Home Estilo Proyecto social studiantenan di IPA ta invitabo ‘Cera conoci cu Fundacion...

Proyecto social studiantenan di IPA ta invitabo ‘Cera conoci cu Fundacion ‘SONRISA’

44
0
SHARE
- Advertisement -

Prome cu tur cos un danki di curason ta bay na Diario, cu a permiti nos un espacio den corant pa comparti cu Aruba henter informacion valioso tocante e fundacion’SONRISA’, cu ta activo den comunidad pa bienestar di personanan cu limitacion.

Tambe nos kier introduci nos mes y conta un poco tocante nos proyecto social.

Nos ta studiantenan : Celienne Tromp y  Zoya Fisher, di aña 4 di IPA, y como parti di e trayecto final (afstudeertraject), nos mester a contribui na un fundacion den comunidad di Aruba.

Nos a scohe fundacion SONRISA cu ta enfoca riba yuda y guia personanan cu limitacion  y nan mayornan den comunidad. Nos tarea durante e trayecto aki tabata informa e pueblo d’Aruba tocante e trabounan cu ‘SONRISA’ ta eherce, p’asina mas persona por cera conoci y haci uzo di nan servicionan.

‘Sonrisa’ su meta ta pa logra un calidad di bida halto pa su clientenan pa medio di enfoca riba e puntonan importante cu ta : bida social, educacion, trabou, vivienda, informacion pa comunidad y servicio.

Nos a haci algun entrevista cu trahadornan y mayornan pa haya informacion y asina logra traha un ‘pocketsize’ brochure cu informacion di ‘Sonrisa’, cu lo ta disponibel na diferente sitio e.o.: oficina di dokter, sociale dienst etc. y tambe traha algun relato pa informa comunidad.

Durante e trayecto nos a cera conoci cu tur e trabounan di ‘Sonrisa’ y ta sinti un gran admiracion pa e fundacion aki. Nos lo kier comparti tur e informacion cu e pueblo d’Aruba  den e edicion special aki.

Cada bez lo trata un diferente topico cu ‘Sonrisa’ ta enfoca riba dje. E prome relato lo trata e topico ‘bida social’.

Nos ta invita e pueblo di Aruba pa keda pendiente pa e informacion na caminda semanalmente den e edicion aki.

Finalmente nos kier informa cu dia 7 juni 2017 ,  lo tin un exposicion na IPA di tur e proyectonan social di e studiantenan. Nos huntamente cu otro studiantenan lo presenta e dia aki nos proyecto social y publico ta ‘welcome’ pa bin admira y asina tambe haya mas informacion tocante ‘Sonrisa’ y otro fundacionan di Aruba.

Punto di atencion number 1 di 6 Awe nos ta trata:

“Biba social”

Sra. Annelies Schoop, Presidente Sonrisa

‘Sonrisa ta ofrece diferente actividadnan social pa tur su miembronan’. 

Sonrisa tin su Grupo Social cu tin actividad recreativo  y educativo tur diabierna atardi. E momento di reuni ta entre 6:00 te cu 8:00 pm.  Actualmente nos tin un boluntario Kaisha Gomes cu ta dirigi e grupo aki cu tur e actividadnan. Tin entre otro: obra di man, bolas, karaoke, caminatanan, traha pizza y hopi mas.

Sonrisa tin su propio Grupo Scout cu tin su propio tereno pa haci su actividadnan cada pasa un diasabra di luna, cu ta wordo guia dor di GL Thomas Tromp. E grupo aki tambe ta miembro di Scouting Aruba. E miembronan ta participa na tur evento cu ta wordo organisa manera:

campamento, ‘hike’ cana den aire liber y cushina den mondi.

Nos tin tambe miembronan di Sonrisa Kiwanis Action Club cual ta un grupo cu ta recauda fondo pa yuda bek den communidad, manera tur otro clubnan di servicio aki na Aruba. Nan tin un directiva cu ta reuni cu e miembronan pa plania kico nan mes kier haci pa recauda fondo. Nan tin un adviseur pa guia nan pa tur cos cana manera mester ta.

Manera nos ta custumbra tur aña Sonrisa tin su ‘Vakantie Plan’ pa vakantie grandi. Cu diferente actividadnan riba nos isla y hopi biaha nos ta termine cu un campamento of un weekend den hotel. Di’e forma aki hopi di e miembronan cu porta no tin e posibilidad pa biaha, ta pasa un dushi vakantie manera un turista riba nan mes’un isla.

Un Bida Social ta beneficioso pa nos miembronan di Sonrisa. Loke nos ta constata ta cu e miembronan ta bira hopi mas social den nan bida diario y cu nan ta pendiente di kico tin na Sonrisa pa nan por topa nan amigonan. Nan ta sinti nan mes na cas y na momento c’un haci aña, nan ta festeha cu tur nan amigo y amiganan. Loke tambe Sonrisa a constata ta cu un ta yuda otro y hasta siña otro con pa comunica via whatsapp.

Sonrisa no solamente tin benificio pa e miembronan pero tambe pa e mayornan di e miembronan ora nan tin un bida social. E beneficio cu mayornan ta experencia ta cu nan yiunan ta sera  amistadnan cu otro miembro y durante di e actividadnan un ta yuda otro y asina nan no ta sintinan nan so. Un otro benificio cu mayornan ta experencia tambe ta cu mayornan mes ta topa otro y ta siῆa di otro nan experencia como mayor, ademas nan ta encourasha otro. Pa mas informacion por tuma contact cu nos ariba nos pagina di facebook“Sonrisa”.

- Advertisement -

DUNA COMENTARIO

Please enter your comment!
Please enter your name here