Home Comentario Ya ta bende bandera di entrada pa circo di Augustus y feria...

Ya ta bende bandera di entrada pa circo di Augustus y feria di 22 di September

40
0
SHARE
- Advertisement -

Despues di e asina yama “debate” di diahuebs anochi, a resta solamente 13 dia pa e partidonan registra nan mes  , pa despues di 2 siman e registro wordo traha, y pa aki 57 dia pa e partidonan entrega nan lista di participacion den eleccion di dia 22 di September.

Nan lo tin cu spera 3 siman largo atrobe pa e Conseho Electoral dicidi riba e listanan entrega di manera cu pa dia 25 di augustus nan a cambia y drecha tur locual no ta corecto riba lista..

No tin duda cu asina cu e partidonan a anuncia con nan lista ta hinca den otro, bo ta haya e impresion cu berdad henter e asunto di politica, haci politica y bira politico, ta bira un “poppenkast”.

Esta cu di tur manera, henter e asunto di formacion di lista ta keda toch un area cu no ta principio ta loke ta domina totalidad di loke tin di sosode, sino mas bien preferencia cu lo por tin, sea pa e puesto cu por haya riba e lista, of di otro banda, e beneficio cu bo por haya ora bo drenta e arena politico.

Tur hende por a spera cu dia 4 di augustus cu ta entrega lista,  lo por pensa cu Aruba tin suficiente hende cu bo por pensa lo ta den forma capacita pa berdaderamente asumi responabilidad politico riba tur  e 7 (of mas of menos) listanan

Consecuente por a ripara caba cu bo no por spera cu e listanan aki lo tin 29 candidato riba nan tampoco.

Por a ripara for di comienzo di juni cu algun di e organizacionnan lo no logra 29 candidato.

Tin cu a pensa cu lo no tin problema y ta bay haya nan cu e berdad y keda cortico den esaki…

Esaki ta menos importante, pasobra – de facto-  ki sentido tin cu un partido na ora di berdad ta pone 29 hende riba su lista pa bay eleccion siendo cu na final di dia electoral y ora bo bay wak kico votonan personal a haci, tin biaha bo ta yega hasta na e conclusion cu e persona riba e lista ey no a vota ni pa su mes. Esaki a yega di sosode cu candidato cu no a haya ni un voto. E no a vota ni pa su mes tampoco.

Bo ta haya cantidad di candidato cu a haya asina poco voto cu bo ta puntra bo mes, kico tabata e intencion pa nan tabata  aparece riba lista mes.

Den cultura di nos, ta conoci cu e sistema di entregamento di lista ta bay cu fanfare. Un show di bandera, hopi beheit , buya, y un tiki despliegue di poder, manera nan ta gusta yama e “circo” aki  tambe y cu de facto no ta nifica absolutamente nada.

Nos a siña biba cu e realidad ey caba y riba dia di entrega di lista no por saca nada di conclusion sigur, pero e ta parti di e totalidad cu henter e proceso electoral ta trece cune.

Loke ta mas importante ta cu na momento cu yega 22 di September, cu berdad e pueblo cu ta bay vota, ta debidamente consciente di e importancia di e balor grandi cu su voto tin.

Cada un di e poblacion aki tin di realiza, cu su voto, aunke ta un voto— na e momento ey mester mira e totalidad, cu e voto ey por ta determinante pa e bon caminda of e mal caminda cu bo pais ta bay sigui.

Ta ripara ademas con clave e ora ey ta e realidad cu mester tin un presencia mental cerca e votador di e consecuencia di loke e ta bay vota riba dje..

Nos ta debidamente consciente cu e campaña aki — por ta mas cu nunca — lo bay tin esfuerzonan pa cumpra voto; esfuerzonan pa haya hende pa vota pa un of otro partido of candidato pa cambio di algo. (Mi a haya esey caba di parti di un aspirante candidato di un partido grandi)..

Tur hende ta consciente cu e cumpramento di voto a para bira un fiesta riba su mes cu ta probecha tin biaha di necesidad di hende pa di e forma ey gana nan voto, sperando cu esey lo ta suficiente pa conduci nan na Victoria electoral.

Nos mester por eleva e importancia di un eleccion na loke e mester ta di berdad y sigura cu den ningun caso lo tin e tipo di circumstancianan den cual e intencion puramente ta pa haya voto y si tin cu paga pe, ta 10, 25 , 50 of  100 florin y loke sea ta paga pe pa haya e voto ey…

Logico ta cu no por kere cu lo por bay elimina e forma di campaña aki den su totalidad.  E lo keda vigente ya cu e ta algo cu nos tin cu realiza, cu nos no ta den e capacidad, pa sigura cu ningun voto ta wordo bendi of cumpra den e proceso electoral aki.

Pa eleccion aki no ta mira tampoco cu lo por frena comercializacion di voto . Bo voto definitivamente no mester figura riba ningun toonbank pa bende.

Despues di e entrega di lista ta keda pendiente pa wak si lo drenta den periodo cortico di campaña limpi den cual ta haya programa di accion di e partidonan cua programa ta bira esencia di loke ta bay dicidi pa un hende vota pa un of otro partido.

No otro asuntonan cu berdaderamente no ta ni di e importante ey, esta cu si bo ta gusta un cara of no ta gusta un color pa ta bo orientacion pa voto.

Ta di spera cu e programanan lo figura, aunke ta cos bunita so tin para den nan, cu sikiera bo ta haya un idea den ki direccion e partido kier bay y wak si abo por uni  bo mes cu pensamento politico di e partido.  Laga esaki ta e unico motibo pa bo dicidi cu bo ta vota pa un of otro partido.

Sigur no e asunto di beneficio financiero cu lo bo por hiba riba e hecho cu bo a entrega bo voto y cu mañan por costa bo mes y bo futuro.

Esnan cu a entrega lista mester pasa den un proceso ainda pa comunidad scoge 21 miembro di parlamento.. No ta scogiendo pa ningun minister reparti riba esnan cu ta bay eleccion….

E custumber ta cu ta vota pa cabesante, e prome riba lista, pero e total di voto cu e partido haya  dividi riba loke e momento ey ta kiesdeler ta duna cuanto miembro bo ta haya den parlamento.

Con cu kier bay,  con cu bin bek, kico cu pasa,  e derecho ta cay bek cerca e mes pueblo. Ta e ciudadano ta dicidi cua di e tanto partidonan bo ta permiti pa participa den siguiente ronde cu ta eleccion…..

No duda den bo voto…no duda den  poder di bo voto….  Ora cos caba cu bo a eligi e 21, bo a duna nan confianza.. Bo a duna nan e permit pa dicidi pa bo pasobra bo no ta dicidi mas, ta nan ta dicidi kico ta pasa;  cual ley ta pasa of laga di pasa..

Bo ta spera cu nan sano huicio y cu nan trabao cu nan tin cu traha , na nomber di ABO cu a duna nan e voto ey semper lo ta den nan mente. No ami ami ami   pero nos nos nos..pueblo di Aruba..cada un ciudadano cu cada un di e dolornan cu nos por tin; dolor di pensionado, dolor di VUT, dolor di esaki  abo tin dolor di esaya.. Tur e dolornan ey hunto nos mester tene cuenta cune na e 21  cu nos a duna permit pa papia na nos nomber y cu ta e berdad nan ta papia na nos homber..

Vox populi,  vox Dei..Voz di pueblo ta voz di Dios y awor a cuminza e momento pa nos como ciudadano tuma decision den nos man fuerte…

Pensa pa bo. Ken bo ke. Cual partido bo ta kere lo por aporta na desaroyo positivo pa e isla aki y bay dun’e bo voto.   Bay bo participa na eleccion. No laga nan cumprabo ni cu 5 florin, ni cu 10 florin, ni cu 25 florin, ni cu cien florin, of centenaries di florin mes……

E placa ey ta caba  y ora e placa caba kico ta pasa?  Ora nan tuma decision cu ta afecta bo tambe cu a tuma cent, e ora ey bo ta man na cabez cu “Hesusee con mi ta haci ?”

E momento a yega pa nos como comunidad dicidi ken nos kier pa bay eleccion y e momento ta yega e ora ey tambe  pa nos como comunidad dicidi ken nos kier pa ta den parlamento di Aruba, na interes di e pais aki, di cada un ciudadano pa proximo 4 a

Vox populi, vox Dei. Palabra y decision ta na cada un di nos como ciudadano di e pueblo aki dia 22 di september….

                                                            Juby Naar

 

 

- Advertisement -

DUNA COMENTARIO

Please enter your comment!
Please enter your name here