Home Economia SDG ta yuda eleva mas ainda e desaroyo sostenibel na Aruba

SDG ta yuda eleva mas ainda e desaroyo sostenibel na Aruba

81
0
SHARE
- Advertisement -

Jocelyne Croes, di Comision Nacional pa Metanan Mundial di UN

ORANJESTAD (AAN) – Jocelyne Croes, di comision organisado di “United Nations Sustainable Development Goals Planning Mission”, ta hopi satisfecho con e evento ta bayendo. Participantenan di organisacionnan local a yuda crea un ‘roadmap’ pa asina Aruba por yega na e Metanan Mundial pa un Desaroyo Sostenibel (SDG’s) mas lihe y efectivamente cu ta posibel, cu accionnan realistico y innovativo.

Croes, president di e Comision Nacional pa Metanan Mundial di Nacionnan Uni, a splica cu pa casi un aña nan a bin ta trahando di serca cu Nacionnan Uni pa mira con e organisacion mundial por yuda Aruba implementa e SDG-nan (Sustainable Development Goals di UN). “E ta duna nos e oportunidad pa mira con nos por eleva mas ainda e desaroyo sostenibel na Aruba, crea un pensamento cu ta cuadra cu sostenibilidad, y ki actividad y programanan ta bay bini cune.”

E participacion di UN ta pa yuda Gobierno di Aruba crea e mapa pa Aruba cana y yega na e 17 metanan acepta pa nacionnan mundialmente. Ta studia durante e siman di reunion aki cua ta e areanan cu mester mehora pa cumpli cu e metanan mundial pa 2030. Pa cumpli cu esaki tabata importante cu organisacionnan local, gubernamental y no-gubernamental (NGO’s), participa y yuda crea e MAPA di Aruba. “Nos tin bon participacion di localnan. Nos a invita sector priva, NGO-nan y departamentonan di Gobierno. Nan a participa hopi bon y a duna bon contribucion te cu awor riba locual nan ta haya cu por yuda Aruba yega na un forma di traha mas sostenibel.”

Na mesun momento sra. Jocelyne Croes a informa cu e sesion cu mester a tuma luga awe (diahuebs) anochi cuminsando 6 or di atardi na Renaissance, a wordo cambia pa diabierna, di 9 or pa 11 or di mainta na Renaissance Convention Center.

E sesion di diaranson a wordo parti den grupo di discusion riba temanan manera: economia, social y medio ambiente. E grupo cu a trata sector social sostenibel tabata esun cu a haya mas acogida. Por a nota presencia tambe di Parlamentarionan Donny Rasmijn, Chris Dammers, Lorna Varlack, y Jennfer Arends-Reyes.

E delegacion di Nacionnan Uni, cu ta consisti di 6 persona ta encabesa pa Marcel Alers, un experto den energia alternativo, kende a splica cu nan presencia ta pa yuda Aruba den implementacion di e agenda SDG na Aruba. Aruba, el a bisa, a haci un compromiso pa cumpli cu e meta den e periodo acorda, esta pa 2030. E dia di ayera tabata uno durante cual a tene consulta cu stakeholdernan di e comunidad local. Pa loke ta e sesion di consulta, el a bisa cu tur e gruponan cu nan ta haya necesario pa ta presente pa duna un contribucion, a forma parti di e reunionnan. E reaccion di e organisacionnan local el a haya cu tabata hopi positivo, cu hopi interaccion, cu sosten di e expertonan di Nacionnan Uni.

- Advertisement -

DUNA COMENTARIO

Please enter your comment!
Please enter your name here