Home Politica DTZ ta aplica ley anticua pa restringi programanan radial na partidonan politico

DTZ ta aplica ley anticua pa restringi programanan radial na partidonan politico

20
0
SHARE
- Advertisement -

Consternacion y preocupacion:

ORANJESTAD (AAN)—Den conferencia di prensa di Partido POR, e Plataforma Forza Nobo, Parlamentario mr. Andin Bikker a duna di conoce cu tin hopi consternacion y preocupacion a base di un carta cu “Directie Telecommunicatie Zaken” (DTZ), a manda prome cu fin di siman, na diferente persona cu tin vergunning pa opera radioemisoranan.

Esaki ta a base di un interpretacion di ley cu ta data di 1991, pa loke ta regarda programanan cu contenido politico.

“Y si nos por a compronde e contenido di e carta aki bon, basicamente DTZ ta bisa cu solamente ora di bay entrega lista e partidonan cu ta hacie, tin e derecho di provee of zorg programanan cu tin contenido di indole politico. Na di dos, e ta bisa cu entre tanto cu tambe ta bisa cu solamente partidonan cu den eleccion pasa a haya representacion den Parlamento, tin mag di haya 15 minuut maximo un biaha pa siman, por tin un programa di indole politico na radio”, mr. Bikker a menciona.

E director di DTZ ta basa esaki riba leynan cu e di cu ta aplicable ainda, y POR a haci un analisis y den su concepto, categoricamente, e leynan aki ta nulo y contra nos constitucion.

Parlamentario mr. Bikker a sigui bisa cu nos Constitucion, dia cu el a wordo forma y a bin na vigor, ora cu nos pais Aruba a haya su Status Autonomo na 1986, tabata hopi avanza, den sentido cu capitulo 1 articulo 22 ta bisa cu si un ley, e por ta un ordenanza of of decreto ministerial, si e ta contra e Derechonan Humano ancra den e capitulo 1 di nos Constitucion, e no ta bin na vigor, e no ta haya aplicacion.

Parlamentario mr. Bikker a señala cu e ley cu DTZ ta referi na dje nunca a wordo aplica, y e ta contra e derecho di libertad di expresion, entre otro cu ta ancra den nos Constitucion.

“Pues cu esey, e decreto ministerial y LBHAM cu DTZ ta referi na dje den nos concepto ta nulo, y e no ta mara ningun persona y sigur no e doñonan di radio”, mr. Bikker a subraya.

E parlamentario a indica cu e decreto ta bisa cu segun regulacion di e decreto ministerial menciona, e radionan tin mag di duna informacion politico y si no ta nan ta actua contra e vergunning di radio of television cu ta wordo duna. Pero no tin ningun sancion mara na esaki. “E unico sancion cu por pensa riba dje ta, bo ta purba spanta balente cu e doño di un vergunning asina lo por haya consecuencia segun articulo 2 A di telegraaf y telefon verordening cu e por perde su licencia”, mr. Bikker a subraya.

“Pero na final di dia esey ta un sancion cu bo no por imagina bo mes, pasobra libertad di expresion ta bay hopi mas leu cu e decretonan aki.

Parlamentario mr. Bikke a subraya cu e ley na cual director di DTZ ta referina dje, ta data di aña 1991, pero den e hurisprudencia di aña 2000 bin ariba, Corte Europeo di Derechonan Humano y muy en especial e libertad di expresion, ta declara cu no por sin mas restringi e derecho di partidonan politico y e politiconan di expresa nan opinion.

“Mi kiermen, na final di dia kico ta un democracia si un politico no tin mag di expresa su opinion, kico ta para pe, kico ta pensa riba e retonan cu e pais tin, y kico ta su contienda, presentacion y pensamento pa soluciona e problemanan aki cu ta reinando den su pais pa e votador forma un opinion politico y dicidi pa ken e ta bay vota den e proximo eleccion”.

- Advertisement -

DUNA COMENTARIO

Please enter your comment!
Please enter your name here