Home Politica 2500 empleado publico di mas ta crea un debe pa gobierno di...

2500 empleado publico di mas ta crea un debe pa gobierno di 250 miyon florin extra

579
0
SHARE
- Advertisement -

Armand Hessels di Fundacion Gobernacion di Calidad:

ORANJESTAD (AAN):  Armand Hessels, di Fundacion Gobernacion di Calidad, a expresa den entrevista cu Matutino DIARIO, a duna su opinion tocante cual mester ta e meta principal di e partidonan politico cu lo bay eleccion na September venidero.

Na prome lugar nan tin cu identifica e fayanan cu tin y drecha esakinan, y un punto crucial baha e gastonan crea door di pago na empleadonan publico.

El a cuestiona cu sector publico tin un excedente di 2500 empleado cu ta costa caha di gobierno 250 miyon florin annual, cu ta wordo paga via prestamo y mas prestamo.

Hessels a señala cu mayoria di partidonan politico ta papia tocante kico nan ta bay haci durante gobernacion y ta bin cu proyecto.

Tin di nan ta bisa cu nan ta bay baha edad di pension. Wel, puro coi loco, pasobra esey a sosode un decada pasa cu nan kier a lembe e electorado pa haya voto, y el a resulta hopi fatal pa henter e fondo di pension.

Otronan a bin cu e plan di aumenta e pension pa e pensionadonan y esey a crea e bancarota den e fondo di pension (di ambtenaar) y pesey tambe mester a aumenta e edad di pension.

“E tipo di promesanan asina di partidonan politico pa haya voto ta fatal pa e desaroyo di Aruba. Ta hopi importante pa wak cual ta e fayonan cu tin y drecha nan prome y esey ta algo den locual tur partido politico ta faya. Nan no ta menciona kico ta e problemanan principal, nan no ta menciona e fayonan pero ta djis bin cu proyectonan bunita, cu nan sa awor, en todo caso, cu no tin placa pa ehecuta nan”, sr. Hessels a subraya.

E ehemplo cu sr. Hessels ta kere ta mas relevante ta e problema di personal di gobierno.

“Tur rapport cu a sali for di inicio di Status Aparte, sea di Conseho Consultativo y Contraloria General, y ultimamente di CAFT, Banco Central y IMF, nan ta bisa cu tanten cu sector publico di Aruba tin asina hopi personal, bo problema financiero no por wordo soluciona”, sr. Hessels a trece dilanti.

Hessels a acentua cu nos por mira cu nan tin razon. “Continuamente, nos ta den un problema financiero pasobra asina hopi placa ta comprometi pa gasto di personal, cu ta gewoon di mas. Mi a yega di duna un indicacion di e cantidad cu ta di mas: compara cu Curacao nos tin un cantidad di 2500 hende di mas, locual ta duna un gasto innecesario di pa Aruba di 250 miyon florin, tur aña”, Hessels a subraya.

Y ademas ta asina cu no tin e placa pa paga e suma aki continuamente. Y con ta pague? “Door di haci prestamo. Wel, ta un prestamo cu simplemente bo por cubri e siguiente aña solamente cu otro prestamo, y asina nos ta bay di malo pa peor. Tanten cu no tin solucion p’esey y tanten cu no tin solucion pa otro tipo di problema cu tin, cu tur hende sa cu tey, nos no ta bay mehora nos situacion financiero, nos no por ehecuta proyecto cu nan ta priminti pueblo, anto e ora ey nan ta gaña pueblo y nan ta gaña nan mes”, sr. Hessels a conclui.

 

- Advertisement -

DUNA COMENTARIO

Please enter your comment!
Please enter your name here