Home Hudicial Corte Superior: Mama y yiu muher cu a worde abusa scucha como...

Corte Superior: Mama y yiu muher cu a worde abusa scucha como testigo

556
0
SHARE
- Advertisement -

ORANJESTAD    (AAN) – Dialuna mainta e caso di apelacion cu e homber T. a cuminsa contra su sentencia di 12 luna di prison, a keda posponi riba peticion di abogado mr. Carlo. Hof di Corte Superior, despues di a pensa basta riba e peticion, a honra esaki pero a dicidi di scucha e mama y e yiu muher pa tin mas claridad. E homber T. ta para riba cu e relacion sexual tabata voluntario pero tanto e dama D. como su mama ta bisa cu T. a abusa y a saca D. na estado.

ABOGADO A PIDI POSPONE CASO

Ta asina cu e mama y e yiu muher D. a presenta den Corte. Abogado mr. Carlo a pidi Hof pa pospone e caso. El a splica cu di banda di su cliente, kier a scucha mas testigo y ademas di esey e mayornan di su cliente a bira malo y esey a haci dificil cu por a prepara e caso ya cu T. no por a bay serca dje. Hof a haci e abogado un serie di pregunta y e abogado a pidi Hof un pause pa e papia cu su cliente.

E abogado a bay papia cu T. pafor di sala di Corte y ora el a bolbe el a bisa Hof cu T. no kier menciona nomber di testigonan sin a puntra e personanan si nan ta dispuesto pa testigua.

Hof a papia cu e mama y e victima D. Hof a bisa cu ta haya importante pa papia cu tanto e mama y e yiu. Hof kier haya e conviccion cu tabatin relacion forza of relacion voluntario. Awor e yiu D.,tin 18 aña. Segun e victima e cos a sosode manera el a declara. Hof a mustra cu T. ta bisa cu e cos a bay manera el a declara.

Procurador General (PG) interino a bisa cu e ta haya e argumento di abogado pa pospone e caso zwak. E no tin nada contra pa Hof interoga e mama y e victima. E acusacion ta cu na April 2013, T. lo tabatin relacion sexual cu e mucha (14) a sali na estado y a haya yiu.

Abogado mr. Carlo a splica Hof cu e kier a prepara e caso bon cu T. door cu su mayornan ta hospitalisa esaki a bira dificil. El a bisa Hof cu mirando cu tin un castigo di 12 luna riba cabez di T., T. no por a presenta na oficina pa prepara e caso bon.

HOF A POSPONE CASO

Hof a pospone e caso un rato pa bay evalua e peticion di abogado mr. Carlo. Despues di basta rato Hof a bolbe y e president di Hof a expresa cu tin un poco dificultad pa pospone e caso pero pa e biaha aki lo haci’e teniendo na cuenta e situacion di e mayornan di T. Hof a adverti si cu otro biaha lo trata e caso.

HOF A INTEROGA MAMA Y YIU

Hof a bisa cu lo bay probecha di e oportunidad pa scucha e mama y yiu como testigo.

Hof a cuminsa cu e yiu muher D. promer y e mama mester a sali for di sala di Corte. E dama a bisa cu actualmente e ta trahando. Hof a pone e victima huramenta como testigo y a hala su atencion cu si e gaña e ta culpable di duna declaracion falso bou huramento (perjurio) y ta castigabel pa ley. Hof a tene cuenta cu ta basta tempo a pasa y ta pidi e victima pa bisa loke e ta corda.

VICTIMA ABUSA?

Hof a puntra D. si e denuncia ta berdad. Hof a puntra cuanto biaha a tene relacion sexual. Segun D. ta un biaha so y cu e denuncia ta berdad. E acusado T. tabata sacudi cabez. Hof a pidi D. pa splica kico a pasa e dia ey. El a bisa cu e tabata su so na cas y su ruman muher tabata serca T., cu ta su bisiña. E tabata kier pa su ruman bay cun’e pa cumpra carchi pa cellular na Chines. Segun D., e ruman muher no kier a bay y T. a bay hiba D. den su auto Chines pa cumpra un carchi telefoon. Segun e dama D., despues T. a coy un otro caminda y a bay bou di un mata y kier a tene relacion sexual. D. lo a bisa cu no y T. a bis’e un rato so. Nan a tene relacion y despues D. a cana bay cas. El a baña y el a sangra. Hof a puntra D. si ora nan a caba di cumpra carchi nan a core bay unda. El a bisa cu T. a coy un otro caminda y el a puntr’e unda bo ta bay y T. a bis’e un djis e lo haya sa. El a cuminsa haya miedo. Na e lugar, segun D., T. a cuminsa kita su paña y mishi na su parti intimo. D. lo a bisa cu e no kier y kier a baha for di e auto pero no por pasobra e auto tabata na lock. Despues segun D., T. a force pa tene relacion. D. a sinti hopi dolor. El a bisa cu el a sali na estado.

Hof a bisa cu T. a declara cu e relacion tabata voluntario. D., basta emociona, a bisa cu no ta berdad. Hof a bisa cu tin un testigo homber B., a bisa cu T. tabatin relacion cu D. y casi tur dia D. tabata bay serca T.  Segun D. e tabata bay serca T. pero nada a sosode. El a bisa cu e tabata mira B. na e cas.

Hof a bisa cu B. a declara tambe cu e mama lo tabata stimula pa D. tabatin relacion cu T. Segun D. esey no ta berdad. Nan ta gaña. Hof a mustra cu B. a declara cu e mama tabata hiba D. na cas di T. Tambe el a bisa cu D. tabata bisa cu e tabatin 17 aña. D. a bisa Hof cu nan ta gaña y nan tabata sa bon cla cuanto aña e tin. El a bisa cu ta bisiña nan ta.

Hof a mustra cu tin un otro testigo, un dama C. D. a splica cu e tabata bay hopi na e cas hunga. E testigo a bisa cu D. tabata keda hopi laat y a mira tin biaha D. y T. ta braza otro. D. a remarca cu nan no tabata papia cu C. Ora e cos a sosode, awor nan ta papia. El a desmenti loke C. a bisa.

PG a puntra D., si e no a conta su mihor amiga of su mama di loke a sosode.

  1. a bisa Hof cu e no a bisa ningun hende pasobra T. a menaza pa no papia. E mama a ripara cu D. lo tabata na estado y a lag’e haci test. E ora ey el a bisa su mama.

PG a puntra D. si T. tabata biba hunto cu su partner y nan tabata separa un tempo. Segun D. nan tabata biba hunto y e tempo ey e partner tabata na estado tambe. E muchanan tabata na e cas. Segun D., ningun momento nan tabata separa.

E mama a bay papia cu T. y segun D., T. a keda nenga y D. a bisa cu ta T. ta e unico homber cu e tabatin relacion cun’e. Segun D., T. a bisa Dios sa kende lo a haci’e.

Abogado mr. Carlo a haci preguntanan na D. caminda Hof tambe a haya straño cu e por a drenta e auto normal y ora di relacion e no por a sali pasobra e auto tabata gelock y ora di bay cas e porta tabata habri normal.

Despues e mama di e victima a wordo scucha. E mama a bisa cu el a haya yamada anonimo anochi laat di un homber cu a bisa cu su yiu muher D. tabata na estado di su bisiña. Hof a bisa cu na KZP, e mama a bisa cu el a mira D. straño. Segun e mama el a bisa KZP cu el a haya un yamada anonimo. El a bisa su siguiente dia el a bay botica y laga D. haci test. Despues el a bay dokter kende a constata cu D. tabata 7 luna na estado. E mama a bisa cu semper nan tabata bon bisiña. Segun e mama, D. a bisa cu el a sali core bay y cu T. a core su tras. Hof a remarca cu D. a caba di bisa cu e no por a sali for di e auto. Hof a remarca cu na KZP, e mama no a bisa esey. Segun e mama, esey el a bisa KZP.

Hof a confronta e mama cu declaracion di e testigo B. E mama, basta emociona, a bisa cu T. no tabata bon cu B. Ta despues di loke a sosode, T. a bira amigo cu B. pa asina B. declara pa T. Hof a mustra cu B. a declara cu e mama tabata hiba D. na cas di T. y cu D. tabata bisa cu e tabatin 17 aña y T. y D. tabata sinta bebe. E dama C. a bisa cu e mama a bisa cu D. tabatin 17 aña. E mama a bisa Hof cu esey no tabata berdad. Hof tambe a puntra e mama tocante cu T. tabatin un partner y yiunan.

E mama a bisa cu e no ta acepta esey pasobra T. tabata biba cu su partner. E mama a bisa cu el a haya un sla duro cu su yiu tabata na estado. El a papia cu T. y puntr’e si el a mishi cu su yiu. T. a bisa cu no pero e yiu muher ta bisa cu si.

Hof a bisa cu ta pospone e caso pa dia 21 Augustus 2017 y e dia ey lo bay haci T. preguntanan. A puntra T. kico su reaccion ta. T. a bisa cu loke nan a bisa no ta berdad. El a hasta bisa cu e tabata kier cria e baby pero nan a nenga.

 

- Advertisement -

DUNA COMENTARIO

Please enter your comment!
Please enter your name here