Home Enseñanza U.A a introduci aña pasa e asina yama “Academic Foundation Year”

U.A a introduci aña pasa e asina yama “Academic Foundation Year”

24
0
SHARE
- Advertisement -

Pa mehora e habilidadnan di studiantenan:

ORANJESTAD (AAN) – Rector di Universidad di Aruba mr. Glenn Thode ta di acuerdo cu tin hopi estudio, di cual nos tin necesidad pa e tipo di trabao cu nos mercado laboral ta ofrece, Universidad di Aruba cuminza duna, sea e programa educativo completo of parcial.

Rector mr. Thode a señala cu ya caba den pasado, U.A a desaroya un plataforma di intercambio cu si ta studia na Aruba mes e studiantenan por intercambia internacionalmente, di manera cu nan por haya un tiki experiencia pafo di nos pais y wak con studia afo ta, ademas di haya un experiencia nobo unda cu por haya diferente perspectiva, si bishita un otro Universidad.

No obstante, mr. Thode a constata cu no solamente nos studiantenan na U.A sino esnan cu ta bin di afo tambe, tin un cantidad basta halto cu tin dificultad pa bira hopi exitoso mesora, den e atmosfera academico cu U.A ta ofrece y ta rekeri tambe di nan.

Pa e motibo ey, aña pasa a establece un programa cu yama “Academic Foundation Year” cu a draai e aña aki prome biaha cual ta duna un certificado na final. Esaki no ta un opleiding pa haya diploma, pero e tin cuater pilar y e meta ta pa esun cu logra e certificado aki tin un mihor fundeshi den competencia, conocemento y habilidadnan, como tambe e actitud cu ta wordo rekeri na Universidad, di manera cu nan ta bon prepara sea cu nan ta studia na U.A mes of afo.

Universidad tin e intencion pa reforza esaki pasobra nan ta mira cu tin studiantenan cu ta bin un tiki debil cu esaki. Rector mr. Thode a indica cu hopi di e studiantenan cu ta cay afo ta pasobra nan no a scoge algo cu ta fit cu nan estudio superior. E mes a pasa den esey ora el a bay studia afo te cu el a ripara cu e estudio cu el a scoge no tabata algo pe, y el a dicidi pa bolbe Aruba, el a traha cant’i beach y danki Dios ora cu Universidad di Aruba a habri el a haya otro oportunidad pa studia y el a caba su etudio di Ley y gradua.

El a expresa cu ta tuma un tempo di fracaso tambe prome cu descubri ki estudio ta pas cu bo. Loke U.A kier haci ta purba die vita cu e studiante tin cu bay afo pa wak kico ta fit of no cune, y e programa Academic Foundation Year ta duna e oportunidad pa e studiantenan purba diferente disciplina. Tin diferente experiencia academico hinca den e programa pa e studiantenan por wak si kizas tecnologia ta algo pa nan of no, si Derecho ta pa nan of no, si bay den direccion di negoshi ta fit mihor cu nan of no, y asina ta duna nan diferente oportunidad pa nan sinti diferente experiencia y pa ora nan scoge e programa di estudio superior cu nan kier sigui den dje, esaki ta loke nan kier. Un di e aspectonan importante ta nan habilidadnan pa idioma, y nan ta haci enfasis riba esaki tambe.

Rector di Universidad a subraya cu nan ta ripara cu e studiantenan cu ta bay Merca ta mas exitoso y mitad di programanan di U.A ta na Ingles, y nan ta nota cu hopi di e studiantenan di Aruba mes tin preferencia pa Ingles.

E programa Academic Foundation Year ta parcialmente na Ingles y parcialmente na Hulandes, pa asina e persona sinti den cual tin mas habilidad, pero tambe pa reforza tur dos idioma. Rector mr. Thode ta kere cu e idioma no ta tanto e problema riba su mes, sino e habilidad pa comunica den un idioma. Aunke ainda mester evalua e resultado di e programa di aña pasa, e docentenan di U.A a ripara cu nan mester reforza mas e parti di comunica y, conceptualiza den un of otro idioma.

 

 

 

 

 

- Advertisement -

DUNA COMENTARIO

Please enter your comment!
Please enter your name here