta ocasiona cu surplus presupuestario primario no ta suficiente pa baha e cuota di debe denter di un termino cortico. Crecemento economico mas halto y carga di interes mas abou ta necesario pa elimina e circulo vicioso. Den e Relato Anual a incorpora un capitulo apart den cual ta dedica atencion na con pa logra finansa publico sostenibel.

Maneho financiero ta keda un punto di mehoramento

Te ainda no ta logra suficiente progreso den fortificacion di e maneho financiero. Ta aproba e cuentanan anual mucho laat y e accountantnan no ta capaz di expedi certificacion aprobatorio a base di e informacion suministra.

E obhetivo pa Corsou ta pa obtene na 2018 un certificado di exactitud di e accountant, mientras cu pa Sint Maarten y Aruba a fiha e fecha limite na 2020. Despues por traha pa yega na certificado di legitimidad aprobatorio di e accountant. Fortalecemento di servicio di impuesto ta imperativo den tur e paisnan pa mehora cumplimento cu norma ora di paga impuesto.

Empresa publico

Na 2016 Colegio di supervision financiero a dedica atencion tambe na varios empresa publico, di cualnan Gobierno ta accionista.

Un posicion financiero sano di empresa publico dipursi ta importante pa finansa publico sostenibel y monitoreo di e empresanan aki ta forma parti di bon maneho financiero. Maneho corporativo (corporate governance), incluyendo un maneho di dividendo transparente, mester haya miho forma den tur e paisnan.

Bon colaboracion

Age Bakker aki a declara: “CAft ta wak atras na un aña den cual, den bon colaboracion cu e paisnan y e entidadnan publico, a dal pasonan significativo pa sostenibilidad di finansa publico.”

Parlamento ta hunga un rol importante den hustificacion di e maneho hiba y di finansa publico. Den e caso ey nan ta haya sosten di e consehonan bon funda di e consehonan consultativo y di e controlarianan general.

Pa aña 2017 e paisnan y e entidadnan publico ta para atrobe dilanti di retonan grandi. Den colaboracion cu e Colegionan lo traha riba cumplimento di e normanan presupuestario, mehoracion di e maneho financiero y reformanan cu lo conduci na finansa publico sostenibel na termino largo.

Por download e Jaarverslag 2016 di CAft aki.

- Advertisement -

DUNA COMENTARIO

Please enter your comment!
Please enter your name here