Home General Den fin di siman a logra saca aparato di grabacion bek for...

Den fin di siman a logra saca aparato di grabacion bek for di bao lama

125
0
SHARE
- Advertisement -

El a graba sonidonan di bayena rond di Aruba

ORANJESTAD (AAN): Despues di tabata seis luna sumergi den lama di Aruba, porfin riba Diasabra 17 di Juni,  e “Marine Autonomous Recording Unit” di graba zonido di bayena, a worde recogi.  E ta bek riba tera, y ta bay worde manda back pa analysis.

E aparato aki, desaroya y propiedad di Cornel University cu a worde alquila pa NOAA (National Oceanic and Atmospheric Administration), ta graba na frequencia di sonido di bayena Humpback y Bryde’s, cu ta  frecuenta Aruba su awanan.

E bayena masculino Humpback ta produci un canto compleho di duracion di 10-20 minuut, cu nan ta keda ripiti pa oranan largo. Humpback whales ta migra anualmente  pa come den awanan hopi frieu cerca di Arctica, p.e. Noorwegen y Alaska, y pa awa di temperatura mas halto pa haya yiu, p.e. na Silverbanks , Republica Dominicana.

E grabacionnan di e proyecto aki ta worde usa pa asesora diferencianan den e  cantonan aki y diferencianan den periodo di yegada di bayena den e region.

Tin indicacion anecdotal cu tin Humpbacks cu ta keda un tempo hopi mas largo den Caribe cu tabata conoci, y cu por tin Humpbacks cu ta migra for di Atlantico Sur tambe te na Caribe na caminda pa Brazil. E datonan aki ta necesario pa por defini e temporadanan real anual cu e Region di Mar Caribense  ta  sirbi como refugio hopi vulnerabel di sobrevivencia pa e especie protehi aki, y asina aporta na proteccion di e Region di Mar Caribense.

E aparato aki ta forma parti di e proyecto “Caribbean Humpback Acoustic Monitoring Program (CHAMP)”, di cientificonan Heather Heenah Phd,  Sofie van Parijs PHd, y Peter Corkeron Phd, di e   “Passive Acoustic Research Group / United States National Oceanic Atmospheric Administration (NOAA)/ Northeast Fisheries Science Center , cu ta keda na Woods Hole, Massachusetts, E.U. E proyecto aki ta inclui islanan Bonaire, Republica Dominicana, Guadeloupe, Martinique , St. Maarten y Aruba. Colaboradora  pa e seccion na Aruba ta Angiolina Henriquez  di Aruba Marine Mammal Foundation (AMMF).  E programa ta financia pa NOAA cu aporte parcial na Aruba di Pelican Adventures, Pelican Nest, Holiday Inn Resort, y AMMF.

E operacion di recoleccion tabata den colaboracion estrecho entre diferente instancia.

E team di buceo tabata: Sjoerd  Oude Avenhuis y Robert Garrido, di Aqua Windies, cu tambe a pone uso di tankinan disponibel;  Luciano Mazzeo y  Ed Egan, ambos di Aruba Lionfish Initiative (RCF);  Castro Perez y Byron Boekhoudt, di Aruba Reefcare Foundation(RCF). Pelican Adventures a pone e boto El Dorado y  tripulacion Carlos Rendon y Randolph Kock disponibel. Kustwacht Aruba tambe tabata presente pa assistencia y seguridad di buceadornan. Coordinacion a cai bao encargo di Angiolina Henriquez di Aruba Marine Mammal Foundation(AMMF).

AMMF ta extende su aprecio y gratitud na cada un di nan y tambe na Rudy Beaujon (Havenmeester); C. De Cateou qepd (Directie Scheepvaart); Patrick Kock, L. Kiringdongo, R. Paskel di Kustwacht Aruba;  Ian Molina di Pelican Nest; Dylan Molina y Edsel Heyden di Pelican Adventures;   Holiday Inn Resort: pa nan gracia den asistencia inmediato,  aporte y entusiasmo, pa haci e seccion di CHAMP na Aruba posibel.

- Advertisement -

DUNA COMENTARIO

Please enter your comment!
Please enter your name here