Home Tempo E mal tempo por yega Aruba diamars laat pa diaranson madruga

E mal tempo por yega Aruba diamars laat pa diaranson madruga

147
0
SHARE
- Advertisement -

Marck Oduber, di Meteo

ORANJESTAD (AAN): Durante un conferencia di prensa dialuna mainta, Marck Oduber, di Servicio Meteorologico, a informa prensa cu e sistema di tempo andando ta algo cu nan a bin ta siguiendo for di final di siman pasa caba. Esaki despues di informacion cu nan a ricibi di Hurricante Center.

Prome Minister Mike Eman hunto cu Marck Oduber tabata presente den un conferencia di prensa dialuna mainta. E motibo ta pa informa comunidad, via di prensa, cu e instancianan concerni ta siguiendo di cerca desaroyo di un tempo den lama Caribe cu por crece bira un tormental tropical y/of horcan. Prome Minister Eman a bisa cu e ta spera cu e no lo yega asina leu, pero mientrastanto ta sigui  ta den contacto cu tur instancianan concerni adelanta pa ta prepara pa cuakier desaroyo cu ta necesario pa Aruba, tumando e precaucionnan maximo. “Nos lo keda informa comunidad di e necesidad di esaki (precaucionnan), “ Prome Minister Mike Eman a bisa prome cu el a pasa palabra pa Marck Oduber.

Diasabra caba Servicio Meteorologico a saca su prome boletin di tempo, indicando ki tempo tin y e bisindario unda esey tabata ubica na e momentonan ey. Desde diadomingo Hurricane Center a conclui cu e chens cu e por cambia pa un tormenta tropical ta grandi, pa cual motibo a dicidi di emiti Tropical Storm Watch pa e islanan zuid oost di Caribe cuminsa monitor e situacion.

Pa awor Servicio Meteorologico por bisa cu e mal tempo aki lo por yega banda di Aruba entre diamars laat pa diaranson madruga, haciendo e aire humedo y instabiel. “Ta anticipa cu diaranson e ta net net panort di nos cu lo trece bientonan mas fuerte den e area ey mes, ya cu e sistema ta debilitando,” Oduber a splica. Pero cosnan di naturalesa nunca tin siguransa. El a bisa cu no mester lubida “Matthew” cu a para panort di Aruba y a haya forsa back. “Nos no ta kere cu esey lo pasa cu esaki, pero nos tin cu sigui’e di cerca.”

Tur cos te awo ta mustra cu asina cu e pasa e islanan ABC, e lo cuminsa perde forsa. Mirando e situacion aki, e escenario cu Meteo ta mira ta cu diamars laat pa diaranson por haya un 15 pa 25 mm di awacero, localmente tin area cu lo por haya un tiki mas. E condicion di lama, parti nort, lo ta un poco bruto cu olanan rond di 15 pia. No ta spera cu e lama banda di hotelnan lo cambia.

- Advertisement -

DUNA COMENTARIO

Please enter your comment!
Please enter your name here