Home Estilo Integridad den Cultura di Trabou

Integridad den Cultura di Trabou

5
0
SHARE
- Advertisement -

parti II

Drs.Marisol M.Krosendijk

Pa nos corda un rato e articulo di dos siman pasa, ban recapitula kico ta nifica tin integridad:

 Cu bo accionnan ta consistente cu bo palabranan;

 Cu hende por confia den bo, cu hende por depende di bo y cu bo ta honesto;

 Cu bo ta comunica honestamente y habri;

 Cu bo tin balornan apropia y comportacionnan cu ta refleha e balornan aki;

 Y cu bo por admiti foutnan y no tin miedo pa mustra cu bo ta worry.

 

Tres forma di integridad

Segun e meneer Dan Couglin kende ta reconoci riba e area aki tin tres tipo di integridad:

Intergridad interno: Esaki ta bo integridad na e nivel mas profundo. Bo integridad ta djies pa show pasobra e ta mustra bon, of di berdad bo ta biba bo bida cu integridad den mente? Integridad Interno ta tocante ta capas di hasi lo corecto, hasta ora ningun hende no ta wak y maske bo no haya credito pa hasi esaki. Hasi locual ta corecto, maske e por parce e opcion mas difisil, apesar di cu ningun hende ta wak bo realmente ta un stap grandi den e direccion di garantisa cu bo ta biba cu integridad.

Integridad externo: Esaki ta locual bo ta mustra na esnan rond di bo. Bo tin un integridad externo halto ora bo accionnan ta consistente cu bo pensamentonan y cu locual bo ta bisa. Si bo ta bisa un cos, pero bo accionnan ta bisa algo otro-bo tin mas trabou pa hasi.

Integridad di imagen: Mescos cu integridad externo-esaki ta e imagen di bo integridad. Porta di berdad externamente bo por ta mustra accionnan corecto y bo ta tuma e caminda corecto, pero bo por pensa di hasi e accionnan aki di otro manera? Bo ta lagando bo imagen habri pa interpretacion? Hende tin hopi imaginacion. Ora nos no ta compronde algo, nos ta hopi liher den hasi suposicionnan y forma creencianan di dicon algo ta pasando. Percura pa bo integridad di imagen kiermeen asegura cu ningun di bo accionnan of palabranan por wordo duna e interpretacion ekiboca.

 

Con nos por desaroya  integridad

Integridad mester wordo siña y practica na un edad hopi jong. Hendenan cu tin mayornan of miembronan di famia cu ta honesto, husto y consciente tin mas hopi chens pa hereda e aspectonan di integridad ora cu nan bira mas grandi.

Pero, si bo no tawata tin suerte den bida, y bo no a haya e chens di biba cu hendenan cu tawata tin e caracteristicanan aki, ainda bo por hasi algo pa cambia bo mes. Promer ta hopi importante cu bo ta hopi consciente di bo pensamentonan, palabranan y accionnan. Den tur cos cu bo hasi, semper puntra bo mes, “ E pensamentonan aki, e palabranan, e accionnan ta den acuerdo cu e principionan y balornan universal?” Si ta no, e ora bo tin cu cambie. E caminda pa desaroya integridad no ta facil y bo por progresa solamente si bo tuma pasonan chikito-un paso cada bes. Locual ta importante ta bo compromiso pa cambio; pa bira un mihor persona cu bo ta awe.

 

Tipsnan pa mustra integridad na bo trabou

Construi relacionnan respetuoso y di mutuo confiansa-confiansa y respet ta e ingredientenan di un cultura saludabel y positivo na trabou. Comunicacionnan respetuoso, respetando bo colega su pensamentonan y ideanan y continuamente trahando riba relacionnan ta demostra cu bo ta un “team player”. Traha manera un team ta desaroya confianza y tambe ta demostra cu hendenan por conta cubo.

Comunica habri y honestamente- comunicacion habri y honesto ta e manera pa segura cu hende sa kico ta pasa exactamente rond di nan, unda tur hende ta para y e mihor manera pa sigi dilanti.

Sigi proceduranan di trabou-Proceduranan ta diseña pa guia bo na e mihor practica. Si bo kies pa no sigui nan of si bo ta usa shortcut, esaki lo conduci bo na mal resultado, problemanan y foutnan cu lo mester wordo drecha.

Demostra comportacion responsabel- Asegura cu no tin motibo pa bo coleganan cuestiona bo conducta door di demostra comportacion etico y moral tur ora. Esaki ta inclui evita di usa e compania su equipo of recursonan pa uso personal, hasi esfuerzo pa completa bo trabou promer cu e fecha limite y mustra entusiasmo y compromiso cu bo trabou.

Traha diligentemente- Esaki ta un manera poderoso pa mustra bo integridad dor cu e ta mustra cu bo ta responsabel cu bo tempo di trabou. Hasi yamadanan personal, ta bezig cu internet, text of snack na bo mesa di trabou, ta cierto actividad nan cu ta distrai un persona di traha efectivamente. Door di focus riba bo responsabilidadnan di trabou ora bo ta na bo mesa di trabou, lo mustra bo coleganan, manager,  y hasta clientenan cu bo tin etica di trabou fuerte.

Admiti y siña for di bo errornan-Ta comun pa hasi fout ora bo ta traha, pero bo mester admiti e error sin tira culpa riba e otro. Esaki ta mustra cu bo ta responsabel suficiente pa carga bo errornan, ta dispuesto pa coregi nan y siña di nan. Si bo ta un manager, esaki kiermeen tuma e culpa bo mes, y no laga e miembronan di bo team tuma e responsabilidad.

Dirigi dor di ehempel-Esaki ta pone un fundeshi firme pa locual bo ta balora mas y con bo kier traha. Door di wak bo traha cu e mesun standardnan y expectativanan, e ta encurasha otronan pa sigui bo ehempel.

Para pa locual bo ta kere aden-Esaki ta tocante para pa e manera cu bo ta pensa ta apropia pa hasi cosnan, anque tur otro hende ta hasi algo diferente.

Tin bo mesun identidad-Bin na compronde ken bo ta, kico bo ta capaz di bira, kico bo kier di bo bida y unda bo kier bay. Asegura bo cu esakinan no ta djiez reflexion di locual otronan ta spera of kier. Unabes bo sa esaki, aliña bo balornan na e caminda aki, y maneha straight den tur locual bo ta hasi.

 

Recordatorio di Dia:

Tin biaha bo por yega na un punto unda bo por wordo puntra pa hasi algo cu no ta den acuerdo cu bo codigo di conducta personal. Esaki por presenta un decision desafiante pabo, pero si bo tin un integridad fuerte y balornan, bo lo nenga di hasi esaki. Tin e curashi pa bisa no ta un habilidad importante pa siña.

Bo integridad ta bo amigo di mas grandi mirando cu e ta mantene bo riba e caminda corecto. Hasiele bo meta pa ta un persona di intergridad semper no importando cuanto tentacionnan of retonan bo por enfrenta.

- Advertisement -

DUNA COMENTARIO

Please enter your comment!
Please enter your name here