Home Social RESPET: un balor fundamental pa organisacionnan

RESPET: un balor fundamental pa organisacionnan

21
0
SHARE
- Advertisement -

Un chispa di psicologia organisatorio

Drs. Marisol Krosendijk, sicologa

Parti I

Awe mi a dicidi di trata un balor cu ta fundamental pa e ambiente positivo den organisacionnan. Un cultura di trabao cu ta respetuoso, cortes y husto y cu ta balora diferencianan individual ta un componente clave di cualkier organisacion.

Un organisacion respetuoso ta un lugar unda empleadonan ta sinti safe, cu nan ta wordo trata husto, y por focus riba hasi nan trabao. Den un lugar di trabao respetuoso, comportacionnan ta refleha consideracion pa otronan y diversidad ta wordo balora.

Puntra cualkier hende na bo trabao ki trato nan ta desea mas di nan doñonan di trabou y coleganan. Sigur nan lo pone como top di e lista e deseo pa nan hefe y coleganan tratanan cu dignidad y respet.

Respet ta ora bo ta sinti admiracion y un respet profundo pa un individuo. Bo ta kere cu e persona ta bal bo atencion y admiracion pa motibo di e bon cualidadnan y capabilidadnan cu nan ta trese pa bo lugar di trabao.

Despues di sinti e respet y atencion, bo ta demonstra nan dor di actua di tal manera cu ta mustra bo ta consciente di bo coleganan como hendenan cu merece respet pa e ser humano cu nan ta. Manera tal, bo ta reconoce cu nan tin derechonan, opinionnan, deseonan, experiencia y competencia.

 

Empleadonan y respet

Bo por scucha respet den e tono di bos cu e ta usa, den nan comunicacion no verbal, y den e palabranan cu nan ta usa pa dirigi nan mes na bo.

Bo por huzga respet den e organisacion pa cual bo ta traha, dor di para keto na con bo hefe(nan) y colega(nan) ta tratabo. Bo ta mira con bo organisacion ta establece reglanan

nobo y con nan ta introduci proceduranan nobo na nan empleadonan, y den con nan ta reconoce y recompensa bo.

Bo por mira e grado di respet den con nan ta puntra bo opinion, con nan ta trese cambionan den bo situacion di trabao y con nan ta delega tareanan importante.

Pero kico ta respet en realidad? Y con respet ta wordo demostra na trabao?

 

Quiz: Mi lugar di trabao ta respetuoso?

Si bo ta desea di haya un bista mas concreto riba esaki mi ta invita boso pa hasi e siguiente quiz. Cuminsa pa pensa riba e hendenan cu bo ta traha cu ne. Considera e hendenan cu bo ta traha cu nan, e reglanan di e organisacion, con e reglanan aki ta wordo implementa, y e intercambionan diario entre coleganan. Mi ta duna un set di declaracion aki bou. Lesa cada un di nan y marka e opcion (a, b, c) cu mihor ta describi bo ambiente di trabao

.

Diversidad

  1. Mi lugar di traha ta diverso. E hendenan na trabao ta refleha locual nos sociedad ta.
  2. Tin diversidad na mi lugar di trabao, pero mi ta pensa cu tambe tin gruponan cu no ta wordo (bon) representa.
  3. Mi lugar di trabao no ta hopi diverso.

 

Oportunidad

  1. Tur trabou y oportunidadnan pa promocion ta wordo propaganda internamente y e proceduranan pa contrata of promove hende ta husto y consistente.
  2. Mayoria di trabao y oportunidadnan pa promocion ta wordo propaganda internamente y externamente, y practicanan di contrata of promove hende ta usualmente husto, pero tin lugar pa mehoracion.
  3. Na mi lugar di traha, e ta bay pa “ken bo conoce”. Practicanan di contracta y promove no ta husto.

 

Maneho

  1. Ta masha facil pa papia cu hendenan den maneho. Si bo hasi un fout of tin un problema, bo por bay serca nan pa ayudo y guia.
  2. E relacion entre maneho y empleado ta realmente bon pero tin espacio pa mehoracion. Empleadonan tin biaha no kier busca ayuda of guia.
  3. Empleadonan tin miedo di admiti ora nan a hasi un fout of mester di ayuda. E ta un ambiente di trabao hopi critico.

 

Relacionnan

  1. Mi coleganan ta amistoso y nan ta acepta diferencianan di cada persona. Tur hende ta wordo inclui den combersacionnan y actividadnan.
  2. Mi lugar di trabou ta cortes y e hendenan generalmente ta bay bon cu otro, pero tin cliquenan y tin algun trahadornan cu tine dificil pa adapta.
  3. Mi lugar di trabao no ta mucho amabel. Tin yen di redo y tension.

 

Cooperacion

  1. Mi lugar di trabao ta hopi coperativo. E hendenan ta dispuesto pa yuda na unda ta necesario.
  2. Na mi lugar di trabao hende ta yuda otro si mester, pero e lo ta great si tin mas cooperacion y trabao den team.
  3. Mayoria di hende na trabou no ta hasi nada cu no ta parti di nan descripcion di trabao.

 

Productividad

  1. Mi lugar di trabao ta hopi productivo. Tur hende ta enfoca riba hasi e trabao y hasie bon.
  2. Mi lugar di trabao ta rasonablemente productivo pero e por ta mihor. Hende tin biaha ta parce distrai y no enfoca riba e trabao.
  3. Mi lugar di trabao no ta hopi productivo. Hendenan ta gasta mas tempo riba discusion y reclamo enbes di traha y wak pa e trabao wordo hasi.

 

(Ta continua otro siman)

 

- Advertisement -

DUNA COMENTARIO

Please enter your comment!
Please enter your name here