Home Hudicial A kita cantidad di marihuana y cocaina for di riba mercado

A kita cantidad di marihuana y cocaina for di riba mercado

108
0
SHARE
- Advertisement -

ORANJESTAD (AAN): Den promocion di trabaonan di Flexteam via agencia di pulbicidad Tera Group, ta menciona cu durante e siman entre 5 pa 11 di juni ultimo, e ekipo conoci como “Flex-Team” di Cuerpo Policial Aruba a efectua un cantidad di control durante nan patruyanan diario. Ta trata aki di un grupo special di Polisnan cu instruccion specifico pa mantene ordo publico den areanan conoci pa problema.

E esfuersonan aki ta conduci pa evita of minimalisa agrupacion di hende rond di luganan conoci manera Manuelito’s Bar, Cirkle-K, Hotel Bacarat, casnan di pueblo na Noord, Madiki y tambe na casnan di pueblo na Sero Patrishi. Tambe a controla luganan manera Lekker, De Olde Molen y Cas Casuela pa nan orario di ceramento y den caso cu no a cera e luga ainda, a core cu tur hende pa cas.

Tur grupo cu a topa cune den oranan di anochi na altura di Eagle Beach y cu tabata consumiendo alcohol combina cu musica duro, mester a bandona e sitio. A controla tur esunnan cu a mustra un actitud sospechoso.

Durante e control den e siman ariba menciona, Polisnan di “Flex-Team” a topa cu e sospechoso di inicial A.H. kende tin orden di detencion riba su nomber. A detene na altura di Pelican Pier na beach y a transport’e pa Warda di Polis na Noord.

Diasabra dia 10 di juni 2017 pa mas o menos 10:25pm a topa cu holo fuerte di Marihuana den Avenida Alo Tromp den Rancho. Na altura di Wan Boy Bar & Restaurant a topa dos persona, pero cu a trata na core bay ora a nota presencia di Polis. Esaki mesora a haci nan sospechoso y a bay over na detencion. A listra nan y a haya 7 sakito conteniendo Cocaina. A detene e homber O.N.T. pa mas investigacion.

Durante e mesun siman, relaciona cu bendemento di Mini Mega, mara na un premio multimiyonario, a opta pa patruya den areanan specifico cerca di oficinanan di catochi.

Tur grupo, cu durante oranan di anochi y marduga ta para den gang riba parkeerplaats di The Village dilanti hotelnan High Rise, y cu tabata consumiendo alcohol y scucha musica duro, mester a bandona e sitio. A controla y listra tur cu tabata duna un actitud sospechoso.

Separa di sitionan specifico, a para algun auto tambe pa control. Eyden a haya un cantidad di marihuana, piedranan di cocaina, sker, cuchiu y otro artefactonan pa procesa droga. Tur a keda den beslag.

Na tur Polisnan di “Flex-Team” a efectua 113 control, a detene 2 sospechoso, di cual 1 tabata pa droga y e otro tabata pasobra Husticia ta busk’e.

- Advertisement -

DUNA COMENTARIO

Please enter your comment!
Please enter your name here