Home General Famia yegando Aruba pa vakantie a perde tur nan Dollars ora nan...

Famia yegando Aruba pa vakantie a perde tur nan Dollars ora nan a pasa di transito na Maracaibo

6559
2
SHARE
- Advertisement -

ORANJESTAD (AAN): Den fin di siman a bin tuma nota, cu esnan cu ta viahando y pa malasuerte nan vuelo ta pasa di transito na un di e Aeropuertonan di Venezuela, e chens ta grandi cu tur bo placa ta wordo kita for di bo.

Y awor e ta birando peor!

DIARIO a haya sa, cu hendenan cu a viaha for di Colombia y a pasa Aeropuerto di Maracaibo di transito, a wordo kita di tur nan Dollars cu nan tabatin pa bin pasa vakantie na Aruba.

E situacion aki ta andando no djis na Aeropuerto di Maracaibo, sino tambe na Maiquetia.

Y bo no sa mes ta cu cual oficial bo ta papiando cune.  Tin asina hopi Cuerpo di Seguridad na Aeropuertonan, y tur ta competi pa wak ken por haya mas placa.  Pues bo ta capaz di haya un persona cu cara di teenager dilanti bo, den uniform, y ta puntrabo pa unda bo ta viahando, pakico bo ta viahando, kico bo trabao ta, y cuanto placa bo tin cu bo.

Algun ta bisa cu nan ta Polis di Seniat, otro ta bisa cu nan ta Polis Anti-Droga.  Algun ta militar.  Otronan ta bisabo cu nan ta Polis.  Algun ta Polis di Estado Zulia.  Otronan ta djis ladron disfraza.

Esaki ta algo cu sigur tin di haya atencion di autoridadnan internacional, e.o. ICAO, pasobra pasaheronan cu ta pasando di transito ta djis usa e Aeropuerto pa baha y subi un otro avion pa sigui cu nan ruta.

Ta incomprendible pakico tin di bay kita placa di famia di e forma aki na Aeropuerto Internacional La Chinita.

Ademas di esey, si bo cumpra cualkier souvenir den Aeropuerto, nan ta hasta kita esaki ora bo ta cla pa subi avion.  Tambe si bo tin pan pa bo come durante vuelo, nan ta kita na pia di trapi.

Aeropuertonan na Venezuela tampoco no ta safe mas.  Hasta na Maiquetia su vliegveld, tabatin caso di atraco cu a socede den pasiyo.  Tur tipo di estafa ta socede, y bo no sa mes si e Oficial den Uniform para bo dilanti ta di berdad of djis un hende falso.

E famia awor ta na Aruba, ricibiendo yudanza di algun hende pa sikiera nan vacacion por bay bon.  Un bon conseho pues ta pa evita di pasa Aeropuerto na Venezuela, pasobra ni di transito bo no ta safe mas.

- Advertisement -

2 COMMENTS

  1. Boso por relata na plaka chikito kico a pasa en realidad. Pa asina alerta Arubiano mihor. Ja cu mi mes persona ta biahando constant pa aya nan y no a topa cu algo asina ainda. Berdad hopi soldad, polis etc. Pero relata completo pa por tene cuidow.
    Danki.

  2. Basta kens boso mester ta di sikiera pasa na Venezuela, corda pa keda! Wak kico tur ta pasando eynan! Boso tin suerte di keda na bida!

DUNA COMENTARIO

Please enter your comment!
Please enter your name here