“Caminda pa bicicleta den Green Corridor ta un peticion grandi cu nos tabatin pa siguridad, salud y recreaccion di nos hendenan”

    44
    0
    SHARE
    - Advertisement -

    Prome Minister Mike Eman

    ORANJESTAD (AAN): Dialuna mainta Prome Minister Mike Eman hunto cu su colega di Infrastructura Minister Benny Sevinger, Director di Departamento di Obranan Publico (DOW) y contratista ODINSA, a anuncia cu Aruba ta bay haya den apenas algun luna su prome caminda di bicicleta.

    E trayecto di 10 kilometer largo ta cuminsa dilanti di aeropuerto cu conexion pa ‘Linear Park’ y ta bay ariba te na Savaneta. “Awe nos ta para na un punto importante di instalacion di caminda di bicicleta, un peticion grandi cu nos tabatin pa e ta parti di ‘Green Corridor’ cu awo ta haya contenido,” Premier Eman a indica.

    Lider di Gabinete Mike Eman a splica cu na momento cu nan a cuminsa diseña e proyecto di ‘Green Corridor’ a amplia e perspectiva y e vision cu tabatin pa loke ta trata un vierbaansweg pa Aruba. “Nos a pone un accento grandi riba accesibilidad, pero tambe mehora e calidad di bida di tur nos conciudadanonan y e casnan a lo largo di ‘Green Corridor’ y esey ta birando hopi visibel por ehempel na Pos Chikito y Savaneta,” referiendo na mehoracion di e espacio entre e casnan y caminda grandi cu awo tin trottoir, caminda pa cana, iluminacion y algun area cu ta bira parke publico.

    Premier Eman: “Pa nos esaki lo ta un di e proyectonan cu nos ta mira cu, mescos cu Linear Park cu a haci un cambio hopi grandi den e personanan cu ta cana y core; nos ta kere cu e hecho cu Aruba ta bay haya un caminda di bicicleta di mas di 10 km asina sigur y safe ta bay cambia henter e aspecto di coremento di bays na Aruba.”

    E mandatario a enfatisa e hecho cu nunca Aruba tabatin un caminda specificamente destina pa bicicleta y di e largura aki. “Esaki ta un transformacion sumamente grandi pa salud di nos hendenan y pa recreaccion. Nos por mira caba famia completo cu por bin core bicicleta, haci recreaccion, deporte, e  cantidad di variacion cu por trece famia hunto ta enorme, nos ta hopi contento.”

     

    - Advertisement -

    DUNA COMENTARIO

    Please enter your comment!
    Please enter your name here