Home Enseñanza Un maestro mester no di cien porciento pero di 300 porciento di...

Un maestro mester no di cien porciento pero di 300 porciento di pasenshi!

25
0
SHARE
- Advertisement -

Entrevista cu meneer Anthony de Haseth

Seccion Hubentud den Movecion a entrevista meneer Anthony de Haseth, ken Diabierna siman pasa a wordo sorprendi pa colega y alumnonan di Colegio Conrado Coronel, cu un bunita despedida, ya cu e dia ey el a baha cu pension despues di 35 aña como maestro.

Esaki ta e prome, di dos articulo, di un entrevista extenso y sumamente interesante.

Meneer de Haseth a conta nos cu e ta bin di un famia di educadornan, tambe su casa ta maestra y ademas su yiu muher a tuma e mesun direccion aki.

Pakico el a scoge pa ta un maestro? “Semper e pasion pa traha cu mucha, pa yuda nan den nan desaroyo pa nan bay dilanti” meneer Anthony a menciona.

Despues cu el a caba su MAVO Scol a bay Colegio Arubano, y di eynan el a drenta APA Academia Pedagogico Arubano (APA), cu a bira despues Instituto Pedagogico Arubano.

Na aña 1981 meneer Anthony a cuminza traha den Peter Boer School na San Nicolas. “E tempo di APA nos tabata papia di tres aña di estudio y aworaki despues a bira cuatro aña di estudio. Esaki pasobra e proceso y e metodonan ta cambia, sistemanan ta cambia. Pero e reglanan basico no ta cambia. Si nos wak di antes, awo y den futuro, respet mester keda igual”, meneer Anthony a indica.

Na Peter Boer School, meneer Anthony a cuminza traha na aña 1981 unda a traha mas of menos diez aña.

Despues el a muda bin Playa tempo cu Colegio Conrado Coronel a habri. Esaki tabata na aña 1992. E tempo ey e scol tabata situa unda cu Arco Iris Kleuterschool ta ubica awor.

E ta corda cu el a cuminza traha cu su tres colega: Juffrouw Greta den Eerste Klas, meneer Anthony mes den Tweede Klas y Juffrouw Yvonne Wever den Derde Klas.

Na aña 2004 Colegio Conrado Coronel a bin den su edificio nobo na Morgenster, na unda sr. Anthony tin casi 12 aña trahando, y aki a fungi como director interno y como cabesante mes.

Reto y satisfaccionnan:

Den un mundo y un comunidad den cambio constante, un educador ta pasa den hopi reto y den hopi momentonan di satisfaccion. Kico meneer Anthony por conta nos al respecto?

“Masha importante den e profesion aki ta, cu mester tin 300 porciento di pasenshi. No cien, pero 300. Esey ta e prome principio. Y stima bo trabao hopi. Mi sa cu tin otro trabaonan unda bo por gana mas placa, pero esaki no ta un trabao pa placa. Un maestro mester tin hopi pasenshi, hopi dedicacion y guia e muchanan pasobra bo kier pa nan yega mas leu posible; pa nan yega na nan maximo potencial y esey ta un reto cu bo no por hacie bo so, pasobra mayornan tambe mester yuda bo y bo coleganan. E ta un esfuerzo di grupo y no di un hende so. Un hende por haci un tiki diferencia pero bo no por haci tur cos. Si cas y scol yuda bo hunto nos por hacie, pero si e cas no tey e ta bira mas dificil e ora ey. Esey no kiermen cu bo ta keda sin hacie, bo ta hacie tog”, meneer Anthony a señala.

 

- Advertisement -

DUNA COMENTARIO

Please enter your comment!
Please enter your name here