Home Economia Banco Central a dicidi na mantene e porcentahe actual di e tasa...

Banco Central a dicidi na mantene e porcentahe actual di e tasa di reserva

43
0
SHARE
OLYMPUS DIGITAL CAMERA
- Advertisement -

ORANJESTAD (AAN): Durante e reunion di dia 4 di Mei 2017 e Comite di Maneho Monetario (CMM) di Banco Central di Aruba (BCA) a dicidi pa mantene e porcentahe actual di e tasa di e “reserve requirement” na 11 porciento y e “advance rate” na 1 porciento, despues di a evalua e datonan economico y monetario mas recien. A considera e siguiente informacion y analisis den e proceso pa yega na e decision aki.

Reservanan internacional:

E reservanan internacional di divisa (incluyendo diferencianan den revaluacion di oro y di reservanan internacional) y e reservanan oficial a mantene nivelnan adecua na fin di Maart 2017. Mientras cu a registra un aumento den e reservanan internacional (+Afl. 60,3 miyon of 3,2 porciento), reservanan oficial a keda practicamente mescos (−Afl. 0,1 miyon of 0,0 porciento), compara cu December 2016. Consecuentemente, e reservanan internacional y e reservanan oficial a yega, respectivamente, te na Afl. 1.952,7 miyon y Afl. 1.673,1 miyon na fin di Maart 2017.

Desaroyonan den credito:

E crecemento di credito total di e banconan comercial a bira positivo (+0,5 porciento) na final di Maart 2017 compara cu December 2016. Mientras cu a registra caidanan den credito na empresa (−0,3 porciento) y credito na consumidor (−2,3 porciento), a observa expancionnan den fianza pa construccion di cas (+0,7 porciento) y e componente ‘otro’ di credito bancario (+7,4 porciento) na Maart 2017 compara cu December 2016. E ultimo ta refleha e compra di bononan di gobierno door di e banconan comercial.

Inflacion:

Na Maart 2017 a registra un caida den e prijsnan compara cu e aña anterior (−0,1 porciento) como tambe den e promedio anual di inflacion (−0,7 porciento). E prome ta principalmente causa pa un reduccion den e tarifa di coriente (Januari 2017), cual a worde parcialmente mitiga pa un subida den e componente di transporte di e Indice di Prijs di Consumo (CPI). E bahada den e promedio di inflacion ta debi na e promedio di prijsnan di gasoline mas abou y un reduccion den e tarifa di coriente (Januari 2016). E promedio di inflacion ora exclui e componentenan di cuminda y energia a yega na 0,4 porciento, primordialmente reflehando un aumento den e componente di vivienda di e CPI.

Turismo:

Durante e prome tres lunanan di 2017, e debilidad den e mercado Venezolano a resulta den caidanan den e cantidad di bishitantenan (−15,0 porciento) y anochinan permaneci na Aruba (−7,3 porciento). Di otro banda, a registra un expansion den e cantidad di turistanan crucero (+0,4 porciento), mientras cu e mercado Mericano a presta faborabelmente, loke ta refleha pa un impulso den e ingresonan turistico registra na banconan comercial (+3,7 porciento).

Placa den circulacion:

Na Maart 2017 e cantidad di placa den circulacion a subi cu Afl. 83,4 miyon te na Afl. 4.180,9 miyon, compara cu e luna anterior. E aumento aki ta debi na un impulso den credito domestico y den e compranan neto di divisa cual a resulta di ingreso turistico cu a sobrepasa pagonan neto pa bienes y servicionan.

Mercado financiero:

Na Maart 2017 a nota un caida den e averahe di interes riba depositonan nobo (−0,2 punto di porcentahe te na 1,2 porciento), mientras cu e averahe di interes riba prestamonan nobo a keda mescos (7.9 porciento), compara cu e luna anterior. Consecuentemente, e averahe den e margen di e tasa di interes aumenta cu 0,2 punto di porcentahe te na 6,7 porciento.

Advance rate:

E determinantenan di e “advance rate” di BCA a keda stabil. E margen entre e “advance rate” di BCA y e “Federal Funds rate” tabata 0,21 punto di porcentahe na Maart 2017. Consecuentemente, no tabata tin razon pa cambia e “advance rate” di BCA.

 

- Advertisement -

DUNA COMENTARIO

Please enter your comment!
Please enter your name here