Parlamentario Marlon Sneek
ORANJESTAD(AAN):— Siman pasa durante reunion publico den cual Parlamento a trata e ley di screening di Ministers, lider di oposicion, Evelyne Wever Croes constantemente a uza un expresion cu ta mustra cu e ta hopi custuma cu esaki.
“Haci lo corecto hasta ora cu hende no ta mira,” ta e dicho cu e lider di MEP tabata ripiti tras di otro durante tratamento di e ley menciona, mientras cu su persona mes no ta cumpli cu nificacion di e dicho aki.
“Den ningun di su disertacion, Evelyne Wever Croes a trata di duna contenido na e ley aki, pero simplemente a uza su tempo di trata di pinta tur hende den forma negativo, keriendo cu su persona si ta esun corecto.
Lider di MEP hunto cu algun colega di dje, pa mas c’un aña no ta pagando pa staciona auto den centro di Oranjestad pero kico nos a mira durante di e reunion publico siman pasa, ta cu Evelyne a bin na grandi, staciona su auto den un sitio caminda e mester a paga pa esaki pero nunca a paga manera pueblo si ta paga.
Evelyne sabiendo cu Aruparking ya no ta pone klem of ta touw auto bay cu esakinan, a dicidi di viola reglanan cu tin y cu pueblo si ta cumpli cu nan, y bay den Parlamento pa haci su weganan politico.
Pero ora cu analisa e situacion aki bon pero na mes momento analisando e comportacion di e lider di MEP y su fraccion pa ultimo añanan, por compronde e motibo di con Evelyne no kier paga pa staciona su auto.
E splicacion ta cu di e forma aki Evelyne ta haci loke e mes ta predica, esta di haci lo corecto, esta keda sin paga, ora tambe hende no ta mira, ya cu e no kier paga si e no ta traha.
Loke ta mas serio di e caso aki, ta cu ora durante di reunion un miembro di fraccion di AVP a confronta su persona cu e tipo di comportacion aki, e lider di MEP a manda un ayudante bay hala e auto y no paga pa uza e espacio, caminda a hiba e auto staciona den e luga patras di Seaport Marketplace, caminda solamente ta ser permiti pa clientenan di e hotel y shopping mall staciona.
Aki e lider di MEP a pretende cu e ta bay sinta come den un di e restaurantnan cu tin pero realmente ta sinta den Parlamento ta haci politica partidista sin cumpli un biaha mas cu loke tur otro ciudadano si ta haci cune, esta di paga pa staciona auto.
Esaki ta tipifica e mentalidad di e lider di MEP y su fraccion, caminda nan ta cobra pa hopi tempo caba su cumpli cu nan deber como Parlamentario y riba dje ta bin abusa di situacionnan caminda nan por saca probecha financiero, cu ta igual cu e maneho cu MEP a hiba pa ocho aña caminda amigo y famia a probecha tur cu tin,” Parlamentario Marlon Sneek ta mustra.
