Home Enseñanza Un solucion pa alumnonan nobo di MAVO lo por ta ubica nan...

Un solucion pa alumnonan nobo di MAVO lo por ta ubica nan den scolnan na San Nicolas

36
0
SHARE
- Advertisement -

ORANJESTAD (AAN) – Encuanto crecemento di cantidad di alumnonan na scolnan local, tin un excepcion cu ta e Distrito di San Nicolas, unda mas bien scolnan ta basta bashi.

Puntrando riba e hecho aki na directora di SKOA,  Jossete Daal, el a menciona cu berdad San Nicolas ta basta trankil, pasobra e refineria pa basta aña a keda sin funciona, e scolnan eynan a keda bashi pasobra e mayornan a move bay den direccion di hotel unda nan a haya trabao, y esey a trece cune cu e scolnan den e distrito aki a bira mas chikito.

E reto ta cu si referi un mucha di MAVO na un scol di San Nicolas mayornan tin problema pa acepta esey, pasobra e mucha tin diesdos aña, e mester subi un bus bay aya, y nos den nos pais, no ta custumbra cu cosnan asina, segun director di SKOA.

“Pero pa nos di SKOA e ta un posible solucion, pa nos opvang tur mucha y garantiza cu nan tin enseñanza y cu por ofrece nan e scolnan MAVO cu SKOA tin na San Nicolas” e dama a remarca.

Riba esey SKOA ta bezig aworaki pa wak ki tipo di solucion nan por bin cune, y ki opcion por ofrece e mayor p’e ta trankil ora su yiu drenta scol nobo e aña escolar venidero.

Antes tabata tin mas demanda di scol na Noord, despues Oranjestad y aworaki Paradera tambe. Asina por mira cu poco, poco e barionan ta cuminza yena.

“Santa Cruz por ainda, nos tin basta scol den e distrito aki, pero si coy e muchanan cu mester drenta MAVO e ta yen caba. Nos no por tuma mucha di otro bario den e MAVO Scol di Santa Cruz, pasobra e scolnan di bario mes a yena e MAVO y HAVO”, sra. Daal a splica.

E dama a agrega cu den diferente ocasion cu SKOA a reuni cu Minister di Enseñanza, nan a señala e asunto aki, pues e situacion ta conoci y mester wak con a corto y medio plazo ta bay maneha e problema aki pa ofrece e muchanan cu ta den nos pais, enseñanza di calidad.

Sra. Daal a expresa cu aworaki nan ta “struggle” pasobra no tin suficiente cupo pa ofrece muchanan enseñanza y tampoco tin suficiente maestro pa yena e cupo y duna e muchanan enseñanza.

E ley di enseñanza ta bieu y e ta bisa cu tur mucha mester bay den un klas, pero e ley aki no ta factible mas, reiterando cu cada un mucha awendia ta rekeri otro tipo di atencion.

Y si haci e grupo pa e maestro di scol grandi, e ta pone hopi presion riba e maestro di scol pa e duna les optimal. E maestro tambe ta un hende, y e ora ey bo ta crea frustracionnan sea den scol of frustracion di e mayor, pasobra tin demasiado presion e ora ey, mientras cu e expectativanan ta hopi halto. No por pone un maestro di scol den un situacion asina aki, sra. Daal a subraya.

Pues, e ta un reto cu Pais Aruba mester bay pensa riba dje, con ta bay maneha esaki.

Sra. Daal ta corda cu na finalnan di decada 90 a presenta un fluho di alumno asina aki caba, y e e tempo ey a soluciona e problema cu trailernan, pero tabata tin suficiente maestro tambe. Anto e gruponan di studiante per klas no tabata di e grandi ey.

“Trailers no ta e mihor solucion esey nos a siña berdad, pero e ta un solucion na corto plazo. Pues Pais Aruba mester pensa con nan ta bay hacie e ora ey. Actualmente nos tin un scarcedad di maestro y SKOA ainda ta traha cu pensionadonan jong cu ta duna nan aporte ainda, locual ta bon pasobra nan tin experiencia, pero e ta un reto pa nos pais”, sra. Daal a conclui.

- Advertisement -

DUNA COMENTARIO

Please enter your comment!
Please enter your name here