Home Salud Psicologo vs. Psikiatra

Psicologo vs. Psikiatra

5
0
SHARE
- Advertisement -

Locual bo mester sa promer cu bo busca un di e profesional nan aki

drs. Marisol Krosendijk, sicologa

Si bo tin preocupacion tocante salud mental, bo mester busca ayuda. Pero unda bo ta bay? Con bo sa ki sorto di dokter bo tin cu papia cune? Bo mester bay un psikiatra of un psicologo?

Hopi biaha mi ta topa personanan cu ta bruha den e profesionnan aki. E publico en general mayoria di biaha ta confundi e dos profesionnan aki. Mi kier pa boso sa, cu boso no ta boso so. Tin hopi confusion ey for y ta importante pa ta bon informa.

Tin similaridad, pero sigur tambe diferencianan. Aki bou mi ta bay purba splica locual bo mester sa pa dicidi ki tipo di ayuda ta importante pabo.

Hopi biaha pelicula y television ta mustra cu terapia pa por ehempel un enfermedad mental of emocional ta drumi riba un sofa den un oficina mientras bo ta deshoga bo alma cu e dokter. En realidad esaki no ta locual ta pasa den terapia. E termino terapia ta un termino cu ta encera hopi cos incluyendo medicina y diferente tipo di terapianan psicosocial.

Psikiatra y Psicologo tur dos ta envolvi den terapia. Por tin casonan unda nan ta te hasta traha hunto. Maske sicologonan y psikiatra sa traha hunto pa trata e trastorno mental a base di e cliente su problema, nan tin diferente experiencia den educacion, training y bista den practica, y nan ta hunga un rol unico y integral den e trato di enfermedadnan mental.

 

Psicologo

Un psicologo mescos cu un psikiatra tin un estudio di universidad tras di lomba. Un psicologo a hasi un estudio universitario den psicologia. Psicologia ta e ciencia cu ta studia e comportacion di hende.

Esaki no ta encera solamente locual hende ta hasi y kico nan ta hasi, pero tambe locual hende ta sinti, pensa y con nan ta yega na nan decisionnan.

Psicologia ta studia e caracteristicanan general di comportacion di hende, pero tambe e diferencianan, individuonan y gruponan, comportacion problematico y comportacion normal.

Un psicologo ta purba investiga y splica e funcionamiento humano por medio di diferente metodo, tecnicanan y angulo.

Sicologonan ta traha riba diferente area: den salubridad publico, enseñansa, gobierno, media, den e mundo di negoshi,……

E titulo Psikiatra y Sicologo ta protehi pa ley.

 

Psikiatra

Un psikiatra ta un dokter specialisa. El a specialisa su mes den psikiatria, despues cu el a hasi su examen pa dokter na un universidad. E psikiatra ta wanta su mes bezig cu diagnostico y terapia, esey kiermeen cu e ta detecta e enfermedad di su cliente promer (diagnostico). Despues e ta cuminsa cu e curacion di esaki (terapia). Nos por compara un psikiatra cu otro specialistanan medico manera kinderarts, longarts, keel-, neus-, en oorarts.

Un psikiatra no a studia psicologia. E mester a profundisa su mes akiden si, mescos cu hopi vak. Ocupacionalmente si e ta hopi interesa den psicologia.

Como dokter un psikiatra por prescribi medicina. E psicologo no mag hasi esaki.

 

Recordatorio di dia:

Psicologonan y Psikiatranan sa traha hunto pa coordina y provee e mihor terapia pa nan pashentnan/clientenan. Psicologonan hopi biaha ta wak nan pashentnan/clientenan tur siman pa terapia psicosocial. Psikiatra por wak nan pashentnan semanalmente of mensualmente pa psicoterapia y/of psicofarmacologia, dependiendo di kico e pashent su necesidadnan clinico ta.

Un profesional no ta mihor cu e otro, nan tur dos ta traha (hunto) pa sana e mente.

- Advertisement -

DUNA COMENTARIO

Please enter your comment!
Please enter your name here