Home Hudicial Abogado a cuestiona investigacion ilegal di Polis y Hues a dune razon...

Abogado a cuestiona investigacion ilegal di Polis y Hues a dune razon y acusado a sali liber

1377
1
SHARE
- Advertisement -

ORANJESTAD (AAN): Mientras cu Fiscal a exigi 18 luna di prison, abogado mr. Faarup a cuestiona cu e investigacion di Polis tabata ilegal. Hues a bay pensa un rato y despues a bisa cu e ta haya cu berdad Polis a haci malo den e investigacion. Esey ta haci cu Polis a haya e pruebanan na forma ilegal. Hues a declara e hoben C.M. di 18 aña liber pa e acusacionnan di posecion di dos arma cu balanan y tambe droga.

    ACUSACIONNAN:

Diabierna mainta e homber C.M. a presenta dilanti Hues caminda Fiscal a acusa C.M. cu entre 17 Januari 2017 y 17 Februari 2017, e tabatin dos arma di candela y balanan cun’e. Tambe e ta wordo acusa cu dia 1 October 2014, el a maltrata un hoben.

    ARMA Y DROGA:

Hues a bisa cu Polis a mira C.M. ta cana cu dos tas. Nan a ripara cu C.M. tabata actua sospechoso. Na cierto momento nan a mira cu C.M. a bay den un cas y sali cu un tas so. Polis a bay listra y a haya droganan y armanan di candela. Hues a puntra C.M. pakico e tabatin arma. C.M. a splica cu el a cumpra nan pasobra hende busca problema cu su famia.

    MALTRATO:

Hues a puntra C.M. pakico el a dal e hoben. Segun C.M. pa tempo largo J. tabata busca problema. C.M. a da’le un mokete y mande leu. Ambulance a bay hiba e victima rumbo Hospital.

Hues a mustra cu C.M. no tin condena riba su carchi di castigo. Hues a puntra si C.M. sali si e ta bay busca arma atrobe. C.M. a bisa cu e no ta bay usa arma mas. E kier traha. Hues a puntr’e si e ta den gang. Segun C.M. e no ta anda den gang. E ta su mes.

    MENAZA DEN KIA:

Hues a mustra cu segun mama di C.M., su yiu a wordo menaza cu morto den KIA. C.M. a admiti cu ta berdad pero e no tin miedo mas. Segun C.M. den KIA ta un forma di biba tin.

Hues a puntr’e si e ta usa droga ainda y C.M. a bisa cu si. Ta asina cu desde su 13 aña e ta usando marihuana. Reclasering ta mustra cu C.M. tin un yiu.

    INVESTIGACION ILEGAL:

Riba peticion di abogado, C.M. a splica cu el a wordo deteni pa Polis, geboei y poni abao.  Aki el a revela cu despues nan a bay drenta su cas sin puntr’e permiso.

   EXIGENCIA DI FISCAL:

Fiscal ta haya legalmente proba e maltrato y posecion di armanan y droga. Fiscal a bisa Hues cu Corte Supremo a mustra cu si no tin motivacion valido pa kita pruebanan pasobra a drenta den cas sin permiso. E unico cos cu por haci ta papia di violacion di norma. El a bisa Hues cu posecion di arma ta sumamente peligroso. Hende ta usa arma pa haci asalto, tira riba hende.

Fiscal a bisa cu e ta tene cuenta cu ta promer biaha cu C.M. ta cay sera y tambe cu awor e ta tata, e kier cambia su bida. El a mustra tambe cu Reclasering a avisa pa tin observacion riba C.M.

Fiscal a exigi pa usa e Ley Hubenil pa e caso di maltrato pasobra e tempo ey C.M. tabatin 16 aña. El a exigi 2 luna condicional y bou guia di Reclasering. Pa e arma y droga, Fiscal a exigi 18 luna di prison y pa destrui e droganan y armanan cu bala.

    ABOGADO:

Abogado mr. Faarup a bisa cu C.M. a admiti di a dal e hoben. E tempo ey e tabatin 16 aña. Pa e caso di posecion di arma y droga e tabatin 18 aña. El a pidi Hues pa aplica e ley hubenil pa tur dos caso.

   Investigacion ilegal: E abogado a bisa Hues cu ora el a papia cu C.M. con cos a pasa, el a wordo deteni pa flex team. For di procesverbaal di Polis, nan ta bisa cu nan a papia cu C.M. y a pidi permiso. Sinembargo, C.M., a splica cu el a bay sera porta di cas na yabi y a wordo deteni un rato despues. El a wordo geboei y poni riba tera.

E abogado a señala cu tur esaki no ta para riba raport di Polis. E abogado a bisa Hues cu ningun momento el a duna permiso pa drenta e cas. Mr. Faarup a bisa Hues cu e ta haya cu aki Polis a faya den norma pasobra a drenta e cas sin permiso.

Na opinion di e abogado, e hecho cu a mira C.M. sin un tas mas, no ta suficiente motibo pa bisa cu ta bay haci investigacion. E ta haya cu flex team no a actua corecto manera normalmente Polis cu experencia ta haci.

E abogado ta haya cu door di violacion di norma, mester duna sancion. El a mustra tambe cu C.M. tabata den posecion pasivo pasobra e no tabatin e arma cun’e. Na opinion di abogado, KIA no ta un bon lugar pa C.M.

El a pidi Hues pa duna un castigo pa pronto C.M. lo por haya libertad. El a bisa Hues cu C.M. kier cambia su bida y ta dispuesto cay bou guia di Reclasering. E abogado ta kere cu mester duna C.M. un chens pa e demostra cu di berdad e kier cambia su bida y no lo presenta mas den Corte. E abogado ta kere cu un castigo combina lo ta bon pa asina pone presion riba C.M. pa e keda riba e bon caminda.

    SENTENCIA:

Hues a sera tratamento di e caso y a bay pensa un rato pa despues dicta sentencia. Hues a bisa cu e ta haya legalmente proba maltrato di e hoben. Hues a confirma exigencia di Fiscal y a usa e castigo hubenil. El a condena C.M. na 2 luna condicional y bou guia di Reclasering.

   Polis a faya: Pa e di dos caso, Hues ta haya cu e comportacion di C.M. tabata sospechoso pasobra e tabata cana cu dos tas y despues 1 tas. Sinembargo, esey ta masha poco pa bay haci investigacion. E hecho cu a bay drenta e cas y a bay habri tas, Hues ta haya cu a bay mucho leu. Hues ta haya cu aki Polis a viola privacidad di C.M.

Hues a mustra cu e hecho cu a haya e armanan y balanan, ta un delito pa proteha comunidad di dje. Sinembargo Hues ta haya cu e investigacion ta inhusto y mester exclui e pruebanan for di e caso.

Hues a sigui bisa cu no por usa C.M. su mesun admission como prueba y pesey ta declar’e liber. Hues a ordena cu e armanan, balanan y droga si lo wordo saca for di circulacion.

El a duna orden pa libertad di biaha. Hues a conseha C.M. pa e keda leu di arma y droga y bay dedica na su yiu. Hues a adverti cu mester corda cu Fiscal por apela e sentencia.

- Advertisement -

1 COMMENT

  1. Ta pa e motibonan aki no tin husticia na e luga di co•• aki! Boso mes ta wak con e •••• slap di hueznan na Aruba ta laga tur e burdugunan liber. Anto despues kier keha cu tin tanto ladronicia, atraco, etc. F•••ing pen•••nan!

DUNA COMENTARIO

Please enter your comment!
Please enter your name here