Home Policial Candela a destrui cas por completo na Sabana Basora

Candela a destrui cas por completo na Sabana Basora

496
0
SHARE
- Advertisement -

ORANJESTAD(AAN): Un candela cu na forma misterioso a cuminza Diamars mainta prome cu 7:00 am, por poco tabatin consecuencia fatal.

E caso di e candela di e cas na Sabana Basora Noord ta uno tristo. E famia a perde nan cas y a hera perde nan bida.

E cas di dos piso aki ta pertenece na Vale Croes, kende ta labora na Santa Rosa.  E mainta ey el a sali di 6:15 am pa bay hunto cu un yiu homber, pa yuda un persona hiba bestia na Abattoir.

El a sali bay lagando tur hende na cas na soño.  E momento ey apenas solo tabata sacando su rayonan di mainta.

Despues di a duna un man pa Abattoir, señor Croes tabata rumbo pa su trabao.  Na caminda el a haya yamada, y hende ta bise cu su cas na candela.

E spanto a pone mobiliza cu velocidad halto pa su cas, y di leu e tabata mira vlamnan ta bay halto.

El a yega y haya cu ya caba Polis, Bombero, y hasta Ambulans tabata presente.  Aki el a bin ripara cu el a haya varios missed-call caba, pero como cu e ta den auto, e no tabata sinti cu su celular tabata ring.

E vlamnan tabata sali na forma feroz for di abao, y tambe e parti ariba di e cas.  Ta parce cu e candela mes a start na piso abao, y esaki ta opinion di Polis como tambe Bombero.  Den parti abao tin algun mueble, incluyendo stoelnan grandi cu a converti nan mes den material pa acelera e candela.

Kico a kima e cas anto?  Nan lo ta usa bela?  Segun Vale Croes, nan no ta usa bela.  El a agrega cu e cas ta uno nobo, pues no tin motibo di cumpra bela. E cas ta sigura, el a splica.

Full e parti paden a kima na forma intenso.  Pleisternan a djis kibra di muraya, solamente frame di mueblenan y matras a keda atras.  Aparatonan di TV a djis smelt. Nan a perde tur paña, tur uniform di scol, tur documento, tur zapato, y a keda cu solamente loke nan tabatin riba nan curpa.

Di momento cu e informe a cuminza circula di e tragedia aki, pueblo a cuminza reacciona.  Di merdia caba varios hende a cuminza trece cuminda den bleki, paña, y mucho mas.  E cas tin un bandera di MEP hisa masha halto mes, y den oranan di atardi a nota cu candidatonan di Partido Geel a presenta na e cas cu varios donacion.

Segun Vale Croes, e ta gradici Dios y tur hende cu a coopera. Nan a haya hopi cos berdad, sinembargo e ta prefera pa coordina via Rode Kruis pa atende e cosnan mihor.

Manera por lesa den e relato na Pagina 6 di awe, e heroe real ta e yiu homber di dje, esta Jeandrick Croes di 13 aña, kende a salba bida di dos sobrino, pone nan baha via e dak otro banda di cas.

Apesar cu e cas ta sigura pa candela, toch ta un caso lamentable. Aunke cu algun di nan tabata herida, toch nan a sali bon di esaki.

Si tin mester mes, esnan cu kier yuda por tuma contacto cu 746-6742, caminda cu por duna un aporte na e famia aki. Seguramente DIARIO por bisa, Dios tabata cu no tabata tin un desenlace serio of fatal den e situacion aki.

 

- Advertisement -

DUNA COMENTARIO

Please enter your comment!
Please enter your name here