Home Evenemento Ruben Blades ta bishita Aruba den su ultimo gira “Camindando, Adios y...

Ruben Blades ta bishita Aruba den su ultimo gira “Camindando, Adios y Gracias”

60
0
SHARE
- Advertisement -

15 di September e lo ta na Caribbean Sea Jazz festival

ORANJESTAD     (AAN):   Ruben Blades ta un compositor, cantante, musico y un abogado Panameño, y su estilo musical ta ser califica como Salsa Intelectual y el a ser nombra como:  E Poëta di Salsa.

E ta sin duda un di e miho cantantenan di Salsa di tur tempo. El a graba mas di 20 disco/ LP’s y CD’s y a participa como invitado den masha hopi grabacionnan cu diferente musiconan. El a ricibi 6 premio Grammy y el a forma parti di varios produccionnan cinematografico independiente y pa e gran industria di Hollywood.

Ruben Blades Bellido de Luna a nace dia 16 di juli di aña 1948 den e barrio di San Felipe den un famia unda cu arte tabata tin semper un lugar privilegia. Cu 26 aña di edad na aña 1974, el a gradua como abogado na e Facultad di Derecho y Sciencia Politico na e Universidad di Panama y el a termina su studio na e Facultad di Derecho na Universidad di Harvard. Pero su gusto pa musica tawata tin’e aleha di Ley y e mundo di Husticia.

Mey mey di e temporada di dictadura Panameño, Ruben Blades y su famia a emigra pa Miami y mas despues el a biaha pa New York buscando horizontenan nobo pa su musica. T’asina cu mientras e tawata traha pa e compania discografico Fania Records el a haya e oportunidad pa sustitui e cantante estelar di e orkesta di Ray Barreto.

E tawata tin varios presentacionnan grandi den e bandanan di Richi Ray, Pete “Conde “Rodriguez, Ray Barreto y Bobby Cruz. Na aña 1976 Ruben Blades a keda como cantante permanente den e orkesta di Willie Colon.  Y asina a cuminsa loke lo bira e gran cambio den e musica Caribeño.

Criticonan di Salsa ta marca e album “Siembra” cu a ser lansa na aña 1978 cu ta inclui e exito clasico “Pedro Navaja”, como e genero musical di prome y despues di salsa. E comentario aki a surgi na e momento cu e genero musical aki a sali for di e bario y ta cambia y yega te na e salannan di baile, cu ainda actualmente ta e disco/CD den e genero aki cu mas a bende den henter historia. E lema aki a habri caminda pa e genero musical Salsa, na un mundo cu te cu e momentonan ey tawata lomba p’e y no tawata dun’e su balor.

Despues di a forma parti pa varios aña den e orkesta di Willie Colon, Ruben Blades ta dicidi cu e kier bai riba su mes y forma su propio grupo “Son del Solar”.

Otro gran exito lo yega na aña 1980 cu “Maestra Vida” , e prome Opera Salsa  den cual Ruben Blades ta canta na e Bario, na e Hende Muhe,  na e Gobiernonan di Latino America y na Amor. Riba su Album “Plastico” Blades a insisti con cu e lenguahe cu e ta uza den su cancionnan ta intenta  pa encurasha Latino-America ta nan mes  ta alerta y lanta riba pa cumpli cu e soño di Siman Bolivar.

Durante e añanan 1983, 1984 y 1987 e seyo discografico Fania a publica “El que la hace la Paga”, “Mucho Mejor”, y “Doble Filo”. Na aña 1990 Son del Solar a graba su despedida desde e “ Lonestar Roadhouse”  na New York, marcando  asina e fin di un etapa  di expansion di Salsa. Na aña 1997 Blades a colabora cu e banda di rock y ska Argentina “Los Fabulosos Cadillacs ”  pa su Album “Fabulosos Calavera”.

Ruben Blades e actor a actua den varios pelicula y programanan di television, en general den rolnan secundario. e cinenan cu el a participa ta figura Crossover Dreams” na aña 1985, “Homeboy” na aña 1988, “The Lemon Sisters” na aña 1990, y “Color of Night” na aña 1994.

   Aña pasa Ruben Blades a admiti cu su actual gira “Caminando, Adios y Gracias”, lo ta e ultimo den su carera. Den su ultimo gira e la bishita Puerto Rico, Panama, Chile, Peru Spaña y dia 15 di September e lo ta na Caribbean Sea Jazz festival na Aruba pa asina bisa “danki” y “ayo” na tur su fanaticonan.

- Advertisement -

DUNA COMENTARIO

Please enter your comment!
Please enter your name here