Home Politica CAft ta bati alarma pesey mester saca tur man for di e...

CAft ta bati alarma pesey mester saca tur man for di e papa deportivo

101
0
SHARE
- Advertisement -

Jacky van Putten

ORANJESTAD (AAN): Poco dia pasa CAft a saca un comunicado unda nan ta conclui cu  gobierno actual no ta cumpliendo cu loke nan mester pa asina controla y baha e gastonan. Mas ainda ta premira un situacion dificil financieramente pa nos isla otro aña debi na tur e debenan cu tin cu worde paga. Pa green corridor y hospital so mester bin 90 miyon acerca.

Segun Jacky van Putten di Partido POR, esaki kiermen cu e pueblo di Aruba ta haya nan mes den un preta enorme cu nan finanzas.  Pasado a mustra cu ora gobierno kier baha nan gasto e promenan cu lo worde afecta ta net esnan cu mas mester di dje. Fundacionnan  y deporte lo bay ta e promenan cu lo worde afecta.

E proyectonan di bario, social y cultura, musica lo worde sacrifica pa asina e otro gastonan iresponsabel por worde paga. E Plataforma Forsa Nobo, POR ta di opinion cu mester traha riba fondonan indepediente cu lo percura cu instancianan importante di nos comunidad por sigui funciona. Nos lider di partido Otmar Oduber a realisa esaki cu un fondo pa turismo cu awor ta draai positivo y hasta ta duna placa na gobierno.

E concepto aki no ta nada nobo pa deporte, pesey den añanan 80 mi defunto tata Roy van Putten hefe di IDEFRE  hunto cu diputado di deporte e tempo ey Remy Zaandam a funda Lotto pa Deporte. E unico meta tabata pa protehe fundonan independiente strictamente pa deporte, cultura y educacion fisico.

Pero manera tur cos aki na Aruba unda tin placa tin mannan cu kier manipula den e papa. Asina nos por a mira cu e metanan a worde cambia, fondonan pa  deporte a bay pa otro cos, diferente escandalonan rond di e fondo y na final a entrega un gran parti di e placa cu nos mester pa nos deporte na Canada pasobra nos ta tur hipoteca.

Mester bin claridad den maneho di deporte pa asina esnan cu mas mester di dje lo worde beneficia. Mester primeramente saca tur man for di e papa. Personan cu ta liga na gobierno cu interes personal mester worde saca. No por ta cu placanan grandi ta bay solamente pa algun deporte cu tin madrina.

Nos mester proteha e muchanan cu menos recurso, nos barionan y nos schoolnan. Ta bunita cu algun atleta privilegia ta biaha tur rond di mundo, pero e grupo grandi  di atletanan no tin ni  bala pa hunga. Deporte na Aruba a conoce un decadencia ultimo añanan na unda diferente ministernan y aliadonan ta haci y desahaci sin nigun plan di maneho.

Mester ruim op de boel y trece vision nobo , nos mester percura cu e fondo bira saludabel atrobe, percura cu interes personal worde elimina y percura pa tur deporte por worde practica libremente.

 

 

 

- Advertisement -

DUNA COMENTARIO

Please enter your comment!
Please enter your name here