Home Suceso Dos tripulante luchando 23 dia riba lama a keda rescata y treci...

Dos tripulante luchando 23 dia riba lama a keda rescata y treci na Aruba

5083
0
SHARE
— E dosnan aki so a keda bibo di e odisea di 23 dia. Nan a keda rescata pa crusero Adventure of the Seas.
- Advertisement -

ORANJESTAD (AAN): Tabata riba Diabierna dia 19 di Mei luna pasa, cu e boto di pisca “Royalty” a sali for di isla di Martinique rumbo pa e isla di St. Lucia.  Abordo tabatin 2 persona di nacionalidad Frances.  Indicacion ta cu nan a bay pisca.  Nan a yega St. Lucia, unda nan a tuma un persona mas abordo, un hoben di 22 aña di edad.

— Richie James di St. Lucia (robez) y Ismael Nemorin di Martinique a wordo haya bibo ta drief riba un boto na como 800 km pabao di St. Lucia.

Pero ora di regresa for di St. Lucia bek pa Martinique riba e anochi di Diasabra 20 di Mei pa Diadomingo 21 di Mei, nan a confronta problema cu motor ora nan tabata 49 kilometer for di St. Lucia.  Di ey nan a cuminza drief.

Abordo di e boto tabatin Christopher “Bato” Quimper di 43 aña di edad di Martinique.  Tambe tabatin Ismael “Ti Costo” Nemorin di 26 aña di Martinique.  Finalmente e hoben Richie James di 22 aña di edad di St. Lucia.

E motor no kier a start mas, y asina nan a keda nan so ta drief, drentando mas den parti central di Lama Caribe.  En total nan a keda drief pa 23 dia.

E 23 dianan ey tabata hopi largo, dificil pa cada uno, mirando con tur dia nan ta keda cu e speranza di wordo rescata, pero nada.

E dianan largo aki tabatin efecto negativo riba nan.  Dado momento e otro tripulante, Christopher “Bato” di 43 aña di edad a cuminza experiencia halucinacion, y a perde cabez y a dicidi na bula den lama, y aparentemente a hoga.  E ora a keda solamente Richie James y Ismael abordo.

— Christopher ‘Bato’ Quimper aparentemente a bula for di e boto y a hoga.

Pa nan bon suerte, e crusero Adventure of the Seas di Royal Caribbean International, a sali Diasabra dia 10 di Juni for di San Juan, Puerto Rico.  Riba Diadomingo e crusero tabata na isla di St. Thomas, y pa 5’or di atardi a sali di waf rumbo pa Curacao.

Riba Dialuna 12 di Juni, tripulantenan di e crusero a bin topa cu e boto “Royalty” ta drief pa perdi riba nan ruta, y mesora Capitan a duna ordo pa stop e crusero, y a laga un tender move den direccion di e boto y a rescata nan.  E momento ey nan tabata como 800 kilometer leu for di St. Lucia.

E dos tripulantenan tabata hopi debil y completamente deshidrata.  Abordo di e crusero, nan a wordo examina door di Docter, y nan a haya tratamento.  Capitan a tuma contacto cu US Coast Guard, y nan a bise pa sigui numa pa Curaçao y Aruba.

Diamars dia 13 di Juni, e barco a yega Waf di Willemstad na Curacao, y su siguiente dia, riba Diaranzon 14 di Juni nan a yega Aruba.

Tin indicacion cu na Aruba e dos personanan aki a baha, y asina yamada a wordo haci na St. Lucia, unda e mama di Richie James a bin haya e bon noticia cu su yiu ta sano y salvo.  E ta na Aruba, y e ta pidi pa nan manda su paspoort y un pasashi pa asina e por regresa St. Lucia.

E mama a declara na prensa, cu e ta hopi alivia cu e noticia.  Su curazon a keda bise, pa no kere cu su yiu ta morto.  El a keda positivo pensando cu su yiu no ta morto pero algun caminda.

Ademas, e mama a revela cu su yiu no ta biba cune, pues e no tabata sa mes cu el a sali bay un caminda.  Algun dia pasa, prensa a revela cu e mama a bisa cu su yiu homber Richie James a tuma ‘un mal rumbo’ y el a yega di papia cune varios biaha pa cambia su bida, specialmente despues cu el a sobrevivi un tiramento serio como un aña pasa.

— Richie a wordo conseha pa su mama pa e cambia su bida.

Ora a puntra e mama, ki conseho e lo duna su yiu James ora e regresa St. Lucia, el a contesta: “E mesun conseho cu semper mi ta dune.”  E mama a agrega cu e ta un Cristian, y semper el a encurasha Richie James di 22 aña pa bin bek pa Cristo,  El a mustra tambe cu su otro yiu homber di 19 aña, y su yiu muher di 15 aña ta Cristian.

El a bisa cu ora James regresa, e lo bay consehe pa stop di anda banda di caminda cu su amigonan.  “E sa exactamente kico mi ta bay bise.  E sa cu esey ta tur loke mi ta papia di dje.  Pesey James ta evita di papia cu mi, pasobra el a bisa cu ami semper ta predica den su cabez.”

No ta conoci unda James y Ismael a keda awor na Aruba.  For di relatonan policial e siman aki, DIARIO a nota ningun indicacion cu dos naufrago a wordo baha na Aruba.

E barco crusero mes a bandona Aruba riba Diaranzon anochi, y awe Diabierna ta yegando na isla di St. Kitts.

- Advertisement -

DUNA COMENTARIO

Please enter your comment!
Please enter your name here