ORANJESTAD (AAN): E ta bira un mensahe cla y raspa pa tur homber bibando den Reino Hulandes y cu no ta pagando placa di alimentacion pa nan yiunan! Bo por wordo encarcela.
DIARIO a haya sa for di Bonaire, cu pa casi 2 luna caba tin un homber Arubiano di inicial J.R. encarcela den prison na e isla di flamingo. E motibo? Pasobra na Aruba e tin un debe di riba di 41.000 Florin pa paga na e mama di su yiu.
El a fada caba di ta encarcela, y pesey a entabla un caso sumario siman pasa contra e mama, cu intencion di pidi Huez lage den libertad.
PAGO A STOP:
Placa di alimentacion cu e homber J.R. aki tabata paga pa su yiu muher chikito, diripiente a stop na aña 2011 ora cu e persona a dicidi na bandona Aruba y a bay biba na Bonaire. Desde e tempo ey e plegaria di e mama soltera a cuminza. Bon mes cu e tin un trabao, sinembargo mester a lucha na Aruba pa por a alimenta e su yiu muher, y un otro yiu mas cu e tin.
For di Bonaire e homber a cuminza manda algun suma di placa, sin cumpli debidamente cu e palabracionnan, y como excusa a indica cu ta dificil pa transferi placa pa Aruba. Pero desde 2013 el a stop completamente, despues di a contribui cu 5.000 Florin pa su yiu muher por celebra su Prome Santa Comunion na Aruba.
Forma pa despista hende: E excusa cada vez di e homber na Bonaire, ta cu e “no tin trabao”, y no tin placa. Esey parce di ta un forma pa despista hende pa no tuma beslag riba salario of entrada. Pero ora di a haci investigacion, a resulta cu e tin un Snackbar operando na Bonaire Hasta na Camara di Comercio di Bonaire, el a inscribi su negoshi.
Ora cu a confronte cu e esaki, J.R. a core cancela e registro na Camara di Comercio di Bonaire, y a hasta schrijf-uit for di Censo di e isla. El a bisa cu e lo bay bende e negoshi, y e placa cu e ricibi e lo manda pa Aruba.
Pero nada di esey a socede. E negoshi berdad a cera, pero awor ta na su propio cas na Bonaire e tabata bende cuminda. Tin prueba di esey cu su pareha nobo ta promove esey riba Facebook pa nan amigonan na Bonaire. Pues placa tabata drenta tog cerca e homber, pero no ta manda placa pa Aruba.
Desde e tempo ey, J.R. no a ni trata na comunica mas cu e yiu muher, ni preocupa si acaso el a come, ni si acaso scol ta bayendo bon, nada.
CASO SUMARIO:
Diabierna atardi na Aruba, e caso sumario a tuma lugar. E homber J.R. a aparece dilanti Huez, via di Video-Link direct for di Bonaire. El a presenta cu su abogado mr. Dundas y den e sala tabata presente tambe su actual pareha.
Na Aruba, e mama di inicial F. a presenta sosteni pa su abogado mr. Griffith, y el a splica na Huez cu desde 2013 e homber J.R. ta keha cu na Bonaire no tin trabao, pero nan a presenta cu un monton di propaganda di e isla di Bonaire unda ta ofrece empleo. Nan ta kere cu e homber J.R. no tabata solicita mes.
Despues di a duna e homber chens pa 18 luna pa e presenta cu pago, a dicidi na cana e caminda legal. Esey a pone cu na dos ocasion Corte di Husticia a manda yama e homber J.R. pa presenta dilanti Huez. Tur dos biaha el a neglisha e orden ey. E ultimo biaha Huez a duna ordo pa detene J.R., den un proceso conoci como “gijzeling”, pa asina forza e persona pa paga loke e debe.
A dune 1 aña di chens: Hasta asina, e mama na Aruba a dicidi na duna J.R. un chens mas. Pero despues di warda 1 aña y nada a socede, finalmente na comienzo di Mei 2017 a duna ordo pa ehecuta e sentencia. Mesora autoridad na Bonaire a actua riba orden di Corte, y a detene e homber.
E homber a lanta Caso Sumario cu e ponencia cu e kier sali pa asina cuminza traha pa e paga loke e debe. Durante tratamento di e caso, dado momento ora cu e abogado na Aruba tabata na palabra, e pareha na Bonaire a gewoon cuminza hari. Esaki no a cay den bon tera cerca Huez na Aruba, y a duna ordo mesora pa nan stop.
E rumannan di J.R. a acerca e mama pa wak con por logra un acuerdo pa soluciona e asunto aki. Pa nan sorpresa, e homber J.R. for di Prison na Bonaire a laga sa na su rumannan cu e no kier ningun deal.
E homber J.R. a haya chens di papia, y a splica cu un compania di Electronics na Bonaire a ofrece J.R. un trabao, y e director di e compania ta dispuesto pa tur luna kita 600 Florin di e salario, y manda esaki pa Aruba.
Tambe el a mustra cu el a perde trabao y desde e tempo ey e situacion a bay malo pe. Aki por a tende den su voz cu e tabata hopi emociona.
Huez na Aruba a opina cu e ta haya cu J.R. a lanta e caso sumario pero a presenta den Corte cu “man bashi”. El a haya como 3 aña chens di haci pago, pero ni e tempo ey no a yuda. Ta parce cu J.R. no ta mira e nut pakico e ta encarcela tampoco.
J.R. ta bisa cu un compania na Bonaire ta interesa pa dune trabao, pero Huez ta desapunta cu e no a presenta den Corte cu ningun prueba, ningun acuerdo firma, ningun deal, nada. El a bisa cu e compania na Bonaire lo por kita 600 Florin pa luna pa e pago di alimentatie sigui. Pero e no a bisa nada di e debe di 41.000 Florin.
Huez a duna J.R. un chens mas, y otro siman dia 5 di Juli, net prome cu reces di Corte di Husticia, lo bay mira e preso un biaha mas via Video-Link pa check si e tin algo mihor riba mesa pa asina e wordo libera of no.
Mientras tanto keto bay J.R. ta encarcela den Prison na Bonaire.
E caso aki ta manda mensahe cla y raspa na tur Tata cu debe placa di Alimentatie (“Alimony”/”Child Support”), cu no ta importa si bo ta na Aruba of na cualkier pais den Reino Hulandes, nan por encarcelabo pa asina forzabo paga e debe cu bo tin!
