Home Politica Algun politico a sobresali grandemente den prome Debate Politico

Algun politico a sobresali grandemente den prome Debate Politico

673
0
SHARE
- Advertisement -

ORANJESTAD (AAN): Diahuebs anochi cu algun minuut di retrazo, e prome Debate Politico di Camara di Comercio a cuminza den Marriott Aruba Grand Ballroom, transmiti en vivo via Telearuba.

For di comienzo, por a mira cu e formato lo bay ta diferente di tur debate cu tur hende conoce.  El a bira un sesion di pregunta y contesta, y no ta tur lider politico tabata simultaneamente riba escenario.  E tan spera “debate real” entre e politiconan a keda no-existente.

Na comienzo e preguntanan tabata casi nada nobo, cu excepcion esun di e importacion paralelo y ilegal di productonan pa e.o. haci cirugia y tambe botox.  Cada lider a haya 90 seconde pa duna contesta, y el a demostra di ta un timeframe demasiado cortico, incluyendo e miserable 30 seconde pa duna reaccion na final di cada fase.

E sesion a medio converti su mes den un berdadero debate, den e ultimo parti, ora cu a cuminza usa preguntanan di publico manda via Facebook of email.  Aki por a nota cu cada politico a cuminza los nan curpa mas, y e atakenan a aparece den forma indirecto.

E topico di Dump ta uno cu a haya hopi atencion, y e topico a keda pega den e ultimo ronda unda politiconan a contesta pregunta di publico.  E reaccion di cada uno a mustra cu politiconan sa cu e ta un topico importante, y ta increible pa kere cu den siglo 21, ainda e problema di sushi no a keda resolvi.

Tin hende cu a lamenta cu no a papia nada di e abusonan contra menor cu ta pasa cada siman na Aruba.  Pero a enfoca hopi riba Parkietenbos y tambe asunto di legaliza Cannabis.  Y pa sorpresa di tur hende, tur politico ta “pro” pa introduci cannabis medicinal, pero tin diferencia di opinion pa cannabis pa uso recreacional.

For di prome reacion, por a nota cu ta hopi hoben “first-time voters” a mira e Debate via TV, y e comentarionan cu nan a duna ta cu nan a keda impresiona cu e.o. loke tanto Ricardo Croes (RED) y tambe Benny Nisbet (PPA) a trece dilanti.  Croes a cuminza basta bon na comienzo, y despues tabata comosifuera el a haya mas air-time cu e otronan.

E prome presentacion di Holmo Henriquez (MAS) den un debate politico, a laga hende cu un impresion inicial di tiki nerviosismo, pero e ta contesta hopi rapido.  Varios persona ta comenta cu Evelyn Wever-Croes (MEP) a duna un bon presentacion, igualmente tin bon palabra encuanto Mike Eman (AVP) cu a duna posicionnan concreto y bon formula.  Tambe Otmar Oduber (POR) a sa di comunica perfecto cu su publico, y splica encuanto su logronan como Ministro, y kico plannan ta pa gobernacion nobo.  Booshi Wever (UPP) a papia extenso riba su ‘cuki’, esta e asunto di Dump na Parkietenbos.

Algo ta sigur, tabatin tog na varios ocasion hopi puntamento di dede riba otro, sin ofrece solucion concreto.

Na final, e cuatro nombernan cu mas a wordo menciona den social media como e politiconan cu a sobresali e anochi ta (orden alfabetico): Ricardo Croes, Mike Eman, Otmar Oduber, y Everyn Wever-Croes.

E potretnan aki pa cortesia di Telearuba.

- Advertisement -

DUNA COMENTARIO

Please enter your comment!
Please enter your name here