Home Deporte Renovacion di stadion Frans Figaroa ta kedando cla

Renovacion di stadion Frans Figaroa ta kedando cla

41
0
SHARE
- Advertisement -

ORANJESAD (AAN): Na stadion Frans Figaroa ta tumando luga trabou nan di renovacion y Minister di Salud Publico, Cuido di Nos Grandinan y Deporte, dr. Carlos “Alex” Schwengle a haci un bishita di cortesia pa mira con e trabou nan ta avanzando. E renovacion di e stadion ta bayendo gradual y awo e renovacion di dak a keda cla.

E siguiente stap di e renovacion lo ta e gym y tambe lo verf henter stadion. E idea ta cu kier trece un estilo mas moderno pe stadion. “Nos lo bay consulta y mira si por haci un pintura riba muraya, manera un mucha cu bala di futbol”, Minister Schwengle a expresa. Ainda falta pa renoba e hekwerk banda di veld, mester bin cu stoelnan nobo y lo cambia e yerba di veld. Aworaki ta wardando pa e luznan yega pa asina pone nan y pa FIFA bin midi si e luznan ta cumpli cu e rekisitonan. Asina aki e ora no lo tin e competencianan di futbol manera division di honor na Dakota so pero lo por hacie eynan tambe. E renovacion di stadion ta bay gradual y pa 1 of 2 aña e stadion nan na Aruba lo ta completamente renoba y mas moderno.

E renovacion na stadion Frans Figaroa a inicia na Januari y Fundacion Facilidadnan Deportivo mester a haya e stadion for di e contratista dia 19 di Mei y teniendo cuenta riba dianan liber nan tin cu haye completamente cla dia 22 di Juni. Unico cos cu FFD ta wardando ta pa instala e luznan, asina Director di FFD, Junior Tromp, a comenta. FFD ta kere cu e instalacion di e luznan lo dura 2 siman y asina ey lo ta completamente cla.

Despues cu e trabou nan di veld keda cla, lo drecha e tribuna y cambia e stoel nan. E yerba di veld mester cambia pero ainda por haci uso di dje. FFD a cuminsa cu un inversion di 700 mil florin na Frans Figaroa y awo a sigui pa Crismo Angela/Nadi Croes. Ey lo drecha y actualiza e stadion. Den e renovacion a cambia henter e structura di e dak, a cambia e support riba e dak, a cambia e plachinan di dak.

E parti di mas importante pa FFD ta e parti di siguridad pe bishitantenan, ta cu a kita e heki riba e tribuna y cambia esaki pa un muraya cu ta mas fuerte. Prome tabatin tubonan diki pero nan a laga bay door di e salpeter. Pa evita cu hende por cay y keda herida, lo lanta e muraya y esaki lo duna un sosten mas na e structura di e dak.

Den e presupuesto di renovacion, a inclui tambe un ekipo nobo pa por haci trabou nan den haltura, pues pa verf, cambia luznan of otro trabou nan den cual ta necesario un ekipo moderno pa por hisa e trahado. A probecha bishita di e mandatario pa e pasa e yabi nan di e ekipo pa Presidente di Fundacion Lotto pa Deporte cu na su turno a pase pa e director di Fundacion Facilidadnan Deportivo.

- Advertisement -

DUNA COMENTARIO

Please enter your comment!
Please enter your name here