ORANJESTAD (AAN): E proyecto di Watty Vos Blvd naturalmente ta tuma su tempo segun ing Marlon Croes. Tin dos aña y mey di construccion. A cuminsa na April ultimo y tin diferente trabao cu ta wordo haci.
A cuminsa cu e prome ta e construccion banda di FCCA te cu Codemsa y ta drentando bay patras den San Barbola. Ta yegando Sero Patrishi cu habrimento, cual ta bay responsabel. A busca un partnership hunto cu LVV/Santa Rosa, cu DNM y tambe cu Parke Nacional Arikok, pa prome cu haci e area limpi, ta scan full e area aki y wak si tin vegetacion cu tin cu preserva y si tin luganan cu parhanan ta biba y shoconan, nos reptilnan. Prome cu cuminsa cu e trabaonan cu por realoca e matanan, hibanan na nursery na Santa Rosa y parhanan, si tin neishi di shoco, cu nan ta mobilisa nan pa cuida nan y despues laga nan bay bek den naturalesa.
Ta haci e trabaonan mas sostenibel posibel y di otro banda e vegetacion cu ta kita, e ramanan, ta chipnan pa uzanan como compost y groundcover den e proyectonan mes. Pa loke ta trata troncon di matanan, nan ta disponibel pa nos artesanonan por haci uzo di dje, si nan tin mester di dje pa traha arte y cual por cierto a haya diferente aplicacion caba di e artesanonan cu kier haci uzo di nan. Asina e trabaonan ta moviendo.
Tin un acercamento hopi mas sustenibel pa e proyecto mes, segun Croes. Tin un parti di Caya Ernesto Petronia, rotonde di Santa Helenastraat, bay direccion luz di trafico Noord, lo wordo upgraded.
Lo bin un caminda pa peaton, lo bin un caminda pa bicicleta por core, entre Noord y Playa y lo bay tin iluminacion, lo bay in vegetacion, upgrading landscaping completo riba e ader aki y lo bay conta tambe riba e pida di LG Smith Boulevard, esta Sasakiweg, for di Sun Plaza te cu Superfood, cu ta inclui den e trabao cu nan ta bay embeyece e area aki y manten’e.
Tambe for di e cruzada di Sun Plaza bay direccion di Eagle Beach, esta Irausquin Boulevard, te cu Riu Antillas, lo wordo embeyeci cu un Linear Park cu ta trahando riba dje. Esaki lo bira fase 4 y 5, cu lo wordo embeyeci cu facilidadnan pa nos local y bishitantenan.
Ta un proyecto bastante grandi cu ta tumando luga, cu lo bay tin un contribucion grandi pa no solamente pa e trafico, pero tambe pa e peaton y ciclistanan por haci uzo di dje, den forma recreativo of den futuro pa nan por bay trabao cun’e y bay cas bek despues.
