Home Comentario Ban conecta nos tur, como hende, cu nos naturaleza

Ban conecta nos tur, como hende, cu nos naturaleza

23
0
SHARE
- Advertisement -

Comentario:

Pa Mercedes Monge

“Conectando e Hende cu e naturaleza” ta e tema cu a wordo trata Dialuna cu a pasa, cu a keda celebra e Dia Mundial di Medio ambiente, pero cu ta vigente durante henter e siman aki y muy posiblemente e luna di Juni mirando cu na diferente pais di Latinoamerica y Caribe como tambe resto di mundo, specialmente e paisnan cu a firma e Acuerdo di Paris riba cambio climatico y proteccion di nos medio ambiente, tin hopi actividad di motivacion, riba cuido di medio ambiente y su desaroyo sostenible.

Ta ser bisa cu e naturaleza tin voz. E ta manda su mensahenan cada rato, pero ta e hende no kier scuche, nos tin oido sordo pe. E idea di un Dia Mundial di Medio ambiente ta precisamente pa stimula e habitantenan di henter mundo pa duna nos entorno e importancia cu tin y cu merece, pasobra di un medio ambiente sano, bisa cu palabra simple, nos propio sobrevivencia ta depende.

Ohala den e transcurso di e siman aki, nos tur habri un espacio den nos agenda diario pa ban un rato sinta den naturaleza, pa nos observa rond di nos e parti di lama y e areanan berde cu nos Isla ta brinda nos, incluso den nos propio cura di cas unda mi ta sigur, hopi di nos a planta un par di semia y awo nos tin algun palo di fruta, berdura, mata di remedi di tera, of planta ornamental ta lantando. Aprecia mas locual nos mes man a haci pa crea un ambiente mas sano y bunita den nos cura.

Ban kizas, lanta un poco blachi seco cu ta kita nos cura su buniteza y asina nos proteha nos tera, e pida cu nos ta comparti cu nos mes famia.

Ban cana un rato, posiblemente cerca di nos mes cas nos por hacie rondona di areanan berde, den mi bario nos tin e Seroe Hooiberg dilanti nos bista; ban aprecia nos naturaleza bibo, no importa con chikito nos isla ta, locual nos tin ta masha bunita y merece di nos atencion. Na cant’I lama nos tin asina hopi pa recrea nos bista y baha stress cu si nos wak bon, podise te hasta nos ta perde di admira esey dunando atencion na otro cosnan, sin duda importante, pero cu talvez no ta haci e mesun efecto relahante y di paz cu ta meymey di naturaleza maske sea pa un rato cortico tin.

E Dia Mundial di Medio Ambiente ta wordo celebra for di aña 1972 y for di e tempo ey e habitantenan di mundo ta organiza cantidad di actividad, for di hacimiento limpi di caminda te marchanan contra deforestacion, pa e rescate di flora y fauna, pa sembra mas mata sea chikito of esnan cu ta bay halto pa genera mihor oxigeno pa nos hala rosea, seminario, tayer di trabao, charlanan, y hopi mas.

Semper a scoge un pais anfitrion pa un celebracion central, cu e aña aki a toca Canada for di unda a scoge e tema di e aña.

Ban ta conciente cu nos ta parti di e naturaleza di cual nos ta depende. Nos tin un simbiosis cune: su tarea ta aporta salud pa nos, nos tin e deber di cuide.

 

- Advertisement -

DUNA COMENTARIO

Please enter your comment!
Please enter your name here