Home Hudicial Tres aña di prison exigi pa empleado cu a hinca un superior...

Tres aña di prison exigi pa empleado cu a hinca un superior dama 4 pa 5 biaha cu cuchiu

546
0
SHARE
— Fiscal a exigi 3, pero Hues a dune 1 aña.
- Advertisement -

 

ORANJESTAD (AAN):  E homber di inicial O.T. di 33 aña di edad, a admiti di a hinca un superior dama pero su intension no tabata pa mata.

El a bisa cu el a perde cabez ora cu e dama a bis’e cu e ta worde kita for di e fast-food restaurant conoci. Fiscal a tene cuenta cu relato di psycologo cu ta mustra cu O.T. ta sufri di problema mental. El a exigi 4 aña di prison di cual 1 aña ta condicional.

E acusacion cu Fiscal a presenta contra O.T. ta cu riba 10 Januari 2017, den e fast-food restaurant unda e tabata traha, el a hinca e dama J. diferente biaha cu un cuchiu na su man robez y schouder. Fiscal ta considera esaki un intento di mata y subsidario maltrato cu arma.

Ta asina cu O.T. a admiti. E tabata traha na Burger King na Playa y ora el a worde informa cu e ta worde kita y el a sinti cu a haci cherche di dje door cu otronan hari, el a perde cabez pasa man pa cuchiu.

El a bisa Hues cu e tabata pensa con e lo bay haci pa mantene su dos yiunan. El a bisa cu door di stress el a haci loke el a haci pero su intension no tabata pa mata. Den su rabia el a actua. El a bisa Hues cu e ta realisa cu loke el a haci ta malo.

HINCAMENTO:

Hues a bisa cu na Polis O.T. a bisa cu el a hinca J. 4 pa 5 biaha cu e cuchiu di mas o menos 25 cm largo. El a bisa cu e cherchamento a pone actua asina. Hues cu potretnan di e heridanan cu O.T. a ocasiona na e dama den man, a puntra O.T. con el a hinca. O.T. a mustra con el a zwaai su man.

Hues a mustra cu e raport medico ta indica e heridanan cu e dama J. a sufri. Hues a bisa cu tin colega a bisa cu O.T. a expresa cu e lo mata. O.T. a bisa Hues cu no ta berdad.

Fiscal a puntra Hues si no a mira e imagennan di video di seguridad. Hues a bisa cu e no por a pasa esaki riba computer. Abogado a bisa cu e no a haya video.

Fiscal a lamenta esaki. El a bisa Hues cu si por a mira e video, e imagennan ta hopi fuerte caminda por mira con agresivo O.T. tabata atctua cu e cuchiu.

Usa marihuana: Hues a bisa cu tin raport di Reclasering caminda a constata cu O.T. ta usa marihuana. Segun O.T. e ta usa marihuana ora e ta na cas pa relaha. O.T. a bisa cu e ta dispuesto pa haya tratamento di psycologo. Hues a puntra O.T. con e combersacionnan ta bayendo cu psycologo. El a splica Hues cu el a conta psycologo tur e cosnan cu el a pasa aden.

PROBLEMA MENTAL:

Hues a mustra cu psycologo ta haya cu O.T. ta sufri tin un tipo di paranoide. O.T. a bisa Hues cu e no ta kere esey. E ta haya cu e ta hopi saludabel. Hues a mustra cu segun psycologo, O.T. tin problema pa atende cu asuntonan. E ta bira hopi agresivo.

E ta kere cu O.T. ta un poco no responsabel pa su actonan.

Hues a mustra cu den pasado O.T. a worde condena na boet di 300 Florin pa maltrato. O.T. a splica cu e tempo ey e tabata traha na un hotel y a worde acusa di posecion di droga y el a bira agresivo. Hues a remarca cu ta e mesun situacion cu pa cual O.T. ta den Corte.

EXIGENCIA DI FISCAL:

Fiscal a bisa cu a keda legalmente proba e promer acusacion esta intento mata. Tin denuncia di e dama J. y tin declaracion di e coleganan cu tabata den e lugar e momento ey. Fiscal a bisa cu O.T. ta admiti di a ataca J. cu cuchiu pero no tabata su intension pa mata.

Sinembargo si lesa declaracion di e testigonan, O.T. tabata bati y skop na porta. El a bisa cu un di e empleadonan a coy un coy sushi di metal y tira riba O.T. pa asina e dama y e empleado mes a bay sconde den oficina.

Fiscal a mustra cu O.T. tambe a expresa cu e lo mata nan. Na opinion di Fiscal, por bien ta cu awor O.T. ta bisa cu e no tabatin intension di mata, pero e imagennan di video ta mustra claramente con violento y agresivo el a actua.

Fiscal a bisa Hues cu danki Dios cu e heridanan no tabata grave. Segun Fiscal, experencia ta mustra cu victima di algo asina ta keda pa hopi tempo traumatiza. Psycologo ta bisa cu por ta door di problema O.T. ta cierto grado no responsabel pa su actonan. Psycologo ta teme cu O.T. lo por haci mesun cos.

Castigo exigi: Fiscal a tene cuenta cu e raport di psycologo y a exigi 4 aña di prison di cual 1 aña ta condicional y cu O.T. mester cay bou guia di Reclasering. Esaki durante e period di prueba cu ta 2 aña. Esey ta encera cu si O.T. mester di tratamento di psycologo y psychiater e mester haci esaki.

DEFENSA ABOGADO:

Abogado mr. Edwards a pidi Hues pa tene cuenta cu e estado mental di O.T. E abogado a bisa cu O.T. ta hopi areprenti di loke a sosode. El a pidi Hues pa tene cuenta cu esaki den e castigo. E ta haya cu O.T. mester di ayudo y guia. El a bisa Hues cu O.T. ta esun cu ta mantene su famia.

Hues a sera tratamento di e caso y a bisa cu 26 Mei 2017 lo tin sentencia.

 

- Advertisement -

DUNA COMENTARIO

Please enter your comment!
Please enter your name here