Home Estilo Kico nos mester siña nos menornan !

Kico nos mester siña nos menornan !

10
0
SHARE
Mother and daughter talking on bed
- Advertisement -

Pa: Jairo Maduro

Siguientemente mi kier a comparti cu boso algun punto hopi importante pa asina conhuntamente nos por yuda preveni y combati abuso sexual contra nos menornan. E puntonan aki ta algo cu nos como mayor of educador por comparti cu nos yiunan y sobrinonan na cas of alumnonan na school.

Nos mester siña nos menornan cu nan curpa ta pertenece na nan y cu ningun persona NO MAG mishi na nan curpa sin nan permiso.

Siñanan cu nan tin partinan intimo of priva na nan curpa y siñanan e pakico e ta wordo considera nan partinan intimo of priva.

Mester sa y respeta cu e menornan tin e derecho di bisa NO ora cu personanan ta sunchi of mishi cu nan durante di un saludo (no mester obliga e menor pa saluda un persona cu un sunchi si E no kier). Hasta si ta trata di personanan hopi yega na famia.

E menornan no semper por diferencia entre cual ta e forma apropia of inapropia pa caricia of mishi cu nan. E forma apropia di mishi, caricia of braza ta algo hopi bunita y semper e ta lagabo sinti bon, e ta hacibo feliz y bo ta bira contento. Di otro banda bo ta haya e forma inapropia di mishi, caricia of braza cu no ta bunita, nan ta lagabo sinti hopi malo, nan no ta hacibo feliz y ta ponebo bira tristo.

Nos mester siña e menornan bisa NO na un manera inmediato y firme na cualkier tipo di contacto fisico inapropia. Nos mester splicanan cu nan por bisa NO na cualkier di e momentonan aki. Nos mester sigura e menornan cu nan por pidi ayudo na un adulto di  confianza na cualkier momento.

E menornan mester sa cu tin secretonan bon y tambe secretonan malo. E secretonan bon ta por ehempel un regalo cu a wordo cumpra pa un ser keri, of un fiesta di sorpresa cu ta wordo organiza. Eseynan ta secretonan cu ta haci un mucha feliz. E secretonan malo ta locual e malechornan/abuzadornan ta hinca den e menornan nan cabez bao di menazanan. E secretonan aki ta pone menornan bira tristo, nervioso y e ta pone nan sinti hopi incomodo. E secretonan aki ta esunan cu NO mester wordo warda.

Mester siña e menornan cu si nan no ta sigur si e comportamiento di cierto persona ta bon of no, nan mester pidi ayudo. Siña nan pa aleha di biaha for di un situacion cu nan no gusta of cu nan ta sinti nan mes incomodo.

E menornan mester sa cu NO ta na su lugar pa un persona mira of mishi cu nan parti priva of parti intimo di nan curpa (cu exepcion di un medico den presencia di e mayornan).

Tampoco nan NO mag di mira of mishi cu e parti intimo of priva di otro persona.

Por ultimo y esun no menos importante ta cu nos mester siñanan cu si nan a wordo mishi of caricia na nan parti intimo cu esaki HAMAS ta nan culpa. Nos mester ta atento na e comportacion di e menor, si nan tin cambio di temperamento, si nan ta tristo, si nan tin mal beis, of si nan ta cuminsa cera nan curpa den camber. Den un di e situacionan ariba menciona nos no mester perde tempo y di biaha nos mester combersa cu nan y purba saca afo kico lo por ta pasando cu nan. Nos semper mester ta cla pa haci pregunta y scuchanan.

 

Tur e puntonan aki a wordo compila despues di a scucha y atende varios caso di maltrato cu a sucede den e ultimo temponan aki na Aruba. Ta puntonan importante y hopi valioso pa nos por yuda preveni cualkier tipo di abuso contra nos menornan door di simplemente tin un bon comunicacion cu e menornan a base di un confianza mutuo.

 

 

 

- Advertisement -

DUNA COMENTARIO

Please enter your comment!
Please enter your name here