Home Estilo Kiko ta INTEGRIDAD den un organisacion?

Kiko ta INTEGRIDAD den un organisacion?

26
0
SHARE
- Advertisement -

Parti 1

drs. Marisol M. Krosendijk, sicologa

Integridad, hopi ta mira esaki como un balor pa un organisacion pero tiki di empleadonan sa di berdad kiko esaki ta. Integridad ta e capacidad di actua den harmonia cu locual bo ta bisa of haya importante.

Integridad ta actua conforme e normanan di etica y social den e actividadnan relaciona cu trabou sin gaña, retene informacion importante, respetando e confidencialidad di e informacion personal y di e organisacion, no usando esaki pa beneficio propio, pero actuando den harmonia cu locual ta wordo considera importante. Esaki ta inclui cu un hende ta comunica su intencionnan, ideanan y sentimentonan di un manera habri y straight y cu e ta dispuesto pa actua cu honestidad tambe den negoshinan difisil cu personanan di exterior.

E personanan cu e calidad aki ta cumpli cu nan compromisonan y cu locual nan ta priminti, nan ta responsabilisa nan mes di nan obhetivonan, nan ta organisa y tin cuidou cu nan trabou.

E personanan aki no ta sconde nan foutnan, ni tampoco nan no tin ningun problema pa señala foutnan di mas hende.

Otro competencianan implica ta responsabilidad, compromiso, comunicacion, y frankesa.

Caracteristicanan di Integridad

Integridad por ta evidente dor di e siguiente caracteristicanan cu cada persona cu integridad tin:

  1. Consenshi-Hendenan cu integridad ta hendenan cu principio; nan ta traha duro y hende por depende di nan pa cada responsabilidad cu ta wordo duna na nan. Nan ta preocupa no solamente pa nan mes, pero tambe pa e bienestar di otro hende.
  1. Honestidad-Hendenan honesto semper ta busca e realidad; e ta un caracteristica di un hende su caracter moral unda tur decision, pensamento y accion ta mara cual ta wordo percibi di ta bon y berdad.
  2. Compasion y Empatia-Hendenan cu integridad genuinamente ta care pa otronan, no como un manera di impresiona pero mas pasobra nan curason ta dicta asina. Empatia kiermeen tin e habilidad pa pone bo mes den otro su hende su sapato, y un hende cu integridad semper ta busca di compronde locual otronan ta sinti y pensa promer cu nan husga of hasi decisionnan.
  3. Igualdad-E hendenan aki ta husto den nan comunicacionnan. Nan ta trata tur hende igual y ta duna nan mesun oportunidadnan. Den nan desicionnan nan no ta partidista.

Auto-reflexion: con bo ta score riba integridad actualmente?

*Bo ta bai for di trabou trempan ora ningun hende no por haya sa?

*Bo ta acepta full e responsabilidad (of bo parti) ora cosnan no ta bai bon?

*Bo ta comparti e credito ora cosnan bai bon?

*Bo ta confronta inhusticia, maske esey kiermeen cu bo mester confronta un supervisor?

Dikon pa tin integridad ta importante?

Na promer lugar, integridad na trabou ta importante paso e caracteristicanan aki ta yuda cultiva un cultura positivo na trabou. Un lugar di trabou unda tin comunicacion habri, unda bon decisionnan ta wordo hasi y cu tin un compas moral fuerte cu ta guia tur decision y accion. Mientras cu comportacion iresponsabel y desconfiansa ta hasi un ambiente di trabou incomfortabel y tenso.

Si bo ta conocir pa integridad, bo lo gana confiansa y respet di hendenan rond di bo.

Integridad no solamente ta importante riba area personal, e tambe ta importante na un nivel organisatorio. Organisacionnan cu ta conocir pa nan integridad tin mas exito.

Cual cliente kier deal cu un organisacion cu no ta wanta su mes na su palabra, cu ta bisa un cos pero ta hasi algo diferente cu ta ofrece mal productonan y servicio? Niun. Enbes

di esaki nan lo kier deal cu un organisacion cu nan por confia, cu nan por kere cu lo cumpli cu locual nan a palabra, cu tin empleadonan cu nan por confia y cu ta manda un bon mensahe.

Recordatorio di Dia:

Un hende cu integridad ta un hende honesto y firme den su principionan moral. Integridad personal ta un conviccion moral natural pa hasi locual ta bon, y rechasa tur locual ta malo, a pesar di e consequencianan cu ta mara na e decisionnan. Integridad ta bin den yen manera, pero e caracteristicanan mas importante na un lugar di trabou ta confiabilidad, honestidad, loyalidad y bon abilidad pa husga cosnan. Integridad ta kies curashi na lugar di comfortabilidad, scohe locual ta corecto enbes di locual ta liher, divertido y fasil. E ta ora nos kies pa practica nos balornan enbes di simplemente profesa nan. Bo integridad ta un di e balornan mas importante pa bo deal cune…con nos por desaroya nos integridad lo bin den e di dos parti!

- Advertisement -

DUNA COMENTARIO

Please enter your comment!
Please enter your name here