ORANJESTAD (AAN): E alumnonan na Colegio EPI sector Salubridad Servicio Welzijn Niveau 3, e klas BOL3-WZA tabatin como proyecto final, un Scultura unda nan mester representa e tres añanan den e sector.
E escultura ta consisti di 3 parti, den forma di un trapi, unda na cada uno e alumnonan a pinta algo cu ta representa loke nan a biba e aña ey.
Den e prome parti mas abao di e escultura, e obra a representa e bukinan mas importante, cu ta e base principal pa loke nan ta studiando, esta un SPW’er, esta un Sociale Pedagogisch Werker.
E di dos aña, e obra a haya un balanza, cu tin e number di “Ups and Downs”, unda nan mester a pone den practica loke nan a siña den prome aña. A haci stage pa prome biaha. Esey tabata e comienzo di nan bunita experiencia como SPW’er.
E di tercer aña, cu ta e pida mas na halto, el a representa e dos partinan unda cu un grupo a bay “Kinderopvang”, y e otro a bay pa “Gehandicapten Zorg”. E tabata nan ultimo aña, unda nan kier a mustra cu tabata dificil den cada pintura, unda a demostra cu e no tabata facil, pero nan tur a lucha, nan tur a cay pa bolbe lanta pa sigui bay dilanti. E escultura aki lo keda riba tereno di scol, y tambe nan a haya hopi apoyo y yudanza di e Sector di CT, cu ta esnan di Bouwkunde, di cual un klas complete a yuda nan cu material y arma esaki den otro, como tambe docente Kelly cu ta envolvi. Nan a rindi homenahe tambe na docente Anna Lacle-Geerman, cu ta e motor tras di nan exito.
E persona cu a dibuha ta Maria Camila Quiñones, sosteni pa henter e klas. Un di nan ta pa meta importante pa ta riba tereno di scol, ta pa duna otro klasnan e motivacion pa loke nan ta studiando, no solamente e tabata un proyecto di scol, pero tambe un bunita recuerdo pa loke Colegio EPI a siña nan, y cu finalmente nan a logra sobresali.
