Home Enseñanza SKOA lo mester pone extra klas den dos Kleuterschool e siguiente aña...

SKOA lo mester pone extra klas den dos Kleuterschool e siguiente aña escolar

201
0
SHARE
- Advertisement -

ORANJESTAD (AAN) – Jossete Daal, directora di SKOA, den entrevista cu Matutino DIARIO a elabora tocante e cantidad di alumnonan pa klas na scolnan catolico, cu for di dos aña pasa caba a cuminza crece.

Señora Daal a cuminza referi na e caso di Kleuterschoolnan. Aki e mucha ta drenta cu cuater aña di edad y SKOA tin añanan caba cu a tene e klas na 27 alumno mescos cu Eerste Klas.

E ultimo tres añanan aki, sra. Daal a splica, no por a wante mas y klasnan a bira di 30. El a referi na un ehemplo den pasado, di Aurora Kleuterschool na Tanki Leendert, cu no ta yena e prome siman, pero esaki a sosode poco, poco y nan tabata avisa cu pa October e scol ta yen.

“Pero aworaki nos a haci inscripcion y tur nos scolnan ta yen. E ta incredible! Y mi ta papiando di 28 pa 30 mucha den un klas. Nos tur awendia sa cu 25 alumno ya ta hopi, pero mas cu 25 pa un klas un un maestro, ta hopi dificil. E ta hopi, hopi dificil pasobra cada un mucha ta exigi di mas atencion cu antes. Cu antes mi kiermen cuarenta aña pasa, unda e pensamento, educacion na cas, y comunidad tabata diferente”, sra. Daal a subraya.

E dama a agrega cu na e momentonan aki nan ta preocupa y mas ainda cu e muchanan di 6de klas di scolnan catolico cu ta bay drenta MAVO, nan no tin lugar pa carga tur.

“Pues, e ta un preocupacion. Esaki ta e periodo cu nos ta cuminza prepara pa e aña escolar nobo, y nos ta sinta akinan kibra cabes con nos ta bay ubica tur e muchanan aki”, sra. Jossete Daal a menciona.

El a agrega cu no ta solamente scolnan di SKOA, sino tur scol di Aruba. Kiermen e fluho di muchanan cu mester drenta scol a bira hopi mas halto y e ta haya cu mester tin un solucion a corto plazo.

Sra. Daal no ta partidario di habri extra klas den un scol, pero nan ta bay haya obliga di haci esaki den dos Kleuterschool. “Mi ta spera di haya e maestro pa para aden, pasobra nos tin un scarcedad di maestro tambe” el a agrega.

El a menciona cu ta dificil pa den un klas grandi, duna tur mucha atencion, pasobra e muchanan di awendia ta exigi otro tipo di atencion na scol.

Un maestro ta un hende cu mester bay traha diez luna cu e alumnonan; cada un cu nan pakete. “E ta pisa, e no ta facil. Un solucion cu nos ta wak ta pone un asistente den e klas: e pregunta ta, si tin suficiente asistente pa pone den un klas, of ban bisa, pa pone den un scol”, sra. Daal a señala. Esaki ta un solucion na corto plazo y esaki ta bira un reto pa e aña escolar cu ta bin, sigur.

- Advertisement -

DUNA COMENTARIO

Please enter your comment!
Please enter your name here