Home Economia Departamento di Asuntonan Economico ta start cu control di prijs di canasta...

Departamento di Asuntonan Economico ta start cu control di prijs di canasta basico

71
0
SHARE
- Advertisement -

ORANJESTAD (AAN): Departamento di Asuntonan Economico a anuncia cu ta bay cuminsa cu control di prijs di e productonan di e canasta basico como tambe control riba indicacion di prijs. Minister Arends di Asuntonan Economico a splica cu prijsnan semper mester ta na Florin y e mester ta riba e producto of visiblemernte cerca di e producto. “E controlnan aki ta bay worde haci den e dianan aki door di Departamento Economico. Esaki despues di a anuncia e maneho di negoshi nobo como tambe e moratorium cu a institui riba supermercado.”

E control di prijs no ta algo riba su mes. E ta worde haci hunto cu funcionarionan di Departamento di Salubridad Publico y Cuerpo Policial. “Despues di e control nos ta spera cu nos por tin estadisticanan riba e cantidad di control, cuanto aviso a worde duna y kico a worde cambia y na cua establecimento.”  Minister Arends a bisa cu e controlnan aki ta bay duna un bista di e comportacion y cumplimento di e permisonan di establecimento cu ta cay bou competencia di Ministerio di Asuntonan Economico.

Productonan di e canasta basico ta aroz, azeta dushi, margarina, manteca, babyfood, leche en polvo, lechi di koffie, sucu, salo, koffie, thee, hariña blanco y hariña di maishi. Pan ta un producto cu ta regula mescos tambe webo di galiña. Minister Arends: “Riba e productonan aki Departamento di Asuntonan Economico ta eherce un control. Nan prijs ta maximo y no mag di varia. Nan mester ta mescos tur caminda, inclusive BBO y BAZV. ”

Pa loke ta prijsnan di producto cu ta fluctua hopi etre un supermercado cu e otro Minister Arends a bisa lo siguiente. “Cada kwartaal Departamento di Asuntonan Economico ta publica un steekproef di cada bes 5 of 6 supermercado rond di nos isla. Ta compara prijs di diferente producto cu no ta di e canasta basico. Esaki ta pa meramento educa y conscientisa e consumidor. Ministerio di Asuntonan Economico no solamente te eherce control y regulacion riba establecimentonan, pero tambe ta pone fondonan disponibel pa conscientisa e consumidor. Un consumidor cu ta consciente di su interes y beneficionan, por yuda en lo general den reduccion di prijs di productonan den nos economia.”

 

 

- Advertisement -

DUNA COMENTARIO

Please enter your comment!
Please enter your name here