Home General National Hurricane Center ta pronostica cu Tormenta Tropical Bret lo “disipa” ora...

National Hurricane Center ta pronostica cu Tormenta Tropical Bret lo “disipa” ora e caba di pasa pabao di Aruba

2803
0
SHARE
- Advertisement -

ORANJESTAD (AAN): E di dos Tormenta Tropical di e temporada 2017 den Atlantico, ta rumbo pa pasa cerca di Trinidad & Tobago, Venezuela, y tambe Aruba.

Dialuna atardi 5:00 pm, el a wordo bautisa cu e nomber “Bret” door di NOAA National Hurricane Center.

Tormenta Tropical Bret a bira e di tres tormenta tropical den 167 aña cu a nace prome cu e fecha di 1 di Juli den e region principal di desaroyo pariba di Caribe.

Dialuna merdia, Bret tabata un Tormenta Tropical minimal, cu bientonan sosteni 65 km/h, y no tin hopi chens pa e intensifica pa Diamars ora cu e cuminza interactua cu e costa norte di Venezuela.  Pero tog areanan cerca di e wowo, y tambe banda panort di e wowo, lo por ricibi como 50 mm te cu 100 mm di awacero, y bientonan pisa.  (Pa Aruba ta pronostica djis 10 mm te cu 25 mm di yobida).

Trinidad & Tobago lo bay ricibi un hit directo di Bret.  Aunke e lo bay ta mas bien un Tormenta Tropical minimal, Bret lo sigui un ruta similar cu e unico Horcan cu a yega di afecta islanan pariba di Caribe den Juni, esta e “Horcan di Trinidad” di aña 1933.

HOPI WINDSHEAR DEN CARIBE

Biento duro e dianan aki den Caribe, lo por ta e malasuerte di Bret.  E Tormenta Tropical lo bay topa cu wind shear progresivamente mas fuerte, mientras e ta bay prepara pa move den Caribe.  E bientonan aki ta capaz di destrui y kibra e Tormenta for di otro.

Pesey mes, tin varios calculo di computer ta indicando cu Bret lo no sobrevivi e ruta aki den Caribe.

Pesey mes, e pronostico oficial di National Hurricane Center ta mustrando cu Bret lo bay disipa riba Diaranzon, net panort di costa di Colombia.  Pues esey lo socede despues cu e pasa Aruba.

Tog Aruba lo bay haya awacero cu posible lamper y strena y biento fuerte riba Diamars anochi pa Diaranzon madruga y mainta.

POSICION ACTUAL:

Pa exactamente 8:00 pm, e centro di Tormenta Tropical Bret tabata na 9.5º Nort y 60.5º West.  Esaki ta como 135 km Zuidoost di Trinidad.  Esaki ta tambe como 1.070 km Oost-Zuidoost di Aruba.

E ta moviendo direccion West Noordwest cu 40 km/h.  E presion minimo den e centro ta di 1006 Mb.

Tropical Storm Warning ta vigor keto bay pa Trinidad, Tobago, Grenada, Venezuela (for di Pedernales te Cumana, incluyendo Isla de Margarita).

Tropical Storm Watch ta na vigor pa Bonaire, Curacao, Aruba.

Un Tropical Storm Warning nifica cu condicionnan di tormenta tropical ta ser spera den e area di advertencia, den e caso aki dentro di 24 ora.

Un Tropical Storm Watch nifica cu condicionnan di tormenta tropical ta ser spera den e area di advertencia, den e caso aki dentro di 48 ora.

LOKE ARUBA POR SPERA:

Segun Departamento Meteorologico di Aruba, e mal tempo lo pasa Diamars anochi pa Diaranzon, y Aruba por spera yobida di 10 te 25 mm.

Lama lo ta for di Diamars anochi 11:00 pm te cu Diaranzon merdia 2:00 pm cu olanan di 5 te 10 pia halto na costa panort, y ola di 2 te 4 pia na costa zuid di e isla.

Biento lo ta di Diamars anochi 11:00 pm te cu Diaranzon mainta 11:00 am entre 20 y 25 nudo, cu algun rafaga te cu 40 nudo.  Diamars anochi biento lo ta di Oost-Noordoost.  Diaranzon mainta lo cuminza supla di Zuidwest.

- Advertisement -

DUNA COMENTARIO

Please enter your comment!
Please enter your name here