Home Editorial EDITORIAL: Polis man mara pa actua contra ilegalnan

EDITORIAL: Polis man mara pa actua contra ilegalnan

2242
1
SHARE
- Advertisement -

Kico ta pasando cu nos “Aruba dushi tera”!. Esey ta un reclamo cu mas y mas ta scuchando den pueblo y comercio. Ta parce cu nos cultura, nos moral, disciplina y respet ta bayendo perdi, door di e tanto influencia di exterior. E cantidad di extranheronan ilegal cu ta drentando nos dushi isla ta causando panico den henter comunidad.

Famianan ta sinti nan mes cera den nan propio cas, caminda mester busca camera di seguridad, traha tralinan na bentana, lanta cura, busca cacho, pa asina por tin un tiki paz den bo mesun cas.

Unda nos ta bay! Kico Gobierno ta haciendo pa para tur e panico cu e ilegalnan ta creando riba nos isla. Ta cuanto mas asalto arma na negoshi y hasta na cas di famia mester sosode! Cuanto mas e pueblo por soporta!

Unda tur e vigilancia cu mester tin na nos costa, aeropuerto, e vigilancia cu mester tin riba cayanan ta.

Antes tabata mira patruyanan di Polis ta tene controlnan riguroso riba busnan, na negoshinan y hotelnan pa personanan ilegal. Tabata mira cantidad di ilegalnan tabata wordo gara. Awor Polis NO POR ACTUA MAS! Gobierno a introduci un articulo cu a daña tur cos.

E bendita articulo cu a keda introduci na 2008, “articulo 33” den e ley di Admision y Expulsion a mara man di TUR POLIS. Gobierno a introduci e articulo 33 caminda a kita e autoridad cu e “team opsporing” di Polis tabatin y pone esaki den man di Guarda Nos Costa y mas o menos 12 empleado di Direccion di Labor.

E meta di e “articulo 33” ta pa tene control riba ilegalnan y pa actua ora haya ilegalnan ta traha pa lugarnan cu a tuma nan den servicio.

E articulo aki a resulta FATAL. Den e ultimo añanan SOLAMENTE 1 boet a wordo duna, mientras cu tin “free for all” cu extranheronan. Tur e trabou cu Polis tabata haci, basicamente ta prohibi pa e articulo 33.

E agentenan di Polis cu tin na aeropuerto, NO por actua si descubri ilegalnan. E articulo 33 aki ta kita e autoridad cu Polis tabatin.

Tur e añanan cu a pasa, mas y mas ilegal ta yegando nos dushi isla Aruba y NADA no ta sosodiendo. Envez di a cambia e “articulo 33”, Gobierno NO a haci nada.

Pueblo ta sumamente disgusta cu bo no por cana trankil mas ariba caya. Bo no por habri bo bentananan y porta di cas manera antes SI tabata por. Pueblo ta biba angustia den nan propio cas.

Comercio ta sigui ta victima di e cantidad di asaltonan arma cu ta tumando lugar. Den e mayoria di e casonan aki, ta ilegalnan cu ta riba nos isla, ta envolvi.

Esaki ta un desaroyo sumamente alarmante y preocupante. Acaso Gobierno no ta pensa riba nos pilar di economia, e turista? Kico lo pasa si den un asalto arma, un turista wordo tira! Esaki lo ta desastroso pa Aruba.

Awor cu eleccion ta den porta, pueblo kier mira cambio. NO promesa falso sino accion pa nos recobra nos dushi Aruba.

Pueblo y comercio no por sigui ta victima di ilegalnan cu constantemente ta biniendo Aruba pa horta. E cantidad di armanan cu tin riba nos isla, ta e ilegalnan ta trece nan y bende nan.

Pueblo ta sumamente preocupa, disgusta, rabia cu e desaroyo alarmante aki y ta sclama pa un cambio awor!

Ta basta cu e abuso cu ilegalnan ta haciendo cu Aruba! Ta basta cu tur e atraconan! Ta basta cu tur e asaltonan arma! Ta basta cu e extranheronan ilegal ta abusa di nos cordialidad cu nos ta conoci p’e serca e turistanan.

Pueblo kier mira Polis bek ta controla! Pueblo kier mira accionnan pisa ta tuma lugar y cu multanan ta wordo duna na esnan cu ta usa e ilegalnan pa paga menos placa. Pueblo kier mira cantidad di ilegalnan wordo saca for di nos isla. Gobierno man na obra.

 

- Advertisement -

1 COMMENT

  1. “Kico ta pasando cu Aruba nos dushi tera?”,

    Wel ta hopi hopi lat pa puntra esei.
    Aruba no lo ta mas locual e tabata ta.
    Mi ta biba hopi anja afo.
    Antes hende ta bisa mi oh bon hendenan y dushi lugar pa biba. Awor mi ta ser bisa Aruba ta un isla di criminalidad. E balor nan di antes no tei mas period.

    Wak esun cu ta sera den KIA. Ki ehempel !!!!!!
    Un lugar asina chikito y autoridad no por controla crminalidad i immigracion illegal?
    Pueblo arma boso mes y pone un leader den vecindarionan rond di bo isla paso polis so no por.
    Bo mester hasi mas pa bo mes.

    Danki.
    USA
    Tico S.

DUNA COMENTARIO

Please enter your comment!
Please enter your name here