Home Tempo UPDATE di Gobierno: E sistema aki ta uno debil pero mester keda...

UPDATE di Gobierno: E sistema aki ta uno debil pero mester keda alerta

400
0
SHARE
- Advertisement -

ORANJESTAD    (AAN):   Diamars mainta un conferencia di prensa a wordo yama di parti di Gobierno cu presencia di tur e departamentonan concerni den cuadro di e mal tempo cu ta den nos cercania.

Prome Minister Mike Eman a habri e conferencia di prensa expresando cu reunionnan ta tumando lugar cu e “beleid team” cual tin miembronan di diferente ministerio y departamentonan, entre otro DOW, Rampen Bureau, Meteo, Polis, Ambulans, Sociale Zaken, etc.

E mandatario a indica cu nan a haci evaluacion y ta trahando a base di precaucion. Door di experiencia di casonan di pasado y awacero di algun luna pasa, a keda visto ora di duna asistencia ta cu hopi cas a haya nan confronta cu inundacion madruga.  Den hopi cas no a tuma precaucion, a remarca.

Eman a indica cu a repasa algun aspecto y ta recorda comunidad pa tene precaucion y cuida pertenencianan. Algo cu no por reemplaza, a bisa ta documentonan importante cu a wordo destrui y potret. Pesey mester tene cuenta ora tin inundacion pa pone e pertenencianan aki na un lugar sigur.

El a remarca cu e experiencianan aki ta mustra cu mihor ta prepara y aunke semper ta haya critica, mihor ta prepara y keda cauteloso.

Pa loke ta e efecto di tempo aki, e ta mustra un tempo cu yobida, biento y olanan halto. E no ta hopi pisa pero por cambia. Pesey ta bon pa ta alerta, Prome Minister a manifesta.

El a agrega cu den e dianan cu a pasa, DOW ya caba a cuminza cu limpieza di rioolnan. 48 ora prome ta wordo haci normalmente y actualmente e ploegnan ta bezig.

Departamentonan ta prepara pa duna e asistencia necesario, pero tog ta pidi comunidad pa keda den sintonia y pa ta precavi. Bisiñanan mester por  colabora cu otro. Situacion lo ta manehable pero mester keda atento pa cualkier cambio, a sigui bisa.

E mandatario a recalca cu e pronosticonan ta basa riba informe di institutonan importante y oficial. Situacion ta wordo monitoria di cerca.

Marck Oduber di Servicio Meteorologico a expresa cu Meteo tin contacto cu Hurricane Center y otro institutonan den e region y no tin cambio pa loke ta e warning cu a ser emiti.  E sistema pasando pa noord ta bay ta perdiendo forza, a bisa. E ta un Tropical Storm watch. Esey ta nifica cu por  spera awacero den oranan di madruga. Biento lo ta entre 11 pa 27 nudo, maximo 33. Por ta fuerte tin biaha.

Manera cu e sistema pasa e lo ta menguando. Banda di esaki tin un “Marine Advisor” pa e costa noord. E parti zuid no ta premira problema pasobra e sistema ta uno debil. Efecto pa e area di hotel ta minimo, Oduber a indica.

Diamars pa diaranzon e chens pa awacero tey y por ta acompaña pa lamper cu strena. E sistema tropical aunke e ta debilita, e chens pa awacero ta keda. Si tin aviso di mal tempo ta bay ta un aviso local, Marck Oduber a remarca.

E sistema aki ta uno debil y e lo bay ta debilitando. E boletinnan, a agrega a wordo saca for di diasabra pa asina mantene e comunidad informa di e desaroyonan.

Pa loke ta DOW, Marlon Croes, director di e departamento aki a señala cu tur aña nan ta prepara pa temporada di horcan. Desde cu a drenta den e “watch” aki a drenta den preparacion y a bay haci e rioolnan limpi. Ta wak e bocanan cu ta bay lama pa nan ta habri.

Riba caya tambe tin atencion cu e sistema di riolering pa e ta limpi. DOW ta preparando ekiponan, ploegnan y tin postnan disponible. Nan ta coordina cu Meteo pa cualkier calamidad 24 ora pa dia, Croes a finaliza bisando.

- Advertisement -

DUNA COMENTARIO

Please enter your comment!
Please enter your name here