Home General Castigo condicional pa agente cu a bati dama Polis na warda di...

Castigo condicional pa agente cu a bati dama Polis na warda di Macuarima

458
0
SHARE
- Advertisement -

ORANJESTAD   (AAN)  – Diahuebs mainta e homber J.C. a presenta den Corte pa scucha su sentencia. Na comienso di luna tratamento a tuma lugar, caminda Fiscal a haya J.C. culpable di ariba e anochi di 5 pa 6 Juni 2016, tempo cu e tabata agente di Polis, a maltrata su colega dama A., formal na warda di Polis na Macuarima. Hues a bisa cu e ta haya J.C. culpable y ta conden’e na 1 luna di prison condicional y tambe trabou pa comunbidad.

MALTRATA POLIS DAMA

Na comienso di Juni 2017 tratamento di e caso a tuma lugar caminda Hues a bisa cu segun e procesverbaal di Polis, tur cos a sosode riba e anochi di 5 – 6 Juni 2016. J.C. a dal otro colega dama A. Nan dos tabata warda e dia ey. E tabata coba den cellular di e dama A. Despues el a bay papia cun’e pasobra e tabata sospecha cu lo tin un otro. E dama a bisa cu J.C. a tira e cellular abou y a surgi un discussion. Otro coleganan na warda di Polis tambe a mira loke a pasa.

Hues a bisa cu A. ta desmenti di tabatin otro relaciona. El a bisa cu J.C. a chok’e na garganta, rank’e na cabey y hib’e den cantine. E coleganan a mira cu A. a sufri sla. El a pidi un colega pa hib’e auto pasobra e tabatin hopi miedo di J.C.

Na hospital dokter a constata cu A. tabatin un lip kibra, sla na wowo y na cabez. Hues a remarca cu 6 biaha a interoga J.C. pero e ta desmenti di a maltrata A. di e forma ey. E ta bisa cu e tabata kier a sunchi A. Hues a remarca cu J.C. ta bagatalisa loke realmente a sosode.

EXIGENCIA DI FISCAL

Fiscal a bisa Hues cu e agente A. a haci denuncia di maltrato contra J.C. Tambe a constata cu J.C. a drenta e dama A. su apartamento. E dama A. a haya un saco cu su simcard y un nota pa e yama J.C. Fiscal a mustra cu tin raport di hospital cu ta mustra cu A. a sufri diferente sla. Na su nek tabatin marca di gara. Tambe e tabatin sla na cara. Ademas di esey A. a keda emocionalmente afecta. Fiscal a remarca cu e dama F. cu a haci un keho na Maart 2016 ta mesun cos cu e keho di A. na Juni 2016. El a bisa cu aki no por papia aki di cu nan lo a planea algo contra J.C. Segun Fiscal, Polis a investiga e porta na apartamento di A. y a constata cu a forza esaki. J.C. a bisa cu el a bay pa duna e simcard.

Castigo exigi

: Pa cu e castigo, Fiscal a bisa cu e ta tene cuenta cu J.C. lo tabata jaloers. El a exigi 120 ora di trabou pa comunidad y 1 luna di prison condicional cu un tempo di prueba di 2 aña. Tambe Fiscal a pone e condicion pa J.C. sigui curso pa control su agresividad. J.C. lo mester cay bou observacion di Reclasering.

SENTENCIA

Hues ayera a bisa cu e ta haya J.C. culpable cu riba e anochi entre 5 – 6 Juni 2016, el a maltrata e dama Polis A. Potretnan ta mustra cu A. a wordo maltrata. Hues a mustra cu e hecho cu A. a hala su keho aden, no ta kita afor cu C. ta wordo persigui. Na opinion di Hues, aparentemente door di miedo, e dama A. a hala su keho aden. Hues a sigui bisa cu e ta haya tambe J.C. culpable di a drenta den cas di A. sin autorizacion.

Hues a tene na cuenta cu J.C. tabata agente di Polis y tabata entrena pa actua y control su mes. Door di jaloersi el a maltrata e dama A. na un forma no acceptable. El a haci esaki na warda di Polis caminda otro agentenan di Polis a mira kico a sosode. Na opinion di Hues, ta parce cu J.C. no por controla su emocionnan.

Hues a bisa cu e ta preocupa pa cu J.C. su comportacion. El a mustra cu despues di e maltrato, J.C. a pidi otro coleganan pa gaña.

Hues a tene cuenta cu J.C. a lanta den violencia caminda el a mira su tata a maltrata su mama. E ta haya cu J.C. mester di tratamento. Hues ta haya tambe cu J.C. a viola integridad di e dama A.

Pa cu e castigo, Hues a tene cuenta cu nunca promer J.C. a cay sera. Tambe cu J.C. durante tratamento di e caso, a reconoce cu e tin problema cu agresion y cu e ta bao tratamento di psychiater. Ademas di esey, Hues a tene cuenta cu J.C. a perde su trabou di Polis. Hues ta haya cu un castigo condicional ta na su lugar. Pa loke ta e demanda di e dama A. pa paga un cellular nobo, Hues a aproba esaki.

Hues a condena J.C. na 1 luna di prison, kitando e dianan cu e tabata sera. Esaki ta completamente condicional cu un tempo di prueba 2 aña. Hues a bisa cu durante e periodo di prueba, J.C. mester cay bou guia di Reclasering. Ademas Hues a bisa cu J.C. lo mester haci 240 ora di trabou pa comunidad y mester haci’e den e periodo di 1 aña. Ademas e mester paga e cellular di e dama A. cu el a benta abou y kibra.

 

- Advertisement -

DUNA COMENTARIO

Please enter your comment!
Please enter your name here