Home Comentario FELIZ DIA DI TATA!

FELIZ DIA DI TATA!

56
0
SHARE
- Advertisement -

Comentario:

Pa Mercedes Monge

Berdaderamente e tarea di ta un mayor no ta nada facil. Mi ta scucha hopi biaha e expresion “tal persona ta un bon tata, of tal persona ta un mal tata”. Mi no kier referi na e tema ey, sino na e tata cu tampoco a nace cu e buki con e ta un bon tata bao di braza, pero cu ta haci su best y ta logra hopi.

Kizas varios decada atras tabata menos dificil cu awendia pasobra den hopi caso e mama tabata keda cas pa cuida, educa y guia nan yiunan foi chikito te ora nan transicion di adolescente pa hoben, y e tarea aki tabata tuma henter dia (24/7), mientras cu e tata tabata cumpli mas tanto cu e rol di proveedor.

Cu transcurso di tempo, e rol di e tata a cuminza cambia pasobra nada ta keda mescos den un mundo den evolucion, y na dado momento e mamanan (kizas e gran mayoria), a haya nan mes den e necesidad di sali bay traha tambe.

E ora ey mester a busca otro alternativanan den e educacion, cuido y guia di e yiu, sea acercando wela y welo, tanta, crèche, y awendia traimerdia tambe, pa di algun manera e mucha haya su debido atencion.

No obstante y a pesar di e circumstancianan aki, semper e mama a keda carga e rol principal, den sentido cu ta esun cu ta yega cas atende e yiunan, dedica nan un tempo di calidad y cu mas presencia den e hogar cu e tata.

Sin embargo, poco ta esnan cu a pensa con critico e muchanan di awendia ta lanta y con halto nan ta vocifera nan demandanan di atencion di ambos: tata y mama.

Y ta bunita di mira con hopi tata, y ban papia di Aruba, berdaderamente ta conciente cu nan yiunan mester di nan mescos y tin biaha hasta mas cu di nan mama.

Awendia por mira tatanan cu ta yuda nan yiunan cu proyectonan escolar, cu ta acompaña nan casa na anochinan di informacion pa mayor na scol, cu ta participa di e deporte di nan yiunan cu nan presencia durante un training of un wega competitivo. Den baseball y den futbol, por mira esaki.

Asina e tata den nos temponan moderno ta integra su mes mas na nan yiunan y ta hunga un rol masha pareu cu e mama den e crianza, educacion, guia y cuido di nan yiunan.

Cada bez mas e tata mester ta un actor constante den e escenario di nan hogar, pasobra e yiunan ta rekeri di esaki. Awendia disciplina un yiu mester ta un tarea di ambos: tata y mama. Tur dos mester yena nan curazon di amor, boluntad, energia pa ta bon educador den cas, sembra e bon semia y cosecha bon fruto: no ta virtudnan straño mas pa un tata ta cariñoso, sunchido, brazado, mele mele su yiunan, pero a la vez comparti e autoridad di imparti disciplina, di ta role model, duna respet pa ricibi respet y ta e prome na cumpli cu e reglanan di cas pa eherce un bon influencia den e formacion di su yiu(nan).

Un feliz Dia di Tata na tur tatanan na Aruba, y na tur yiu cu ta conta cu e figura paterno y materno den cas. Dios, nos Tata Celestial, yena nan cu hopi bendicion!

 

- Advertisement -

DUNA COMENTARIO

Please enter your comment!
Please enter your name here